Rutahizamu mushya wa Rayon Sports yayifashije gutsinda Etincelles FC (Amafoto)

Yanditswe na Ngabo Roben
Kuya 19 Gashyantare 2019 saa 07:01
Yasuwe :
0 0

Rutahizamu w’Umurundi Jules Ulimwengu, yakinnye umukino we wa mbere muri Rayon Sports nyuma yo kugurwa avuye muri Sunrise FC, bimusaba iminota 11 gusa ngo ayibonere igitego cyatumye itsinda Etincelles FC 1-0.

Kuri uyu wa Kabiri hakomeje imikino y’umunsi wa 16 wa shampiyona y’u Rwanda ibimburira imikino yo kwishyura.

Etincelles FC yasuye Rayon Sports idafite zimwe mu nkingi zayo za mwamba zirimo; kapiteni Mumbele Saiba Claude, Akayezu Jean Bosco na Muganza Isaac, bafite amakarita atatu y’imihondo na Tuyisenge Hakim wavunitse.

Gukinisha abakinnyi barimo abatamenyereye kubanza mu kibuga byatumye iyi kipe yo mu karere ka Rubavu, irushwa cyane mu gice cya mbere na Rayon Sports yahaga ikaze rutahizamu mushya Jules Ulimwengu.

Ku munota wa cyenda w’umukino Ulimwengu yashoboraga gufungura amazamu ku mupira wazamukanywe na Rutanga Eric, arawumuha acenga Hertier Turatsinze, agerageje gutera mu izamu umunyezamu amubera ibamba.

Ulimwengu w’imyaka 19 wagaragazaga umuvuduko udasanzwe mu gice cya mbere, ntiyatinze kwigaragariza abakunzi ba Rayon Sports bamwitezeho byinshi kuko ku munota wa 11 yahise afungura amazamu.

Ni umupira uteretse ‘coup franc’ watewe neza na Rutanga, igera kuri Sarpong wahise aha mugenzi we Ulimwengu ari mu rubuga rw’amahina ahindukiza umunyezamu Nsengimana, Rayon Sports ibona igitego cya mbere.

Ikipe y’umutoza Robertinho wari wungirijwe na Wagner do Nascimento Silva, watozaga umukino we wa mbere wa shampiyona, yakomeje kwitwara neza mu gice cya mbere cyarangiye ari 1-0.

Mu gice cya kabiri ikipe ya Etincelles FC yagarukanye inyota yo gushaka igitego inabona ayo mahirwe ku munota wa 52 ubwo rutahizamu Mutebi Rashid wavuye muri Mukura VS, yasigaga ba myugariro ba Rayon Sports, agatera mu izamu ariko umusifuzi wo ku ruhande yemeza ko atari igitego kuko umupira yawambuye abakinnyi ba Rayon Sports akoresheje ukuboko.

Uyu mwanzuro ntabwo wanyuze abatoza n’abakinnyi ba Etincelles FC bakomeje gushyiramo imbaraga ariko bakabura igitego cyo kwishyura.

Habayeho gusimbuza ku mpande zombi; Rayon Sports yinjiza Mugisha Gilbert mu mwanya wa Saddam Nyandwi na Bukuru Christopher asimbura Jonathan Raphael DaSilva.

Ku rundi ruhande; Muhanuka Eric yasimbuye Ngabo Mucyo Fred utitwaye neza muri uyu mukino ariko ntibyagira icyo bihindura, umukino urangira ari 1-0.

Nyuma y’umukino abafana ba Rayon Sports bakomeye amashyi menshi Jules Ulimwengu bamuha ikaze muri iyi kipe banamushimira ko abahaye amanota atatu yabafashije kuguma ku mwanya wa gatatu n’amanota 34, aho iri inyuma ya APR FC iyoboye urutonde n’amanota 38 na Mukura VS ifite amanota 37.

Imikino yose y’umunsi wa 16 wa shampiyona

• Sunrise FC 0-1 Mukura

• Police FC 3-1 AS Muhanga

• Rayon Sports FC 1-0 Etincelles FC

• Bugesera FC 0-0 Marines FC

• Amagaju FC 1-2 APR FC

• Espoir FC 5-1 Gicumbi FC

• Musanze FC 1-0 AS Kigali

11 bafashije Rayon Sports gutangira neza imikino yo kwishyura
Abakinnyi 11 babanje mu kibuga ku ruhande rwa Etincelles FC
Umupira wavuyemo igitego wahinduwe na Michael Sarpong
Usanga Jules Ulimwengu imbere y'izamu ahita ahindukiza umunyezamu Dominique
Nimero 7 yambarwaga na Caleb yabonye uyimusimburaho, Ulimwengu bakomoka hamwe
Abakinnyi ba Rayon Sports bahaye ikaze mugenzi wabo Ulimwengu
Bishimira igitego rukumbi cyabonetse muri uyu mukino
Abakunzi ba Etincelles FC ntabwo bishimiye imisifurire
Abantu b'ingeri zitandukanye bari baje gushyigikira Rayon Sports
Abatoza bari kwigishwa n'abavuye muri Arsenal bakurikirana uyu mukino
Abatoza bavuye muri Arsenal FC bakurikiranye umukino wa Rayon Sports na Etincelles FC
Dasilva agerageza ishoti rya kure
Donkor Prosper Kuka ntabwo yari mu bakinnyi 18 ba Rayon Sports
Etincelles FC yakoze amakosa menshi mu gice cya mbere ihabwa amakarita y'umuhondo arimo iyahawe Nahimana Isiaka
Ibyishimo ni byinshi ku bakunzi ba Rayon Sports
Ikipe yabo baba bayishyigikiye bigatinda
Iteka ku mikino ya Rayon Sports ibinyobwa by'umuterankunga wayo Skol biba binyobwa
Jules Ulimwengu yagoye ba myugariro ba Etincelles FC
Ku gicamunsi akazuba kari kenshi i Nyamirambo
Kuba umusifuzi atemeye igitego cya Mutebi ntabwo abakinnyi ba Etincelles FC babyumvaga
Mu gice cya kabiri DaSilva yasimbuwe na Bukuru Christopher
Mugisha Gilbert yagiye mu kibuga asimbuye ariko ntiyagira icyo ahindura
Nsengimana Dominique urindira Etincelles FC yatabaye ikipe inshuro nyinshi
Ntagungira Celestin Abega ukora muri FIFA nawe ari mu barebye uyu mukino, aha yaramutsaga Muvunyi uyobora Rayon Sports
Nubwo Etincelles FC yatsinzwe ariko umunyezamu wayo yakoze akazi gakomeye
Perezida wa Rayon Sports Paul Muvunyi yishimiye uko ikipe ye yitwaye
Raphael DaSilva yahushije amahirwe menshi mu gice cya mbere
Rayon Sports yakinnye idafite Iradukunda Eric Radu (Ibumoso) wahanwe na Ferwafa kubera amakarita atatu y'umuhondo
Rucogoza Aimable Mambo agerageza kwambura umupira Jules Ulimwengu
Rucogoza Aimable Mambo yakomerekeye muri uyu mukino
Umucungamari wa Rayon Sports na Gacinya Chance Dennis wahoze ayiyobora bareba ikipe yabo
Umutoza w'Amavubi Mashami Vincent akurikirana abakinnyi be yicaranye n'umunyamakuru Bayingana David
Umuyobozi wa komite Olempike Sen Munyabagisha Valens areba Rayon Sports yigeze kuyobora

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza