Tariki ya 25 Nzeli 2015, Police FC ifite Igikombe cy’Amahoro izakira APR FC ifite icya shampiyona ku munsi wa gatatu wa shampiyona. Mu 2014-2015 banganyije imikino yombi (0-0 na 2-2).
Ngomirakiza Hegman yavuye muri APR FC asinya imyaka ibiri muri Police FC naho Turatsinze Hertier yari yaratije muri Police FC asinyamo imyaka ibiri.
Gusa Police FC yatwaye Igikombe cy’Amahoro isezereye APR FC muri ½ cy’irangiza kimwe n’ubwo yatwaraga igikombe cy’Agaciro.
Nyuma y’iminsi ibiri ya shampiyona, iyi kipe ya gisirikare izahura na mukeba, Rayon Sports kuri stade Amahoro tariki ya 24 Ukwakira 2015. Umwaka ushize bayitsinze imikino yombi, uheruka banyagiye Rayon Sports 4-0.
APR FC yakuye muri Rayon Sports Bizimana Djihad na Usengimana Faustin wari visi kapiteni.
Mu gihe hasigaye iminsi 10 shampiyona igatangira, Rayon Sports izatangirira shampiyona i Rubavu bakina na Marines, ntirabona umutoza. Umutoza wungirije Habimana Sosthene niwe uri kuyobora imyitozo.
Na APR FC izatangirira i Rubavu bakina na Etincelles yari yamanutse mu cyiciro cya kabiri, ikagarurwa n’uko umuterankunga wa shampiyona yasabye ko yakinwa n’amakipe 16.
Bugesera FC yazamutse mu cyiciro cya kabiri itozwa na Bizimungu Ali izakira Kiyovu Sports yahoze atoza naho Mukura VS yakire Police FC kuri stade ya Muhanga.
Iyi shampiyona izahagarikwa hagati ya tariki ya 5-15 Ukwakira ikipe y’igihugu ikine imikino ya gicuti, 9-20 Ugushyingo 2015 ikine na Libya amajonjora y’igikombe cy’Isi ndetse no kuva tariki ya 25 Ugushyingo – 10 Ukuboza 2015 bitabira CECAFA y’ibihugu izabera muri Ethiopia.
Shampiyona izasubukurwa, tariki ya 11 Ukuboza, ikinwe iminsi itatu mbere y’uko ikipe y’igihugu itangira umwiherero w’igikombe cy’Afurika cy’abakina imbere mu gihugu, CHAN, kizabera mu Rwanda kuva tariki ya 16 Mutarama – 7 Gashyantare 2016.
Umukino wa 120 usoza imikino ibanza ya shampiyona ku munsi wa 15 uzahuza AS Kigali na APR FC kuri stade ya Kigali tariki ya 21 Gashyantare 2016, imikino yo kwishyura ikinwe tariki ya 16 Werurwe isozwe 15 Gicurasi 2016.
Gahunda ya shampiyona 2015-2016, umunsi wa mbere
Tariki ya 18 Nzeli 2015
Bugesera FC vs Kiyovu Sports i Nyamata
Mukura VS vs Police FC – stade ya Muhanga
Tariki ya 19 Nzeli 2015
AS Muhanga vs Espoir FC – stade ya Muhanga
Etincelles FC vs APR FC kuri Tam Tam
Gicumbi FC vs Amagaju FC i Gicumbi
Tariki ya 20 Nzeli 2015
AS Kigali vs Rwamagana City FC ku Mumena
Sunrise FC vs Musanze FC i Rwamagana
Marines FC vs Rayon Sports kuri Tam Tam
TANGA IGITEKEREZO