00:00:00 IGIHE NETWORK KN KINYARWANDA EN ENGLISH FR FRANCAIS

Mukura VS ishobora kwikura muri shampiyona

Yanditswe na Byiringiro Osée Elvis
Kuya 27 August 2022 saa 09:29
Yasuwe :

Ikipe ya Mukura VS ishobora kwikura muri shampiyona kubera umubare muke w’abakinnyi watewe n’ibihano byo kwirukana umutoza binyuranyije n’amategeko.

Mukura VS ishobora kwikura muri shampiyona yatangiye tariki 19 Kanama 2022, igatsindwa na Gasogi United igitego 1-0.

Muri uyu mukino Mukura yari ifite abakinnyi 13 gusa, bivuze ko ari 11 babanzamo n’abasimbura babiri gusa.

Ni ibibazo byaturutse ku bukene bwatumye inanirwa kwishyura umutoza Djilali Bahlou watozaga iyi kipe mu 2020, bityo FIFA igahanisha iyi kipe kwishyura uyu mutoza ibihumbi 46 by’amadorali, ni ukuvuga miliyoni 46Frw.

Mukuru VS ntirabasha kwishyura uyu mwenda ndetse yasabye ubufasha kugira ngo ikemure iki kibazo.

Abakinnyi bayo bakimenya iyi nkuru bavuze ko bafite impugenge z’akazi kabo mu gihe byaba bibaye impamo.

Kapiteni wa Mukura VS, Ngirimana Alex, avuga ko impugenge ari zose ku bakinnyi mu gihe iyi kipe yaba yikuye muri shampiyona.

Ati “Byaba bigoranye cyane, aka niko kazi kadutunze, uko bigaragara ni ikibazo kirenze Mukura. Nk’abakinnyi nta yandi makipe twabona kuko isoko ryararangiye ubwo urumva twaba tugiye kwicara umwaka wose.”

Byagenze bite ngo Mukura yisange muri ibi bibazo?

Tariki 7 Ukwakira 2020, Mukura yasinyishije umutoza Djilali Bahlou amasezerano y’imyaka ibiri, tariki 12 Ukuboza 2020, Minisiteri ya Siporo yahagaritse shampiyona kubera ubwiyongere bw’icyorezo cya Covid-19.

Muri icyo gihe ubuzima bwarahagaze ku makipe, Mukura VS ihagarika amasezerano yari ifitanye n’uyu mutoza mu mpera z’Ukuboza 2020.

Uyu mutoza yaje kurega iyi kipe mu Mpuzamashyirahimwe y’Umupira w’Amaguru ku Isi (FIFA), ko yirukanwe bidakurikije amategeko.

FIFA nayo yahise ibwira Mukura ko igomba kwishyura uyu mutoza, ibihumbi 46 byamadorali.

Nyuma yo kunanirwa kwishyura uyu mwenda, FIFA yahagaritse Mukura kugura abakinnyi, haba imbere mu gihugu cyangwa inyuma yacyo.

Tariki 22 Kanama 2022, Umuyobozi wa Mukura, Maniraguha Jean Damascene, yandikiye ibaruwa Perezida w’Ishyirahamwe ry’Umupira w’Amaguru mu Rwanda (FERWAFA), arisaba ubufasha bwo kwishyurirwa ideni ibereyemo uyu mutoza, maze nayo ikajya yishyura Ferwafa gahoro gahoro, Akarere ka Huye kakaba umwishingizi.

Mu gihe FERWAFA itakwemera kubaguriza amafaranga, Mukura yavuze ko nta bushobozi ifite bwo gukina mu cyiciro cya mbere kubera umubare muke w’abakinnyi basigaranye bagera kuri 14.

Ati “Tuboneyeho kandi kubamenyesha ko mu gihe mutabashije kudufasha gukemura iki kibazo, Mukura VS idafite ubushobozi muri iki gihe bwo gukomeza gukina shampiyona kubera umubare mucye w’abakinnyi bemerewe gukina, dufite 14; bityo tukabasaba no kudukorera ubuvugizi kugira ngo tubashe kwemererwa kwandikisha abakinnyi twari twaguze.”

Ibibazo byo kwirukana abakinnyi n’abatoza, mu buryo bunyuranye n’amategeko bikunze kugaragara cyane mu mupira w’amaguru mu Rwanda.

Mukura VS ifite abakinnyi 14 gusa
Mu 2020 ni bwo Djilali Bahlou yasinye muri Mukura imyaka ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .