Ombolenga Fitina yerekeje muri CSKA Sofia yo muri Bulgarie

Yanditswe na Ngabo Roben
Kuya 30 Mutarama 2019 saa 09:59
Yasuwe :
0 0

Myugariro w’iburyo wari muri APR FC, Ombolenga Fitina, yamaze gutandukana nayo yerekeza ku mugabane w’i Burayi aho agiye gusinya amasezerano y’imyaka itatu muri CSKA Sofia, ikipe iri ku mwanya wa kabiri muri Bulgarie.

Mu ijoro ryo kuri uyu wa Kabiri tariki 29 Mutarama 2019, saa 19:15 nibwo Fitina yahagurutse ku Kibuga cy’Indege Mpuzamahanga cya Kigali i Kanombe, ajyana na Ethiopian Airlines yerekeza Istanbul muri Turikiya aho afatira indi ndege kuri uyu wa Gatatu ijya i Sofia muri Bulgarie.

Uyu myugariro yemereye IGIHE ko impande zose zamaze kumvikana igisigaye ari uko agerayo agasinya amasezerano.

Fitina Ombolenga yagize ati “Nari mfite amasezerano muri APR FC ariko ntabwo ari ikipe yambuza amahirwe yo kujya gukina ku rwego rwisumbuyeho.”

“Ushinzwe kunshakira isoko yari amaze iminsi avugana n’amakipe atandukanye ariko iyanshimye ikanemera gutanga ibyo twifuza ni CSKA Sofia. Ntabwo ari igeragezwa kuko amashusho yanjye barebye yari ahagije ngiye gusinya no gutangira akazi.”

Isoko ryo kugura no kugurisha abakinnyi mpuzamahanga muri Bulgarie rizafungura kuri uyu wa Gatanu tariki 1 Gashyantare 2019, rifungwe tariki 28 Gashyantare 2019 aho Ombolenga asabwa kuba yabonye ibyangombwa byose bimwemerera gukorera i Burayi.

Uyu myugariro wavutse tariki 20 Gicurasi 1996 agiye gusinyira ikipe ifite izina rikomeye muri Bulgarie no ku mugabane w’i Burayi.

Ni ikipe y’ingabo z’igihugu mu magambo arambuye yitwa ‘Sofia Central Sports Club of the Army’, yashinzwe muri Gicurasi 1948 n’ingabo zari zishoje urugamba mu ntambara ya kabiri y’Isi.

CSKA Sofia itozwa n’Umunya-Serbia, Nestor El Maestro. Niyo ya mbere ifite ibikombe bya shampiyona ya Bulgarie inshuro nyinshi, 31, inafite ibikombe by’igihugu 20.

Mu marushanwa mpuzamahanga ntabwo isiba muri UEFA Champions League cyangwa UEFA Europa League kuko ikunze kuza mu myanya ibiri ya mbere muri Bulgarie itanga itike y’aya marushanwa, aho kure yageze mu myaka ya vuba ari muri ¼ cya Europa League mu 2011.

Ombolenga Fitina yerekeje muri CSKA Sofia nyuma yo kunyura mu makipe atandukanye arimo Kiyovu Sports yakiniye mu byiciro bitandukanye kuva mu ngimbi mu 2009 kugera mu 2016 ubwo yayivagamo agiye muri MFK Topvar Topoľčany yo muri Slovakia ariko ntiyahirwa, ayikinira umwaka umwe agaruka mu Rwanda akinira APR FC kugera ubu.

Kimwe mu byamuhesheje aya mahirwe harimo no kwitwara neza mu Ikipe y’Igihugu y’u Rwanda Amavubi yakiniye kuva mu 2015 aho amaze kuyikinira imikino 22 irimo amarushanwa abiri akomeye, CHAN 2016 na 2018.

Ombolenga Fitina yafashe indege imwerekeza ku mugabane w'i Burayi
Fitina yazamukiye mu ikipe y'abana ya Kiyovu Sports, aha ni mu 2009
Yakiniye Kiyovu Sports kuva ari umwana w'imyaka itandatu kugera mu 2016
Uko yitwaye mu myaka ishize mu Amavubi biri mu bimugejeje muri CSKA Sofia
Yari amaze imyaka ibiri akina muri APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza