Kuri uyu wa Gatandatu, tariki ya 14 Werurwe 2026, ni bwo ku kibuga cyo mu Nzove aho Rayon Sports isanzwe yakirira imikino yayo, habereye uyu mukino w’amakipe y’amakeba.

Rayon Sports nk’ikipe yari iwayo yinjiye mu mukino mbere, ndetse ku munota wa munani Gikundiro Scholastique ahusha igitego ku ishoti rikomeye yateye ariko rica hejuru y’izamu gato.

APR WFC yinjiye mu mukino mu minota 20, itangira guhanahana neza ica mu kibuga hagati ishaka uko isatira Rayon Sports WFC, ibona uburyo bwiza bwa mbere ku 32 ku ishoti ryari ritewe na Uwase Fatinah ariko Ndakimana Angeline wari mu izamu rya Gikundiro awukuramo.

Rayon Sports yari ifite abafana batari bake, yafunguye amazamu ku munota wa 43. Ni igitego cyashyizwemo na Nahimana Nasra wateye ishoti asobya mu izamu, nyuma y’uko Ukwikunda Jeannette yari agihushije ari imbere y’izamu.

Igice cya kabiri APR WFC yashatse kwishyura, yotsa igitutu Rayon Sports WFC yari yasubiye inyuma, ari na ko abatoza b’iyi kipe yari iwayo itemeranyaga n’ibyemezo by’abasifuzi.

Ibi byavuyemo amakarita arimo iy’umuhondo yeretswe Umutoza wayo, Rwaka Claude, ndetse n’indi y’umutuku yahawe Umutoza wungirije, Fleury Iquel Rudasingwa.

Umunyezamu wa APR WFC, Maombi Joana, yakomeje kugora Rayon Sports kuramo imipira yose ikomeye, ariko ku munota wa 82 Ntakobanjila Nelly Salama wa Rayon Sports amutsinda icya kabiri.

Ni igitego cyavuye ku makosa ya ba myugariro ba APR WFC, bahaye umwanya Umwaliwase Dudja, yinjira mu rubuga rw’amahina kugeza atanze umupira kuri Ntakobanjila.

Gikundiro yakomeje kuyobora Shampiyona n’amanota 48, irusha amanota atatu Police WFC izahura na Indahangarwa WFC ku Cyumweru, tariki ya 15 Werurwe 2026.

Ukwikunda Jeannette agerageza gusatira APR WFC

APR WFC yananiwe gutsinda iguma ku mwanya wa kane

APR WFC yatsinzwe na mukeba

Gikundiro Scholastique wa Rayon Sports WFC ahanganiye umupira na Uwase Fatinah wa APR WFC

Ihirwe Regine yahuye na APR WFC yahoze akinira

APR WFC yatsinzwe ibitego 2-0

APR WFC yagerageje kwishyura ariko biranga

Ukwikunda Jeannette wa Rayon Sports WFC ari gushaka uko atanga umupira

Mutoni Jeannette wa APR WFC ari kwihutana umupira

Ukwishaka Zawadi wa APR WFC aryamye hasi nyuma yo kwamburwa umupira na Odette Coralie Nguema wa Rayon Sports

Odette Coralie Ngwema wa Rayon Sports WFC ashaka kwambura umupira umukinnyi wa APR FC

Rayon Sports WFC na APR FC ni amakipe akunze guhangana muri Shampiyona

Rayon Sports WFC yakomeje kuyobora Shampiyona y'u Rwanda y'Abagore

Abafana ba APR FC bari benshi mu Nzove

Ndakimana Angeline ari gutanga umupira kuri bagenzi be

Rwaka Claude utoza Rayon Sports WFC yakuye amanota atatu kuri APR WFC

Amafoto: Umwari Sandrine