00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yatsinze AS Kigali mu mukino w’ikirarane mbere yo kwerekeza i Musanze (Amafoto)

Yanditswe na Ntare Julius
Kuya 24 Ugushyingo 2022 saa 06:45
Yasuwe :

Rayon Sports yatsinze AS Kigali igitego 1-0, mu mukino w’ikirarane cy’umunsi wa gatanu, wakinwe kuri uyu wa Kane tariki 24 Ugushyingo 2022 kuri Stade ya Kigali.

Ni umukino Rayon Sports yinjiyemo nyuma y’imikino ibiri idatsinda, mu gihe AS Kigali yaherukaga kunyagira Rwamagana City ibitego 4-0.

Rayon Sports yatanze AS Kigali kwinjira mu mukino ibintu byatumaga ibona uburyo bwinshi bw’ibitego mu minota ya mbere y’umukino.

Bidatinze ku munota wa karindwi Musa Esenu yatsinze igitego cya mbere ku mupira Ganijuru Elie yahinduye imbere y’izamu Esenu ashyiraho umutwe, Ntwari Fiacre ntiyamenya aho umupira unyuze.

Mu minota 20 Rayon Sports yahise ituza umukino ugabanya umuvuduko ari na ko wakinirwaga cyane hagati mu kibuga. Ku munota wa 22 Mugheni Fabrice yatakaje umupira Ndekwe Felix ahita atera ishoti rikomeye ariko umuzamu Ntwari awufata neza.

Rayon Sports yakomeje kurusha As Kigali bigaragara, ku munota wa 30 Mucyo Didier Junior yacometse umupira imbere y’izamu ariko Esenu ntiyawushyikira ngo atsinde igitego cya kabiri.

As Kigali yatangiye kwibona mu mukino ariko uburyo yageregezaga ab’inyuma ba Rayon Sports nka Ndizeye Samuel na Mitima Issac bakabyitwaramo neza.

Mbere y’uko igice cya mbere kirangira Onana yazamukanye umupira wenyine asigaranye n’umuzamu Ntwari ariko Kwitonda Ally amukura umupira ku kirenge abari muri Stade ya Kigali basigara bibaza uburyo uyu musore adatsinze icyo gitego.

Igice cya mbere cyarangiye Rayon Sports itsinze AS Kigali igitego 1-0 cya Mussa Esenu cyabonetse hakiri kare ku munota wa karindwi.

AS Kigali yatangiranye imbaraga igice cya kabiri ishaka kwishyura igitego hakiri kare, ku munota wa 47 Hussein Tchabalala yateye ishoti rikomeye cyane ariko umuzamu Ramadhan Kabuiri awushyira muri koruneri.

Ku munota wa 58 Paul Were yacenze ikipe yose maze acomekera umupira mwiza cyane Willy Onana ariko umupira abura icyo awumaza bigaragara ko yatekereje byinshi igitego arakirata.

Rayon Sports yari hejuru muri iyo minota yongeye guhusha igitego ku mupira wahinduye imbere y’izamu na Iraguha Hadji ariko Bishira Latif umupira awushyira muri koruneri.

Ku munota wa 66 Nyarugabo Moise yahinduye umupira imbere y’izamu ariko habura urangiriza mu izamu. Tuyisenge Jacques yahise asimbura Rugirayabo Hassan, Niyonzima Olivier Seuf asimbura Djuma Lawrence.

Ndekwe Felix yazamukanye umupira neza awuhereza Ganijuru ahindura umupira imbere y’izamu ariko Esenu awuteye n’umutwe umupira ujya hejuru y’izamu.

Mu minota 70 umukino washyushye umupira uva ku izamu rimwe ujya ku rindi, ariko AS Kigali yakomezaga guhusha ibitego ubona ko impinduka umutoza Cassa Mbungo yakoraga zari zitangiye gutanga umusaruro.

Ku munota wa 78 Muvandimwe Jean Marie Vianney yasimbuye Ganijuru Elie wari umaze kugira ikibazo, mu gihe Nishimwe Blaise yasimbuye Iraguha Hadji.

Ndekwe Felix yahawe ikarita ya kabiri y’umuhondo nyuma yo gusifurwa ko yaraririye akitotomba ku musifuzi.

AS Kigali yakomeje gusatira bikomeye ariko igitego kiranga kirabura,umukino urangira Rayon Sports itsinze AS Kigali igitego 1-0 cya Musa Esenu.

Uyu mukino w’ikirarane watumye Rayon Sports ihita iyobora urutonde rwa shampiyona by’agateganyo n’amanota 22, AS Kigali yagumye ku mwanya wa kane n’amanota 17.

Ku munsi wa 11 wa Shampiyona Rayon Sports izasura Musanze FC ku Cyumweru tariki 27 Ugushyingo saa 15:00, mu gihe AS Kigali izakina na Marine kuwa Mbere tariki 28 Ugushyingo kuri Stade Umuganda mu Karere ka Rubavu.

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .