Nduhungirehe na Visi Perezida wa APR FC banenze Rayon Sports yikuye mu Gikombe cy’Intwari

Yanditswe na Eric Tony Ukurikiyimfura
Kuya 2 Gashyantare 2020 saa 11:20
Yasuwe :
0 0

Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier na Visi Perezida wa APR FC, Maj Gen Mubaraka Muganga, banenze ikipe ya Rayon Sports yanze kwitabira irushanwa ry’Igikombe cy’Intwari 2020 ryasojwe kuri uyu wa Gatandatu.

APR FC yisubije iri rushanwa nyuma yo kunganya na Kiyovu Sports ubusa ku busa mu mukino wabereye kuri Stade Amahoro.

Rayon Sports yabaye iya mbere muri Shampiyona y’umwaka ushize w’imikino, yanze kurikina kuko yangiwe gukinisha abakinnyi bayo bose barimo n’abatarabona ibyangombwa ndetse itangaza ibisabwa bigomba kuzajya bikurikizwa kugira ngo yitabire iri rushanwa.

Ibi birimo gutumirwa mbere y’iminsi 30, kugira umuntu mu bategura irushanwa, kugira umuntu uyihagarariye mu bakira abandi (protocole), kugira umuntu mu bategura amategeko y’irushanwa, kwishyura umwiherero w’ikipe n’ibindi bijyanye n’imyiteguro ndetse abafatanyabikorwa bayo bakemererwa kugaragara.

Nyuma yo kwegukana iri rushanwa, Umuyobozi wungirije wa APR FC, Maj. Gen. Mubaraka Muganga, yavuze ko bashimishijwe n’igikombe batwaye, yemeza ko icyari ingenzi ari uguha agaciro intwari z’igihugu mu gihe yanenze abanze kuryitabira kuko bashaka izindi nyungu.

Ati “Twe nka APR n’iyo dutaha nta gikombe twari kugenda twishimye kubera ko icyo twaharaniraga ni ukwizihiza icyo intwari z’u Rwanda zagejeje ku gihugu cyacu. Abanyarwanda bajye barenga ibindi by’ inyungu za hafi barebe ibya kure. Ni ubutwari kandi twese dushobora kuba intwari.”

Imikino y’Igikombe cy’Intwari uyu mwaka ntabwo yitabiriwe cyane ahanini kubera ko Rayon Sports ifite umubare utari muto w’abafana itigeze irikina, igasimbuzwa Kiyovu Sports.

Ku ruhande rw’Umuyobozi wa APR FC, we asanga Abanyarwanda bose bakwiye kwitabira ibikorwa byose bijyanye n’uyu munsi birimo n’imikino kuko hari ubutuma buhatangirwa.

“Mu by’ukuri ntabwo byatunejeje ko hari bamwe mu bakunzi b’umupira w’amaguru bashobora kuba barirengagije inyito y’iri rushanwa (..) ubutwari kandi ubutwari buraharanirwa, bikura muri iri rushanwa.”

“Ubutaha Abanyarwanda bose dukwiye guharanira ubutwari dushimira abitabiriye bose. Twebwe hari ibyishimo tubonera ku kibuga ariko hari n’ubutumwa bw’ubutwari bwagiye butangirwa ku kibuga.”

Si uyu muyobozi gusa wagarutse ku kutitabira irushanwa kwa Rayon Sports dore ko n’Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, abinyujije ku rubuga rwa Twitter yavuze ko uburyo Rayon Sports yanze kwitabira iri rushanwa atari byo kwihanganira.

Muri ubu butuma, Minisitiri Nduhungirehe yavuze ko Mukura Victory Sports (abereye umukunzi), yari ku rwego rwo hasi muri iri rushanwa, ashimira APR FC yegukanye igikombe.

Ati “Ndashimira APR FC yegukanye Igikombe cy’Ubutwari 2020. Ibintu bibiri navuga: Icya mbere, imyitwarire iri hasi ya Mukura VS muri iri rushanwa ni iyo kwibazwaho. Icya kabiri, kwikura mu irushanwa kwa Rayon Sports kandi rigamije guha agaciro intwari zacu sibyo kwihanganira ndetse FERWAFA ntiyakabyemeye.”

APR FC yegukanye iri rushanwa mu bagabo, yahawe miliyoni 6 Frw, Scandinavia WFC yaryegukanye mu bagore ihabwa miliyoni 2 Frw mu gihe General Headquarters yaritwaye mu cyiciro cy’ingabo z’igihugu, yahawe miliyoni 1 Frw.

Visi Perezida wa APR FC Maj. Gen. Mubaraka Muganga yakomeye amashyi abakinnyi b'iyi kipe begukanye igikombe cy'Intwari 2020
Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, umufana ukomeye wa Mukura VS asanga FERWAFA idakwiye kwihanganira kuba Rayon Sports itarakinnye iri rushanwa ry'Intwari 2020
APR FC yegukanye Igikombe cy'Intwari 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .