Iyi mikino izakinwa ku wa Kabiri, tariki 30 Mata 2024, aho Bayern Munich izakira Real Madrid, bukeye bwaho ku wa Gatatu, Dortmund izakire Paris Saint-Germain. Imikino yose iteganyijwe saa 21:00.

Umwe mu mikino yitezwe cyane muri iki cyiciro, ni uwo Bayern Munich izakiramo Real Madrid ku wa Kabiri, tariki 30 Mata 2024 saa 21:00 kuri Allianz Arena.

Ni ikibuga iyi kipe yo muri Espagne itazajyaho yikandagira kuko ari kimwe mu biyihira muri iri rushanwa. Muri rusange, amakipe yombi amaze guhura inshuro 26, aho 24 hari mu mikino yo gukuranamo.

Ni inshuro ya munani amakipe yombi ahuriye muri ½, aho ebyiri ziheruka zose Real Madrid yazitsinze mu 2013/14 na 2017/18. By’umwihariko, Bayern Munich imaze imikino irindwi idatsinda Real Madrid, aho yatsinzwe imikino itandatu inganya umwe gusa.

Allianz Arena ni ikibuga gihira iyi kipe y’i Madrid, cyane kuko imikino itatu iheruka kuhakinira yayitsinze yose. Mu 2013/14, yahatsindiye ibitego 4-0 mu gihe mu 2016/17 na 2017/18 yahatsindiye ibitego 2-1.

Real Madrid ntiratsindwa muri uyu mwaka w’imikino muri iri rushanwa kuko yatsinzemo imikino irindwi, inganya itatu. Mu 2016/17 ni bwo yamaze igihe kinini itaratsindwa (imikino 11) byaje kurangira yegukanye n’igikombe cy’uwo mwaka.

Umutoza wa Real Madrid, Carlo Ancelotti, yatangaje ko bazahura n’ikipe ikomeye cyane aho yabigaragaje isezerera Arsenal muri ¼.

Ati “Ni umukino mushya n’amateka mashya azaba yandikwa. Turiyizeye nubwo tuzahangana n’ikipe ikomeye kandi ifite abakinnyi beza ku giti cyabo. Babigaragaje basezerera Arsenal. Twubaha Bayern Munich cyane. Ni ikipe y’amateka kandi ifite uburambe muri iri rushanwa.”

Umutoza wa Bayern Munich, Thomas Tuchel yatangaje ko Real Madrid igoye.

Ati "Iravanze hagati mu kibuga kuko bakinisha abakinnyi babiri bugarira n’abandi basatira. Bakina birekuye cyane ndetse n’ubunararibonye bwinshi. Tuzagerageza gushaka ibisubizo.”

Iyi kipe ishobora kuzaba yagaruye abakinnyi bakomeye barimo Serge Gnabry, Konrad Laimer, Matthijs de Ligt, Dayot Upamecano, Jamal Musiala na Leroy Sané.

Ni mu gihe Real Madrid na yo izagarura Ferland Mendy wari umaze iminsi afite imvune na Aurélien Tchouaméni utarakinnye umukino wo kwishyura muri 1/2 kubera amakarita y’umuhondo.

Abongereza bayoboye amakipe yombi

Muri uyu mukino benshi bahanze amaso Abongereza babiri ari bo rutahizamu wa Bayern Munich, Harry Kane ndetse na Jude Bellingham wa Real Madrid.

Kane uzaba uri imbere y’abafana ku wa Kabiri, azaba ayoboye ubusatirizi bwa Bayern Munich amaze gutsindira ibitego 42 muri uyu mwaka. By’umwihariko, mu mikino 10 amaze gukina muri iri rushanwa yatsinzemo ibitego birindwi atanga n’imipira itatu yavuyemo ibindi.

Nta kabuza uyu ni umwe mu bo guhangwa amaso, cyane ko Bayern Munich iri rushanwa ari ryo itezeho amakiriro nyuma yo gutakaza Igikombe cya Shampiyona y’u Budage yari imaze imyaka 11 yegukana.

Ku rundi ruhande, ni undi mwanya mwiza kuri Jude Bellingham, wo gukomeza kwiyereka Isi ndetse no guhumuriza abakinnyi abafana ba Real Madrid.

Uyu mukinnyi ni we mu bashingiweho umukino wa Real Madrid ndetse ni na we umaze kuyitsindira ibitego byinshi (21) mu marushanwa yose.

Ntiwavuga ibyo kwitega ngo urenze ingohe abatoza, cyane ko burya ku kigero kinini ari bo bagena imyitwarire y’amakipe.

Umutoza wa Bayern Munich, Thomas Tuchel ari ku gitutu gikomeye ndetse amakuru amusohora muri iyi kipe ni menshi. Ni umwe mu bakomeje kuzamura urwego muri iri rushanwa nyuma yo kurihesha Chelsea mu 2021 ndetse no kugeza Paris Saint-Germain ku mukino wa nyuma mu 2020.

Ku rundi ruhande, Umutoza wa Real Madrid, Carlo Ancelotti umwise mwarimu ntiwaba uri kure y’ukuri kuko amaze kwegukana iri rushanwa inshuro enye zirimo ebyiri ari kumwe na AC Milan ndetse n’izindi ari kumwe n’iyi kipe y’i Madrid.

Real Madrid izaba yagaruye Aurélien Tchouaméni

Bayern Munich izaba yagaruye abakinnyi barimo Jamal Musiala

Amakipe yombi ayobowe n'Abongereza, Jude Bellingham (22) na Harry Kane