Myugariro wa Liverpool yagizwe umukinnyi w’umwaka mu Bwongereza

Yanditswe na Eric Tony Ukurikiyimfura
Kuya 24 Mata 2019 saa 09:57
Yasuwe :
0 0

Myugariro wo hagati mu ikipe ya Liverpool, Virgil Van Dijk, yatowe nk’umukinnyi w’umwaka wa 2019 muri Shampiyona y’u Bwongereza 2018/2019.

Kuri uyu wa Kane nibwo hazatangazwa ku mugaragaro umukinnyi wahize abandi muri uyu mwaka mu Bwongereza, ariko ibinyamakuru bikomeye muri iki gihugu byatangaje ko iki gihembo cyatsindiwe na Virgil van Dijk ukinira Liverpool.

Uyu mukinnyi yahigitse abandi barimo mugenzi we bakinana, Sadio Mané, abakinnyi batatu ba Manchester City barimo Raheem Sterling, Sergio Agüero na Bernardo Silva ndetse na Eden Hazard wa Chelsea.

Kuba yarafashije Liverpool kugira ubwugarizi bukomeye nyuma yo kugurwa muri Southampton, byatumye Van Dijk agirwa umukinnyi w’umwaka, iki gihembo kiguma muri Liverpool dore ko mu mwaka ushize cyegukanywe na Mohamed Salah.

Umuhango wo gutanga ibihembo by’umwaka wa 2019 mu Bwongereza bizabera muri Hoteli ya Grosvenor House mu Mujyi wa Londres ku Cyumweru tariki ya 28 Mata 2019.

Van Dijk amaze gukinira Liverpool imikino 44 mu marushanwa atandukanye muri uyu mwaka w’imikino ndetse ashobora kwegukana igikombe cya shampiyona uyu mwaka mu gihe Manchester City bahanganye yaba itakaje amanota mu mikino isigaye.

Uyu myugariro w’imyaka 27 ukomoka mu Buholandi, yaguzwe na Liverpool muri Mutarama 2018 kuri miliyoni 75 z’amapawundi avuye muri Southampton.

Abandi bakinnyi ba Liverpool batwaye igihembo cy’umukinnyi mwiza ni Luis Suarez (2013-14), Steven Gerrard (2005-06), John Barnes (1987-88), Ian Rush (1983-84), Kenny Dalglish (1982-83) naTerry McDermott (1979-80).

Van Dijk amaze gukinira Liverpool imikino 44 mu marushanwa atandukanye mu 2019
Virgil yegukanye igihembo cyari gifitwe na Mohamed Salah wagitwaye mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza