Paris Saint-Germain yakiriye Borussia Dortmund mu mukino wo kwishyura wa ½ cya UEFA Champions League, wabaye mu ijoro ryo ku wa Kabiri, tariki ya 7 Gicurasi 2024, saa Tatu z’ijoro kuri Parc des Princes.

Iyi kipe yo mu Bufaransa yakiriye uyu mukino isabwa gutsinda kuko yatakaje ubanza wabereye mu Budage ku gitego 1-0 cyinjijwe na Niclas Fullkrug mu gice cya mbere.

PSG nk’ikipe yari inyuma ku kinyuranyo yatangiranye amashagaga yo gushaka uko yishyura hakiri kare yifashije uruhande rw’iburyo rwakinagaho Achraf Hakimi na Ousmane Dembélé.

Nubwo aba bombi bageragezaga gukinana no kohereza imipira mu rubuga rw’amahina yasangaga rutahizamu wa PSG, Gonçalo Ramos, atarawinjiramo neza.

Ku munota wa 10 ni bwo Borussia Dortmund yinjiye mu mukino ndetse ikaba yashoboraga no kubona amazamu ku makosa yakozwe na ba myugariro ba PSG bigatuma Karim Adeyemi ashaka kuwutera nubwo byarangiye Gianluigi Donnarumma awumutanze akawushyira muri koruneri.

Iyi kipe kandi yongeye kubona andi mahirwe ku munota wa 19 ubwo Julian Ryerson yatereraga mu rubuga rw’amahina ishoti rikomeye ariko ntiyaboneza mu rucundura aritera hejuru cyane y’izamu.

Kylian Mbappé na Warren Zaïre-Emery bakinanye neza ku munota wa 30 ndetse babasha no kugeza umura imbere y’izamu ryari ririnzwe na Gregor Kobel ariko bahereje Ousmane Dembélé ngo atere mu izamu arawamurura.

Karim Adeyemi yagerageje kwirukankana umupira ku munota wa 37 asiga Marquinhos na Hakimi ndetse anatera mu izamu ariko Gianluigi Donnarumma awukuramo.

Igitego cya mbere muri uyu mukino yatsinzwe na Mats Hummels wa Borussia Dortmund ku mupira wavuye muri koruneri yatewe na Julian Brandt ku munota wa 50 w’umukino.

Mu minota 60 ni bwo PSG yasatiranye imbaraga ndetse iza no kugira amahirwe make ku mupira watewe mu izamu na Nuno Mendes ari inyuma y’urubuga rw’amahina ugakubita igiti cy’izamu.

Iyi kipe yo mu mujyi wa Paris yakorewe ikosa kuri Dembele wari hafi y’umurongo w’urubuga rw’amahina, ashaka gusaba penaliti ariko umusifuzi Daniele Orsato avuga ko atari yakarugezemo.

Umutoza Mukuru wa PSG, Luis Enrique yakoze impinduka akuramo Fabián Ruiz na Gonçalo Ramos ashyiramo Marco Asensio na Bradley Barcola.

Ni mu gihe mugenzi we wa Borussia Dortmund, Edin Terzić, yakuyemo Jadon Sancho agashyiramo Niklas Süle.

Mats Hummels yatsinze ikindi gitego cya Borussia Dortmund ku munota wa 77 ariko umusifuzi wo ku ruhande yari yamaze kubona neza ko yakiriye umupira yaraririye.

Kylian Mbappé yahushije igitego ku munota wa 85 ubwo yageragezaga gushyira umupira mu izamu ariko ugafata umutambiko w’izamu.

Nyuma y’iminota ibiri gusa na Vitinha yagerageje irindi shoti rikomeye rigana ku izamu ari inyuma y’urubuga rw’amahina ariko naryo rifata umutambiko w’izamu.

Inshuro zose PSG yagerageje kubona igitego ntiyigeze ikibona kugeza umukino wongeweho iminota ine warangiye Borussia Dortmund ibonye intsinzi y’igiteranyo cy’ibitego 2-0 mu mikino yombi.

Nyuma y’imyaka 11 Borussia Dortmund yongeye kugera ku mukino wa nyuma wa UEFA Champions League yigeze gutwara mu 1997.

Undi mukino wo gushaka itike y’umukino wa nyuma wa UEFA Champions League uteganyijwe ku wa Gatatu aho Real Madrid izakira Bayern Munich zanganyije ibitego 2-2 mu mukino ubanza.

Abakinnyi 11 PSG yabanje mu kibuga

Abafana ba PSG bari bakereye kuyishyigikira ariko itaha amara masa

Stade ya Parc des Princes yari yuzuye abafana ba Paris Saint-Germain ariko inanirwa kubaha ibyishimo

Paris Saint-Germain yananiwe kwikura imbere ya Borussia Dortmund

Jadon Sancho ari mu bakinnyi bifashishijwe na Borussia Dortmund ikuramo PSG

Umunyezamu wa Borussia Dortmund, Gregor Kobel, yishimye bikomeye amaze gufatanya n'ikipe ye kugera ku mukino wa nyuma

Abakinnyi ba Borussia Dortmund bishimira intsinzi

Borussia Dortmund yabonye itike yo gukina umukino wa nyuma wa UEFA Champions League yaherukaga mu 2013

Abakinnyi 11 Borussia Dortmund yabanje mu kibuga