00:00:00 IGIHE NETWORK KN KINYARWANDA EN ENGLISH FR FRANCAIS

Núñez yageze muri Liverpool, Tchouaméni yerekeza i Madrid: Agezweho ku isoko ry’igura n’igurisha i Burayi

Yanditswe na Muyisenge Jean Felix
Kuya 14 June 2022 saa 01:54
Yasuwe :

Kuva tariki ya 10 Kamena 2022, amakipe y’umupira w’amaguru i Burayi yatangiye kwiyubaka agura abakinnyi bazayafasha muri shampiyona n’imikino y’umwaka utaha.

Abafana b’aya makipe bahoza ijisho n’amatwi mu bitangazamakuru ngo bamenye buri umwe ikipe bihebeye abo zigura. Amakipe y’inkwakuzi akomeje kwitwara neza ku isoko mu gihe ayandi akomeje kurambagiza abeza yifuza.

Liverpool yasinyishije rutahizamu Darwin Núñez

Ikipe ya Benefica yo muri Portugal yagurishije rutahizamu wayo, Darwin Núñez muri Liverpool yo mu Bwongereza. Ni nyuma y’aho Liverpool yemeye gutanga akayabo ka miliyoni 75 z’amayero aziyongeraho izindi miliyoni 15 z’amayero bitewe n’uko umukinnyi azitwara.

Uyu Munya-Uruguay w’imyaka 22, yigaragaje umwaka ushize atsinda ibitego 34 mu mikino 41 akaba aje gusimbura rutahizamu ukomoka muri Sénégal, Sadio Mané uri mu nzira zisohoka yerekeza muri Bayern Munich yo mu Budage.

Darwin Núñez aje yiyongera kuri Fabio Carvalho, ikipe ya Liverpool yaguze muri Fullham. Liverpool kandi iracyari ku isoko aho iteganya kongeramo undi mukinnyi wo hagati nubwo yongereye amasezerano y’umwaka umwe James Milner.

Darwin Núñez yerekeje muri Liverpool avuye muri Benfica yo muri Portugal

Real Madrid yasinyishije Aurélien Tchouaméni

Ikipe ya Real Madrid yo muri Espagne yasinyishije umukinnyi wo hagati, Umufaransa Aurélien Tchouaméni, wakiniraga Monaco, imutangaho miliyoni 80 z’amayero ashobora kugera kuri miliyoni 100 bitewe n’uko azitwara.

Tchouaméni w’imyaka 22 yabaye umukinnyi wa kabiri usinyishijwe na Real Madrid nyuma ya Antonio Rudiger wagendeye ubuntu asoje amasezerano yari afitanye na Chelsea.

Aba bakinnyi bombi binjiye babisikana na Isco, Gareth Bale na Marcelo barekuwe na Real Madrid nyuma yo kurangiza amasezerano.

Aurélien Tchouaméni ni undi Mufaransa ugiye gukinira Real Madrid

Gabriel Jesus na Raheem Sterling mu muryango usohoka muri Manchester City

Nyuma yo kugura ba rutahizamu babiri Erling Haaland wavuye muri Borussia Dortmund na Julián Álvarez wakiniraga Club River Plate yo muri Argentine, Manchester City yiteguye kwemerera Raheem Sterling na Gabriel Jesus, gushakisha andi makipe kubera kubura umwanya uhagije wo gukina.

Byitezwe ko Gabriel Jesus azaguma mu Bwongereza aho amahirwe menshi ari ayo kwerekeza mu makipe y’i Londres hagati ya Arsenal na Chelsea. Mu gihe Sterling we ashakishwa n’amakipe atandukanye i Burayi harimo na Chelsea.

Manchester City irateganya kugura umukinnyi wo hagati uzasimbura Fernandinho wamaze gusezera muri iyi kipe, n’undi mukinnyi ukina yugarira ibumoso. Abahabwa amahirwe yo kwerekeza muri iyi kipe harimo Kalvin Phillips ukina hagati muri Leeds United na Marc Cucullera ukina yugarira mu Ikipe ya Brighton.

Rutahizamu Haaland yerekeje muri Manchester City avuye muri Borussia Dortmund
Gabriel Jesus ashobora gusohoka muri Manchester City

Ibiganiro bigeze kure hagati ya Dembele na Slonina berekeza muri Chelsea, Lukaku na Marcos Alonso mu nzira isohoka. Chelsea ikomeje gutakaza abakinnyi b’inkingi za mwamba nka Antonio Rudiger na Andreas Christensen uzajya muri FC Barcelone.

Si aba gusa bazasohoka kuko na rutahizamu wabo Romelu Lukaku ari gukora ibishoboka byose ngo asubire mu Ikipe ya Inter Milan nyuma y’umwaka umwe gusa avuyeyo atanzweho asaga miliyoni 115 z’amayero. Ibinyamakuru byo mu Butaliyani byemeza ko Inter Milan idafite amafaranga ahagije yo kugura uyu mukinnyi.

Mu biganiro iri kugirana na Chelsea harimo ko uyu mukinnyi w’imyaka 29 abanza gutizwa igihe cy’imyaka ibiri, ubundi Inter Milan ikazagenda yishyura gahoro gahoro.

Myugariro Marcos Alonso na we yamaze gutangariza ubuyobozi bwa Chelsea ko ashaka kwerekeza muri FC Barcelone, mu gihe Kapiteni we César Azpilicueta na we yamaze kumvikana amasezerano y’imyaka ibiri na Barcelone akaba ategereje kuganira na Chelsea ngo arebe ko yamwemerera kugenda.

Mu rwego rwo gusimbura aba bakinnyi Chelsea yamaze kumvikana na myugariro w’umufaransa ukinira FC Seville yo muri Espagne, Jules Koundé ngo ayerekezemo, igisigaye ni ukumvikana na yo ku giciro cy’uyu mukinnyi.

Ikinyamakuru Sport cyo muri Espagne cyatangaje ko Chelsea iri hafi kumvikana na rutahizamu w’Umufaransa ukinira FC Barcelone, Ousmane Dembele ngo yerekeze muri iyi kipe ku buntu nyuma y’uko amasezerano ye muri Barcelone ageze ku musozo. Chelsea kandi iracyashahisha abakinnyi bugarira na rutahizamu uzasimbura Lukaku.

Ikipe ya Chelsea iri no hafi yo kugura umuzamu w’ikipe ya Chicago Fire yo muri Amerika, Gabriel Slonina atanzweho miliyoni 10 z’amayero.

Uyu Munyamerika w’imyaka 18 yashakishijwe cyane n’amakipe akomeye i Burayi harimo na Real Madrid, gusa aho bigeze Chelsea ni yo ishobora kumwegukana.

Uyu muzamu byitezwe ko igihe yaba aguzwe azakomeza gutizwa muri Chicago Fire kugira ngo akomeza kuzamura urwego.

Dembele aravugwa muri Chelsea FC avuye muri FC Barcelone

Manchester United irashakishiriza hasi no hejuru Frenkie De Jong

Umutoza wa Manchester United, Erik Ten Hag, yamaze kugaragaza ko yifuza kuzana umukinnyi wo hagati ukina mu Ikipe ya Barcelone, Frenkie De Jong bigeze no gukorana ubwo uyu mutoza yari muri Ajax Amsterdam yo mu Buholandi.

Nubwo Barcelone yiteguye kumugurisha, uyu mukinnyi w’Umuholandi we aracyifuza kuhaguma cyane ko yagiye atangaza kenshi ko gukinira Barcelone ari inzozi ze kuva mu bwana. Ibiganiro hagati y’amakipe yombi birakomeje ndetse biratanga icyizere ko isaha iyo ari yo yose uyu mukinnyi yakerekeza i Manchester nk’uko Manchester Evening News ibitangaza.

Manchester United kandi ikomeje ibiganiro n’abakinnyi batandukannye biganjemo abo mu ikipe ya Ajax, Ten Hag yahoze atoza, nka myugariro w’imyaka 20 Julian Timber, na rutahizamu w’Umunye-Brésil, Anthony Matheus dos Santos.

PSG ku isoko ry’abatoza

Nyuma yo kwirukana Umuyobozi w’Ibikorwa bya Siporo, Leonardo agasimbuzwa Luis Campos uzajya ukora nk’umujyanama mu bya siporo, Paris Saint- Germain yamaze kumvikana n’umutoza wayo mukuru Mauricio Pochettino ngo batandukane.

Amakuru avuga ko Pochettino wari umaze amezi 18 muri iyi kipe ashobora gusimbuzwa Zinedine Zidane cyangwa Christophe Galtier utoza Nice, akaba yaranahesheje Ikipe ya Lille igikombe cya shampiyona mu 2021.

Louis Campos ni we wasimbuye Leonardo muri PSG

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .