00:00:00 IGIHE NETWORK KN KINYARWANDA EN ENGLISH FR FRANCAIS

Real Madrid vs Dortmund: Ibyo wamenya mbere y’umukino wa nyuma wa UEFA Champions League

Yanditswe na Eric Tony Ukurikiyimfura
Kuya 1 June 2024 saa 08:29
Yasuwe :

Real Madrid irakina na Borussia Dortmund ku mukino wa nyuma wa UEFA Champions League ubera kuri Stade Wembley mu Bwongereza ku mugoroba wo kuri uyu wa Gatandatu, tariki ya 1 Kamena saa Tatu.

Real Madrid yageze kuri uyu mukino isezereye Bayern Munich yo mu Budage mu gihe Borussia Dortmund yasezereye Paris Saint-Germain yo mu Bufaransa.

Iyi kipe yegukanye Shampiyona ya Espagne, imaze gutwara Champions League inshuro 14 ndetse iraba ihura na Dortmund yabaye iya gatanu muri Shampiyona y’u Budage.

Nubwo Real Madrid na Carlo Ancelotti begukanye ibikombe bine muri uyu mwaka, uyu mutoza w’Umutaliyani yavuze ko bitabaha amahirwe ku mukino wa nyuma wa UEFA Champions League.

Ati "Umukino wa nyuma wa Champions League ni wo uba ari ingenzi mu mikino yose ariko na none ni wo utinyitse. Uba ugomba kuba ufite amahirwe, ugakina neza ndetse nturangare na gato. Ntiwabura guhangayika."

Yakomeje agira ati "Kugira ubwoba bwinshi ni ibisanzwe. Nawe wishima birenze iyo ubashije gutsinda nyuma."

Julian Brandt ukinira Borussia Dortmund yavuze ko kuri uyu mukino bazi ikipe bagiye guhura na yo ndetse biteguye gutanga ibyo bafite byose.

Ati "Ni ikipe ikomeye tuzaba duhanganye, muri Champions League nta kintu kibaruta, haba mu buryo bitwaye mu irushanwa no mu mateka. Tubaye ntacyo twizeye, twari kuguma i Dortmund."

Carlo Ancelotti yavuze ko Real Madrid itabura kugira ubwoba mu rugamba rwo gushaka UEFA Champions League ya gatanu

Courtois aratangira mu izamu mu gihe abakinnyi bane bakora amateka

Umutoza wa Real Madrid, Carlo Ancelotti, yemeje ko Umubiligi Thibaut Courtois atangira mu izamu mu mwanya wa Andriy Lunin urwaye.

Mu gihe Real Madrid yatwara iri rushanwa ku nshuro ya gatandatu mu myaka 11, abakinnyi bayo barimo Luka Modrić, Dani Carvajal, Toni Kroos na Nacho na bo baraba baciye agahigo ko kuritwara inshuro nyinshi (esheshatu).

Undi waritwaye inshuro nk’izo ni Francisco Gento ubwp yakiniraga Real Madrid hagati ya 1956 na 1966.

Kuri Modrić, we asanga amakipe yombi anganya amahirwe kuri uyu mukino wa nyuma uteganyijwe kuri uyu wa Gatandatu.

Ati "Buri wese ari kuvuga ngo ni twe duhabwa amahirwe, ariko si ko bimeze, njye ndabona ari 50-50. Dortmund ni ikipe nkuru, yagize umwaka mwiza w’imikino muri Champions League kandi iraza kuduha akazi."

Dortmund irajya gukina uyu mukino iri mu mwuka nk’uwo yarimo mu 1997 aho itahabwaga amahirwe ubwo yatsindaga Juventus ibitego 3-1 ku mukino wa nyuma wabereye i Munich.

Umutoza wayo, Edin Terzić yavuze ko intego imwe bafite ari iyo gutsinda.

Ati "Twishimiye kuba hano, ariko turi hano kuko dushaka gutsinda. Ntuza hano gukina umukino wa nyuma, uza hano kuwutsinda. Turashaka gufata kiriya gikombe mu biganza byacu."

Edin Terzić utoza Borussia Dortmund yavuze ko intego bajyanye mu Bwongereza ari ukwegukana UEFA Champions League

Hari abakinnyi bo kwitega...

Mu bakinnyi bakomeye bagomba kwitegwa kuri uyu mugoroba harimo Umwongereza Jude Bellingham umaze umwaka umwe muri Real Madrid aho ku myaka 20, amaze kuyitsindira ibitego 23 muri uyu mwaka w’imikino.

Muri ibyo bitego harimo bibiri byo mu minota ya nyuma yatsinze FC Barcelone muri El Clasico, mu mikino ibiri itandukanye. Yabaye kandi umukinnyi w’umwaka muri La Liga.

Ku rundi ruhande, Dortmund na yo ifite Umwongereza Jadon Sancho wagize umwaka mwiza nyuma yo gutizwa na Manchester United muri Mutarama.

Sancho yabaye mushya nyuma yo gusubira muri iyi kipe yakiniye hagati ya 2017 na 2021 ndetse ni umwe mu bagize uruhare rukomeye mu gusezerera PSG muri 1/2.

Uyu mukino wa nyuma wa Champions League ni uwa nyuma kandi ku Mudage Marco Reus umaze gukina imikino 429 muri iyi kipe y’iwabo.

Reus wujuje imyaka 35 ku wa Gatanu, yakiniye amakipe ya Rot Weiss Ahlen na Borussia Monchengladbach mbere yo gusubira mu rugo mu 2012.

Yayihesheje ibikombe bibiri by’u Budage mu myaka 12 yayikiniye, aho yatsinzemo ibitego 170 bimushyira ku mwanya wa kabiri w’abayitsindiye ibitego byinshi.

Reus wemeje ko azatandukana na Dortmund mu mpeshyi, yari mu ikipe yayo yatsindiwe ku mukino wa nyuma wa UEFA Champions League, na none i Wembley, na Bayern Munich mu 2013.

Undi ukina umukino we wa nyuma mu ikipe ye ni Umudage Toni Kroos aho ku myaka 34, yatangaje ko azasezera ruhago nyuma ya EURO 2024.

Kroos yakinnye imikino 464 kuva ageze muri Real Madrid mu 2014, avuye muri Bayern Munich, atwara Champions League enye, La Liga enye na Copa del Rey imwe.

Jude Bellingham ni umwe mu bakinnyi Real Madrid igenderaho
Jadon Sancho na we ari mu bahanzwe amaso
Marco Reus agiye gukina umukino wa nyuma muri Borussia Dortmund
Toni Kroos yatangaje ko azasezera gukina ruhago nyuma ya EURO ya 2024 izasozwa ku wa 14 Nyakanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .