Ibitego bya Abdelilah Hafidi watsinze igitego cya mbere ku ishoti rikomeye ryo muri metero nka 20 mu gice cya mbere, n’ikindi cyatsinzwe na kapiteni Badr Benoun ku munota wa 65, byahaye itsinzi Raja Casablanca.

Igitego cya kabiri cy’iyi kipe yo muri Maroc, cyabonetse nyuma y’uko Espérance de Tunis yari imaze kwishyurirwa na Mohamed Youcef Belaili ku munota wa 57 w’umukino, ayigarura mu mukino n’ubwo itashoboye kwihagararaho mu minota yari isigaye.

CAF Super Cup ni igikombe gitahatanirwa buri mwaka, aho umukino uhuza ikipe yegukanye CAF Champions League n’iyatwaye CAF Confederation Cup.

Iyi ntsinzi yahaye Raja Casablanca igikombe yaherukaga mu myaka 19 ishize, yabaye nko kwihimura ku ruhande rw’umutoza Patrice Carteron, watsinzwe na Espérance ubwo yatozaga Al Ahly ku mukino wa nyuma wa Champions League mu Ugushyingo, bagatakaza igikombe, byamuviriyemo kwirukanwa.

Ni ku nshuro ya mbere iki gikombe gikiniwe hanze y’umugabane wa Afurika, aho cyabereye muri Qatar, igihugu kizakira imikino ya nyuma y’igikombe cy’Isi mu 2022. Uyu mukino warebwe n’abafana 18,378.

Abakinnyi babanje mu kibuga ku ruhande rwa Raja Casablanca

Abakinnyi babanjemo ku ruhande rwa Espérance de Tunis

CAF Super ihuza uwatwaye Champions League n'uwatwaye Confederation Cup ni ubwa mbere ibereye hanze y'umugabane wa Afurika

Raja Casablanca yegukanye CAF Super Cup yaherukaga mu myaka 19 ishize

Patrice Carteron yihimuye kuri Espérance de Tunis yatumye yirukanwa muri Al Ahly

Byari ibyishimo ku bafana b'iyi kipe yo muri Maroc