Rayon Sports iri mu biganiro na Qatar Airways

Yanditswe na Ngabo Roben
Kuya 14 Ukwakira 2018 saa 10:56
Yasuwe :
0 0

Inama y’inteko rusange ya Rayon Sports yemeje ingengo y’imari ya miliyoni 700 Frw izakoreshwa mu mwaka w’imikino wa 2018-19, azava mu bafatanyabikorwa bashobora kwiyongeraho ikigo gitwara abantu n’indege, Qatar Airways, mu cyumweru gitaha.

Umuyobozi wa Rayon Sports Paul Muvunyi yabwiye abayitabiriye ko mu kwitegura umwaka utaha w’imikino uzatangira mu mpera z’icyumweru gitaha, bongereye ingengo y’imari ikava kuri miliyoni 450 Frw bakoresheje mu mwaka ushize, bakazakoresha miliyoni 700 Frw.

Ati “Amafaranga azava mu bafatanyabikorwa bacu, tuzayinjiza ku bibuga mu mikino tuzakira dukurikije ayo twari twinjije mu mwaka w’imikino ushize (arenga miliyoni 300 Frw), hari n’andi yasigaye muri CAF tugomba guhabwa mu minsi ya vuba, naho andi azava mu matsinda y’abakunzi ba Rayon Sports bahora biteguye kwitanga.”

Yashimangiye ko bashobora gutangira shampiyona nshya babonye undi mufatanyabikorwa, kompanyi y’Abarabu itwara abantu mu ndege, Qatar Airways, bari mu biganiro biganisha ku masezerano hagati y’impande zombi.

Inteko rusange ya Rayon Sports yabaye kuri uyu wa Gatandatu muri Mattina Hotel mu Mujyi wa Kigali, yatumiwemo abantu batatu bahagarariye amatsinda y’abafana 33 yemewe y’iyi kipe, abayobozi bayo n’abajyanama barimo abayiyoboye mu myaka ishize.

Banarebeye hamwe uko iyi kipe yitwaye mu marushanwa yitabiriye arimo shampiyona y’u Rwanda, Igikombe cy’Amahoro, CAF Champions League na CAF Confederations Cup.

Abanyamuryango bishimiye uko ikipe yitwaye mu marushanwa mpuzamahanga kuko yakoze amateka yo kugera muri ¼ cya CAF Confederations Cup 2018, ariko ngo imbere mu gihugu ntabwo byagenze neza.

Muvunyi yakomeje agira ati “Umusaruro w’imbere mu rugo ntabwo wagenze neza kuko twari dukurikiye byinshi tugira bimwe biducika, ariko tugomba gutahiriza umugozi umwe kuko shampiyona y’u Rwanda n’Igikombe cy’Amahoro ubu niyo ntego yacu ya mbere kuko ntituzanasohoka.”

Amasezerano ya Qatar Airways niyemezwa, aziyongera ku ruganda rukora ibinyobwa bisembuye n’ibidasembuye mu Rwanda, Skol, rusanzwe ari umuterankunga mukuru wa Rayon Sports.

Iyi kipe yarangije umwaka ushize wa shampiyona ku mwanya wa gatatu, izatangira utaha ku wa Gatandatu tariki 20 Ukwakira 2018 ikina umukino ufungura shampiyona na Etincelles FC, kuri Stade Umuganda mu Karere Rubavu.

Rayon Sports yinjije miliyoni zirenga 300Frw ku bibuga mu mikino yakiriye mu mwaka ushize w'imikino
Paul Muvunyi uyobora Rayon Sports yavuze ko izakoresha ingengo y'imari ya miliyoni 700 Frw
Abayobozi ba Rayon Sports bijeje abafana kwegukana igikombe cya shampiyona n'igikombe cy'amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza