Ku Cyumweru, tariki ya 23 Ugushyingo 2025, ni bwo kuri Kigali Pelé Stadium hazabera umukino w’Umunsi wa Munani wa Shampiyona y’u Rwanda uzahuza Rayon Sports na AS Kigali.

Mu myitozo itegura uyu mukino ya AS Kigali, Umutoza Mukuru wayo, Mbarushimana Shaban, yavuze ko ibibazo by’amikoro byari mu ikipe bagerageje kubikemura.

Ati “Ikipe imeze neza muri rusange, nta kibazo cyatubuza kwitegura Rayon Sports dufite. Mu mwaka habaho ibihe bibi, ariko icyo navuga ni uko ari igihe turi busohokemo.”

“Ntabwo ari byiza 100% kuko kuri iyi Si ni ko bigenda, ntiwabaho nta kibazo ufite, gusa iyo ntiyaba impamvu. Ukurikije aho tuvuye, si bibi cyane byatuma tugira umusaruro mubi. Kuba Rayon Sports yaratsinzwe umukino uheruka, ni nk’uko natwe turi habi, ni intare ebyiri zakomeretse.”

Umuyobozi w’Agateganyo wa AS Kigali, Dr. Rubagumya Emmanuel, yemeje ko nta kirarane na kimwe abakinnyi baberewemo, bityo biteguye gutsinda.

Yagize ati “Abakinnyi bacu nta kirarane na kimwe cy’umushahara tubafitiye. Barishyuwe yose kandi n’agahimazamushyi kari hejuru kugira ngo batsinde uyu mukino.”

AS Kigali iri ku mwanya wa 14 n’amanota atanu ku rutonde rw’agateganyo rwa Shampiyona y’u Rwanda, ikaba izahura na Rayon Sports ya kabiri n’amanota 13.

Mitima Isaac yahoze akinira Rayon Sports agiye kongera guhura na yo

AS Kigali iri ku mwanya wa 14 izahura na Rayon Sports iri ku mwanya wa kabiri

Umuyobozi w’Agateganyo wa AS Kigali, Dr. Rubagumya Emmanuel, yemeje ko imishahara y'abakinnyi yose yishyuwe

AS Kigali yiteguye Rayon Sports

Umutoza wa AS Kigali, Mbarushimana Shaban, yavuze ko agiye gukina na Rayon Sports basangiye ibihe bibi