Uyu mukino wabereye kuri Kigali Pelé Stadium ku mugoroba wo ku wa Gatandatu, tariki ya 3 Gicurasi 2025.

Ni umukino wabonaga amakipe yoroheje yahaye umwanya abakinnyi badakunze kubona umwanya wo gukina.

Police FC yawutangiye neza kuko ku munota wa 11, Kirongozi Richard yazamukanye umupira yihuta, atsinda igitego cya mbere.

Mu minota 25, umukino watangiye gushyuha ari nako Mukura ikomeza gusatirwa cyane.

Ku munota wa 33, Police yahushije igitego cyabazwe ku mupira wahinduwe imbere y’izamu na Iradukunda Simeon, Kirongozi awusubije inyuma kwa Henry Msanga, ateye umupira abakinnyi ba Mukura baryama mu izamu bawukuramo.

Muri iki gice, Mukura yari yibuze kuko no kugera imbere y’izamu rya Niyongira Patience byari ikibazo gikomeye.

Igice cya mbere cyarangiye Police FC yatsinze Mukura ibitego 1-0.

Mukura VS yatangiranye igice cya kabiri impinduka, Jordan Dimbumba, Boateng Mensah, Sunzu Bonheur na Niyonzima Eric binjira mu kibuga.

Iyi kipe y’i Huye yatangiye gusatira bikomeye mu minota 60 ariko umunyezamu Niyongira akabyitwaramo neza.

Mu minota 75, Police FC yongeye gusatira cyane ishaka igitego cya kabiri ariko abarimo Mugisha Didier na Ani Elijah bagapfusha ubusa uburyo bw’ibitego babonaga.

Ku munota wa 80, Boateng Mensah yakiniwe nabi na David Chimezie mu rubuga rw’amahina, umusifuzi Nsabimana Celestin atanga penaliti.

Sunzu yayiteye mu ruhande rw’iburyo, umunyezamu Niyongira Patience umupira awukuramo neza.

Ku munota wa 90, Mensah yahinduye umupira imbere y’izamu, Jordan Dimbumba atsinda igitego ariko umusifuzi Umutesi Alice avuga ko yaraririye bityo kirangwa.

Umukino warangiye Police FC yatsinze Mukura VS igitego 1-0 yegukana umwanya wa gatatu w’Igikombe cy’Amahoro cya 2025, ihabwa miliyoni 3 Frw.

Umukino wa nyuma uteganyijwe ku Cyumweru, tariki ya 4 Gicurasi 2025 saa 16:30 kuri Stade Amahoro.

Uyu mukino uzabanzirizwa n’uwa Rayon Sports WFC na Indahangarwa WFC uzakinwa saa 12:30.

Kirongozi acenga myugariro wa Mukura

Kirongozi yongeye kwigaragaza muri uyu mukino

Kirongozi yishimiye igitego yatsinze muri ubwo buryo

Kirongozi yishimiye igitego yipfuka mu maso

Abakinnyi ba Police FC bishimira igitego

Umutoza wa Police FC, Mashami Vincent mbere y'umukino

Umutoza wa Mukura VS, Afhamia Lofti akurikiye umukino

Achiraf Mandela yari yongeye kubona umwanya wo gukina

Perezida wa FERWAFA, Munyantwali Alphonse, yavuye mu Nteko Rusange Idasanzwe yitabira uyu mukino

Boateng Mensah yinjiye mu kibuga Mukura itangira gusatira cyane

Umunyezamu wa Police FC, Niyongira Patience, akuramo penaliti ya Sunzu Bonheur

Umunyezamu Niyongira azwiho gukuramo penaliti cyane

Umutoza wa Mukura VS, Afhamia Lofti yagaragazaga kutishimira imisifurire

Boateng Mensah akankamira umusifuzi Umutesi Alice nyuma yo kwanga igitego cya Mukuru ku munota wa nyuma

Abakinnyi ba Mukura ntibemeranyaga n'icyemezo cy'umusifuzi Umutesi Alice

Byabaye ngombwa ko umusifuzi Nsabimana Celestin ajya guturisha abakinnyi ba Mukura

Amafoto: Umwari Sandrine