Robertinho yasinye amasezerano y’umwaka umwe muri Rayon Sports

Yanditswe na Eric Tony Ukurikiyimfura
Kuya 24 Nyakanga 2019 saa 08:56
Yasuwe :
0 0

Umunya-Brésil Roberto Oliveira Gonçalves do Carmo ’Robertinho’ yongereye amasezerano y’umwaka umwe nk’Umutoza Mukuru wa Rayon Sports.

Robertinho yagarutse mu Rwanda mu rukerera rwo kuri uyu wa Gatatu aho yari amaze hafi amezi abiri iwabo, nyuma yo kutongererwa amasezerano ubwo shampiyona ishize yari irangiye.

Ku mugoroba wo kuri uyu wa Gatatu tariki ya 24 Nyakanga 2019, Rayon Sports yatangaje ko uyu mutoza yongereye amasezerano aho bivugwa ko azajya ahabwa $4500 ku kwezi.

Akigera i Kigali, uyu mutoza w’imyaka 59 wafashije Rayon Sports gutwara igikombe cya shampiyona giheruka, yabwiye itangazamakuru ko yiteguye kongera kubaka ikipe nshya.

Ati "Hari abandi bakinnyi bashya, birasaba gutekereza neza kugira ngo hakinishwe abakinnyi bakwiriye kujya mu kibuga. Ndi hano kugira ngo nongere ntange ibyo mfite byose. Namaze kubona urutonde rw’abakinnyi bazakina Champions League ariko si yo gusa tugomba kureba n’indi mikino."

"Si ikibazo kuri njye kuba nakubaka ikipe nshya kuko no mu gihe cyashize narabikoze. Rayon Sports ni ikipe ikinira gutwara ibikombe, umutoza wese utoza muri Rayon Sports aba agomba kumenya ko ari ugutsinda buri mukino."

Robertinho yongeye guhabwa akazi nyuma y’uko Umunya-Cameroun, Mathurin Olivier Ovambe wari wahawe gutoza CECAFA Kagame Cup atemeje ubuyobozi, ikipe igasezererwa itarenze kimwe cya kane.

Rayon Sports yemeje ko Robertinho yasinye umwaka umwe ndetse azakoresha imyitozo kuri uyu wa Kane.

Rayon Sports yatangiye kwitegura Al-Hilal Club yatomboye mu ijonjora ribanza rya CAF Champions League ndetse izakira umukino ubanza uzaba hagati ya tariki ya 9 n’iya 11 Kanama 2019.

Roberto Oliveira Gonçalves do Carmo watangiye gutoza mu 2002, yanyuze mu makipe yo muri Brazil arimo Fluminense, Pelotas, Esporte Clube São Bento, América na Rio Branco.

Yageze mu Rwanda muri Kamena 2018, ahabwa amasezerano y’amezi atandatu yongerewe mu Ukuboza umwaka ushize.

Yafashije Rayon Sports gukora amateka yo kugera muri kimwe cya kane cya CAF Confederation Cup, agera muri kimwe cya kane cya CECAFA Kagame Cup yabereye muri Tanzania, atsindirwa ku mukino wa nyuma w’Igikombe cy’Amahoro 2018 mbere yo kwegukana Shampiyona y’umwaka ushize wa 2018/19.

Robertinho yongereye amasezerano y’umwaka muri Rayon Sports
Roberto Oliveira Goncalves do Carmo yageze muri Rayon Sports muri Kamena 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza