00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro FC yegukanye Igikombe cya Shampiyona y’Icyiciro cya Kabiri

Yanditswe na Eric Tony Ukurikiyimfura
Kuya 8 June 2024 saa 11:06
Yasuwe :

Ikipe ya Rutsiro FC yegukanye Igikombe cya Shampiyona y’Icyiciro cya Kabiri ya 2023/24 nyuma yo gutsinda Vision ibitego 2-1 mu mukino usoza iya kamarampaka wabereye kuri Kigali Pelé Stadium ku wa Gatandatu, tariki ya 8 Kamena 2024.

Amakipe yombi yagiye gukina uyu mukino yaramaze kwizera kuzamuka mu Cyiciro cya Mbere ndetse yanganyaga amanota 10 ku mwanya wa mbere n’uwa kabiri.

Rutsiro FC yihariye umupira binyuze mu bwugarizi bwayo bwari buhagaze neza, mu gihe Vision FC yacungiraga ku mipira mike yabonaga igahita isatira.

Nubwo Rutsiro FC ari yo yatwaraga umukino, Vision FC yahushije uburyo butandukanye burimo ubwa Mutebi Rashid washoboraga gufungura amazamu ku mupira yahawe na Harerimana Emmanuel, ariko atera ishoti hejuru y’izamu rya Kagame Evariste bari basigaranye.

Rutsiro FC itozwa na Gatera Moussa, yafunguye amazamu ku munota wa 26, ku gitego cyinjijwe na Kwizera Eric n’umutwe ubwo umupira wari uhinduwe na Nizeyimana Jean Claude.

Vision FC yabonye uburyo bwo kwishyura ku munota wa 32, ariko umupira Mutebi yahawe na Nshimiye Laurent, awutera ku ruhande.

Nyuma y’uko igice cya mbere cyarangiye Rutsiro FC ifite igitego 1-0, Vision FC yakoze impinduka zitandukanye, Umutoza Muvunyi Fils ashyiramo Mbanjineza Radjab mu mwanya wa Kapiteni Mukunzi Vivens.

Mbanjineza yagaragaje impinduka mu kibuga, akorerwaho ikosa ku munota wa 52, rihanwe na Harerimana, umupira usanga Nsengimana Richard wishyuye akinishije umutwe.

Byasaga naho ari umunsi mubi kuri Mutebi wakomeje kugorwa kuko yahushije ubundi buryo bwiza ku munota wa 66 ubwo yari aherejwe na Mbanjineza.

Ku munota wa 80, Nizeyimana Claude yatsinze igitego cya kabiri cyakoze ikinyuranyo ku ruhande rwa Rutsiro FC, ku mupira yatereye inyuma y’urubuga rw’amahina, ugora Umunyezamu Shyaka Régis.

Rutsiro FC yegukanye Shampiyona y’Icyiciro cya Kabiri ifite amanota 13 muri 18 yakiniye muri iyi mikino ya kamarampakam mu gihe Vision FC yasozanyije amanota 10.

Amakipe yombi yatsindiye kuzakina Shampiyona y’Icyiciro cya Mbere ya 2024/25 aho yasimbuye Sunrise FC na Etoile de l’Est zamanutse.

Uretse igikombe Rutsiro FC yaherejwe na Perezida wa FERWAFA, Munyantwali Alphonse na Mudaheranwa Youssuf Hadji uyobora Rwanda Premier League, iyi kipe yahawe sheki ya miliyoni 8 Frw naho Vision FC ya kabiri ihabwa miliyoni 5 Frw.

Rutsiro FC yegukanye Igikombe cya Shampiyona y’Icyiciro cya Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .