Rayon Sports yemeje Umunya-Mexique Espinoza nk’Umutoza Mukuru

Yanditswe na Umwali Zhuri
Kuya 21 Nzeri 2019 saa 12:28
Yasuwe :
0 0

Mu buryo butunguranye, Rayon Sports yemeje Javier Martinez Espinoza ukomoka muri Mexique nk’Umutoza Mukuru mu gihe byavugwaga ko iyi kipe yambara ubururu n’umweru iza guha akazi Jean François Losciuto wigeze kuyitoza.

Ibinyujije ku rukuta rwayo rwa Twitter, Rayon Sports yavuze ko “yishimiye gutangaza ko Javier Martinez Espinoza ariwe mutoza mushya wa Gikundiro’.

Espinoza uje gusimbura Umunya-Brésil Robertinho, yahawe amasezerano y’umwaka umwe muri iyi kipe yatwaye igikombe cya Shampiyona mu mwaka ushize w’imikino.

Umukino we wa mbere w’irushanwa kuri uyu mutoza mushya, ni uwo azahuramo na AS Kigali kuri FERWAFA Super Cup izakinirwa tariki ya 1 Ukwakira kuri Stade Amahoro.

Nyuma y’iminsi ine, Rayon Sports izahura na Gasogi United mu mukino w’umunsi wa mbere wa Shampiyona uzabera kuri Stade ya Kigali tariki ya 5 Ukwakira saa 15:00.

Uyu mugabo w’imyaka 47 ukomoka muri Mexique si mushya mu mupira wo muri Afurika y’Uburasirazuba kuko yatoje Vipers yo muri Uganda mu mwaka ushize, ayivamo mu mpera zawo yirukanywe. Icyo gihe yari amaze iminsi 143 mu kazi.

Kwirukanwa muri Vipers ntibyari biturutse ahanini ku musaruro muke kuko mu mikino 11 ya shampiyona yari amaze gutoza, nta n’umwe yatsinzwe, ahubwo byaturutse ku yindi myitwarire.

Bivugwa ko kuva ku wa 16 Kanama 2018 ubwo yerekanwaga asimbuye Miguel Da Costa, imyitwarire ye yabaye ikibazo gikomeye ku ikipe.

Ngo nta na rimwe yigeze yumvira cyangwa ngo yubahe abo bakoranaga mu gutoza iyi kipe kuko yumvaga ko nta na kimwe bakongera ku mikinire ye.

Ikindi kandi ni uko ngo yakundaga kudakinisha abakinnyi bamwe na bamwe ku mpamvu zitazwi, bituma abari bamaze igihe kinini muri iyi kipe batangira kumwinuba.

Ubwo uyu mutoza yerekanwaga nk'umutoza wa Vipers yo muri Uganda
Espinoza yanenzwe imyitwarire bituma yirukanwa
Espinoza yahoze atoza Vipers yo muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza