00:00:00 IGIHE NETWORK KN KINYARWANDA EN ENGLISH FR FRANCAIS

Neymar yagize imvune ikomeye

Yanditswe na Bukuru JC
Kuya 29 Ugushyingo 2021 saa 08:19
Yasuwe :

Neymar yaraye agize imvune ikomeye ndetse ashobora kumara igihe kirere adakina nyuma yo kuvunikira mu mukino Paris Saint-Germain yatsinzemo Saint-Etienne ibitego 3-1 ku Cyumweru muri Shampiyona y’u Bufaransa.

Ibitego bibiri bya Marquinhos n’ikindi cya Angel Di Maria ni byo byafashje PSG kubona amanota atatu yo ku Cyumweru, yatumye igira amanota 40 mu mikino 15, irusha 12 Rennes ya kabiri.

Gusa, icyagarutsweho cyane kuri uyu mukino ni imvune ikomeye y’Umunya-Brésil Neymar ushobora kumara igihe kirekire adakina.

Neymar yavunitse ahagana mu kabombambari nyuma yo guserebekwa n’umukinnyi wa Saint-Etienne mu gice cya kabiri.

Abakinnyi ba PSG bagaragaraga nk’abafite impungenge kuri iyi mvune mu gihe abaganga b’ikipe bihutiye mu kibuga kugira ngo bite kuri uyu mukinnyi.

Nyuma yo kuva mu kibuga ari ku ngobyi, Neymar yagiye ku mbuga nkoranyamabaga yandika ko yizeye ko azagaruka mu kibuga ameze neza.

Ati “Ku bw’amahirwe make, izi mvune ziri mu bigize ubuzima bw’umukinnyi. Bisaba kuzamura umutwe ugakomeza kureba ibiri imbere. Nzagaruka meze neza kandi mfite imbaraga.”

Umutoza wa PSG, Mauricio Pochettino, yabwiye abanyamakuru nyuma y’umukino ko kugeza ubwo yaganiraga na bo ko “ntacyo kuvuga gihari”.

Ati “Yabaye mu kabombambari. Ejo, azakorerwa ibizamini bzatuma tumenya bike ku mvune ye.”

Bitewe n’uburyo imvune igaragara, Neymar ashobora gusiba umukino wa Ligue 1 uzabahuza na Nantes ku wa Gatatu.

Uyu mukinnyi w’imyaka 29, ashobora kandi kubagwa, byatuma ageza mu ntangiriro z’umwaka utaha akiri hanze y’ikibuga, ariko hakenewe ko anyuzwa mu cyuma mbere yo kwemeza uko imvune ye izavurwa.

Neymar yavunitse mu buryo bwateye benshi ubwoba nyuma yo guserebekwa n'umukinnyi wa Saint-Etienne
Neymar yarize cyane nyuma yo kuvunika
Abaganga ba PSG bavura Neymar wavuye mu kibuga ari ku ngobyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .