Rayon Sports yaherekejwe na Polisi nyuma yo gukura intsinzi i Huye (Amafoto)

Yanditswe na Eric Tony Ukurikiyimfura
Kuya 13 Ukwakira 2019 saa 09:49
Yasuwe :
0 0

Ikipe ya Rayon Sports yaraye igarutse mu Mujyi wa Kigali iherekejwe na Polisi y’igihugu ishinzwe umutekano wo mu muhanda mu rwego rwo gushimangira gahunda ya ‘Gerayo amahoro’.

Tariki ya 5 Ukwakira ni bwo Polisi y’u Rwanda n’Ishyirahamwe ry’umupira w’amaguru mu Rwanda (Ferwafa), batangije ubufatanye bugamije gukwirakwiza ubutumwa bwo kubungabunga umutekano wo mu muhanda.

Binyuze muri ubu bufatanye, abakunzi b’umupira w’amaguru kuri stade zitandukanye bagezwaho ubutumwa bwo kwirinda impanuka zo mu muhanda.

Rayon Sports yaraye yikuye kuri Stade ya Huye, ihatsindira Espoir FC ibitego 2-1 mu mukino w’umunsi wa gatatu wa shampiyona wabaye kuri uyu wa Gatandatu, aho ubutumwa nk’ubu bwatanzwe mbere y’uko umukino utangira.

Espoir FC yakirira kuri Stade Huye nyuma y’uko ikibuga cyayo cy’i Rusizi cyanzwe n’Ishyirahamwe ry’Umupira w’Amaguru mu Rwanda (FERWAFA).

Iyi kipe yo mu Burengerazuba yafunguye amazamu ku munota wa 21 ku gitego cyatsinzwe na Kyambadde Fred kuri penaliti, ni nyuma y’ikosa ryari rikozwe na kapiteni wa Rayon Sports, Rutanga Eric mu rubuga rw’amahina.

Rayon Sports yishyuriwe na myugariro Iragire Saidi watsindishije umutwe ku mupira wa koruneri yatewe na Iranzi Jean Claude ku munota wa 32.

Habura iminota 13 ngo umukino urangire, Rayon Sports yabonye igitego cyatsinzwe na kapiteni Rutanga Eric kuri penaliti.

Ubwo Rayon Sports yagarukaga i Kigali, yaherekejwe na Polisi y’u Rwanda kuva i Huye, abapolisi bari mu bice by’Amajyepfo (Huye- Nyanza na Muhanga) bagiye bayiherekeza kugeza mu Mujyi wa Kigali.

Rayon Sports ifite amanota arindwi mu mikino itatu, izagaruka mu kibuga ku wa 22 Ukwakira 2019, yakira Bugesera FC mu mukino w’umunsi wa kane wa Shampiyona.

Umunyezamu wa Rayon Sports, Kimenyi afashe icyapa cya 'Gerayo amahoro' gishishikariza abantu kuzirikana umutekano wo mu muhanda
Kapiteni wa Espoir FC na we yari afite icyapa nk'iki kuri uyu mukino w'umunsi wa gatatu wa shampiyona
Polisi y'igihugu yaherekeje Rayon Sports ubwo yavaga i Huye kuri uyu wa Gatandatu
Mu ntangiriro z'uku kwezi, Polisi na Ferwafa binjiye mu bufatanye bwo kubungabunga umutekano wo mu muhanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza