00:00:00 IGIHE NETWORK KN KINYARWANDA EN ENGLISH FR FRANCAIS

Olympiacos yegukanye Igikombe cya Europa Conference League

Yanditswe na IGIHE
Kuya 30 May 2024 saa 07:30
Yasuwe :

Igitego cyo mu minota 30 y’inyongera cyafashije Olympiacos gutsinda Fiorentina 1-0, yegukana Igikombe cya Europa Conference League ndetse iba ikipe ya mbere yo mu Bugereki yegukanye irushanwa ry’i Burayi.

Uyu mukino wa nyuma wabaye ku wa Gatatu, wari ku rwego rwo hejuru, ariko nta kipe yabashije kureba mu izamu ry’indi mu minota 90 isanzwe mbere y’uko Umunya-Maroc Ayoub El Kaabi atsinda igitego ku munota wa 116.

Ubwo byasaga n’aho amakipe yombi agiye kujya muri za penaliti, El Kaabi wari imbere y’izamu, yatsinze n’umutwe umupira wahinduwe na Santiago Hezze, ariko bisaba gutegereza kw’abakinnyi bagenzi be n’abafana kubera ko VAR yabanje kugaragaza ko nta kurarira kwabayeho.

Iki gitego cyabaye icya 11 cy’uyu Munya-Maroc muri Conference League y’uyu mwaka w’imikino, ndetse byose byabonetse mu mikino yo gukuranwamo. Ni icya 16 kandi mu marushanwa y’u Burayi aho ibindi yabitsinze mu matsinda no mu mikino yo gushaka itike ya Europa League.

Ayoub El Kaabi yatsinze ibitego bitanu mu mikino ibiri ubwo Olympiacos yasezereraga Aston Villa yo muri Premier League muri 1/2.

Igikombe iyi kipe yo mu Bugereki yegukanye kivuze byinshi ku mutoza José Luis Mendilibar wari watwaye Europa League ubwo yatozaga FC Seville mu mwaka ushize w’imikino, mbere yo kwerekeza muri Olympiacos muri Gashyantare.

Byari ibyishimo bikomeye ku bafana b’Abagereki bari muri AEK Arena ubwo umupira winjiraga mu izamu bwa mbere ndetse n’ubwo VAR yari imaze kugaragaza ko igitego cyemewe aho gutwara irushanwa byatumye ikipe yabo izakina Europa League mu mwaka w’imikino utaha.

Hanze ya stade, hari ibihumbi by’abafana ba Olympiacos bateraniye ku cyambu ndetse bishimye bidasanzwe ubwo umukino wari urangiye.

Olympiacos yabaye ikipe ya mbere yo mu Bugereki yegukanye igikombe cy’i Burayi mu gihe iyaherukaga kugera kure ari Panathinaikos yatsindiwe ku mukino wa nyuma wa European Cup na Ajax Amsterdam mu 1971.

Ni inshuro ya kabiri kandi yikurikiranya Ikipe ya Fiorentina yatsindiwe ku mukino wa nyuma wa Europa Conference League.

Ayoub El Kaabi atsinda igitego cyabonetse muri uyu mukino
Umutoza José Luis Mendilibar yegukanye ibikombe bibiri by'i Burayi mu myaka ibiri ikurikiranye
Abakinnyi ba Olympiacos bishimira intsinzi ubwo umukino wari urangiye
Ikipe ya Olympiacos yishimira Igikombe cya Europa Conference League yegukanye
Olympiacos yabaye ikipe ya mbere yo mu Bugereki yegukanye irushanwa ry'u Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .