Perezida wa CAF yavuze kuri ruswa, itoteza rishingiye ku gitsina no kwikubira akazi ashinjwa

Yanditswe na Eric Tony Ukurikiyimfura
Kuya 23 Mata 2019 saa 11:50
Yasuwe :
0 0

Nyuma yo kwirukanwa ku mwanya w’Umunyamabanga Mukuru w’Impuzamashyirahamwe y’Umupira w’Amaguru muri Afurika, CAF, Amr Fahmy yashinje Perezida wayo, Ahmad Ahmad ruswa, gufata ibyemezo ku giti cye n’ihohotera rishingiye ku gitsina, ariko uyu muyobozi abihakana yivuye inyuma.

Umunsi umwe mbere y’uko haba tombola y’Igikombe cya Afurika cya 2019, Komite Nyobozi ya CAF yirukanye uwari umunyamabanga wayo, Amr Fahmy, imusimbuza Umunya-Maroc Mouad Hajji.

Tombola ya CAN 2019 izakinirwa mu Misiri hagati ya tariki ya 21 Kamena n’iya 19 Nyakanga 2019, yabereye mu nyubako iherereye kuri Pyramid ya Giza ku wa 12 Mata 2019.

Ibiro Ntaramakuru by’Abongereza Reuters byatangaje ko Fahmy yatanze ikirego mu Ishyirahamwe ry’Umupira w’Amaguru ku Isi (FIFA) ashinja Perezida wa CAF ruswa n’itoteza rishingiye ku gitsina yakoreye abakozi bane b’Abanya-Misirikazi bakorera ku cyicaro cya CAF i Cairo.

Mu byo Umunya-Misiri Fahmy ashinja Perezida wa CAF, harimo kudaha agaciro bagenzi be bakorana, aho ngo yafataga ibyemezo bimwe na bimwe ku giti cye; yavuze ko yategetswe n’uyu wari umuyobozi we gushyira kuri konti za banki z’abayobozi b’amashyirahamwe y’umupira w’amaguru amadolari ibihumbi 20.

Ibindi uyu mugabo w’imyaka 36 yatunzeho agatoki kuri Ahmad harimo kuba yarahagaritse ku giti cye amasezerano CAF yari ifitanye na Sosiyete y’Abadage ya Puma, agahitamo gukorana n’iy’Abafaransa ya Technical Steel ibarizwa mu gace ka La Seyne-sur-Mer mu Bufaransa, aho ngo byatwaye CAF amadolari agera ku bihumbi 830.

Fahmy yanavuze ko kandi Ahmad yaguze imodoka mu Misiri n’iwabo muri Madagascar, aho yanafunguye ibiro bye, bigatwara amadolari 400 yose avuye kuri konti ya CAF, nyamara izo modoka zari ize ku giti cye.

Umwe mu baganiriye na Jeune Afrique, yavuze ko uruhande rwa Perezida wa CAF, Ahmad Ahmad, rukeka ko itsinda ry’abashyigikiye Issa Hayatou yatsinze mu matora yo kuyobora iyi Mpuzamashyirahamwe mu 2017, ari ryo ribyihishe inyuma.

Amr Fahmy wari warakoze muri CAF hagati ya 2007 na 2015, nyuma yo kuhagaruka mu Ugushyingo 2017 avuye muri Lagardère Unlimited, ni umwuzukuru wa Mourad Fahmy akaba umuhungu wa Mustapha Fahmy, aba bombi babaye abanyamabanga ba CAF hagati ya 1961-1982 na 1982-2010.

Amr Fahmy yirukanywe na CAF ku mwanya w'Umunyamabanga Mukuru, atangira gushinja ubuyobozi bwayo ko bwamunzwe na ruswa

Yavuze ko hari ibyerekana impamvu bagomba guhuza cyane kuko “Mustapha yamaze imyaka 23 akorana n’uwahoze ari Perezida wa CAF Issa Hayatou na Amr kandi yakoranye n’uwo Munya-Cameroun mu gihe kingana n’imyaka umunani.’’

Yakomeje ati “Abo hafi ya Ahmad bakeka ko abagize itsinda ry’abashyigikiye Hayatou ko ari bo babiri inyuma. Nonese CAF yamwirukanye kubera ko yamenye ko hari ibyo azavuga cyangwa hari hashize igihe binuganugwa? Habayeho guhurirana n’igihe.”

Perezida Ahmad yahakanye ibimuvugwaho byose, avuga ko CAF yari yarafashe umwanzuro wo kwirukana Amr Fahmy mu mezi yashize, ariko abanza kumutegereza ngo amere neza kuko yari amaze iminsi arwaye.

Ati “Kuva muri CAF kwa Ahmy byasaga no kwivumbura. Icyemezo cyo gutandukana na we cyari kimaze amezi menshi gifashwe. Yari afite ibibazo by’ubuzima, turabanza turamutegereza. Hari byinshi twamubonyeho, tubona tutagumana na we. Ni icyemezo twafashe twaganiriyeho, si njye wagifashe, uwo muco ntawo ngira.”

Yakomeje avuga ko “Izo modoka avuga, twasanze gukodesha biduhenda, duhitamo kuzigura, nkeka ko Technical Steel izarega Fahmy, twe uburyo twakozemo amasezerano n’amafaranga yakoreshejwe na CAF byanyuze mu mucyo. Mbabazwa n’uko hari abantu badashaka ko twongera kubaka isura ya CAF.”

Ahmad Ahmad yahakanye ibyo gutoteza Abanya-Misirikazi aregwa, avuga ko ahubwo Amr Fahmy ari we wabwiye abo bakozi kuvuga ko bakorewe ihohoterwa rishingiye ku gitsina, bakabyanga.

Ati “Fahmy yashyize igitutu kuri abo bakozi b’Abanyamisirikazi ngo bavuge ko bakorewe ihohoterwa rishingiye ku gitsina, ibyo barabyanze.”

Umunya-Madagascar Ahmad Ahmad w’imyaka 59, ayobora CAF guhera muri Werurwe 2017, yafashe intebe y’ubuyobozi asimbuye Issa Hayatou wari umaze imyaka 29 ayobora iyi mpuzamashyirahamwe ya ruhago muri Afurika.

Perezida wa CAF, Ahmad Ahmad, yahakanye ibyo ashinjwa avuga ko ababazwa n'abadashaka ko Impuzamashyirahamwe y'Umupira w'Amaguru yongera kugira isura nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza