00:00:00 IGIHE NETWORK KN KINYARWANDA EN ENGLISH FR FRANCAIS

Motsepe uyobora CAF yatanze icyizere ku Banyafurika mu Gikombe cy’Isi cya 2026

Yanditswe na Iradukunda Olivier
Kuya 22 Ukuboza 2022 saa 11:10
Yasuwe :

Perezida w’Impuzamashyirahamwe y’Umupira w’Amaguru muri Afurika (CAF), Patrice Motsepe, yavuze ko igihugu gikomoka kuri uyu mugabane gishobora kuzagera ku mukino wa nyuma mu Gikombe cy’Isi kizaba mu 2026.

Yabitangaje ubwo yagarukaga ku rugendo rw’amakipe yahagarariye Afurika mu Gikombe cy’Isi cya 2022 cyabereye muri Qatar. Cyegukanywe na Argentine itsinze u Bufaransa kuri penaliti 4-2.

Umunyafurika y’Epfo Motsepe yizera neza ko kuba Maroc yarahatanye ikagera muri ½ cy’iyi mikino, ari impamvu imwe ishobora gutuma Abanyafurika badasubira inyuma muri uru rugendo.

Yagize ati “Mfite icyizere muri njye ko mu Gikombe cy’Isi cy’ubutaha, ikipe yo ku Mugabane wa Afurika izagera kure hashoboka. Amateka yanditswe na Maroc yatumye tugaragaza urukundo twifitiye nk’Abanyafurika. Ahazaza h’umupira w’amaguru kuri uyu mugabane ni heza cyane.”

Perezida Motsepe yagarutse ku kuba impano zikomoka muri Afurika, zose zishyize imbaraga hamwe ubushobozi bwo kwegukana Igikombe cy’Isi bwaboneka.

Ati “Iyo utembereje amaso yawe mu bihugu byo kuri uyu mugabane wacu, usanga byibuze hari 10 cyangwa 15 bishobora guhangana ku rwego rw’Isi kandi bigatwara igikombe.”

Uyu mugabo watangiye kuyobora CAF ku wa 12 Werurwe 2021, avuga ko urugero rugaragaza ko gushaka ari ugushobora ari Croatia, yageze muri ½ mu bikombe bibiri biheruka.

Ati “Iyo ndebye nsanga dukwiye gufatira urugero ku gihugu cyo ku Mugabane w’u Burayi. Igihugu cya Croatia gituwe n’abaturage batagera kuri miliyoni enye, ariko cyabashije gushyira hamwe cyitwara neza mu Bikombe by’Isi biheruka.”

“Icyo gihugu ni cyo cyahanganye na Brésil. Iyo ni yo mpamvu ntazemera ibintu byose bituma ikipe yo ku Mugabane wa Afurika idahatana ku rwego rwo hejuru. Ubu intego dufite ni ugutwara Igikombe cy’Isi.”

Umusaruro ibihugu bizajya bitanga muri ayo marushanwa, ni yo azagaragaza urwego umupira w’amaguru ugezeho muri Afurika n’iterambere ryawo riri kwihuta.

Perezida Motsepe yashimiye imikoranire ya Perezida w’Ishyirahamwe ry’Umupira w’Amaguru muri Maroc, Fouzi Lekjaa, n’Umwami w’iki gihugu Mohamed VI kuba baragize uruhare mu kubaka umupira w’amaguru utuma Abanyafurika bongera kumva ko bashoboye.

Ikibazo yagaragaje cyatuma ibi bitagerwaho ni ibikorwaremezo. Yagaragaje ko kuba abashoramari batarishyira muri ruhago ari icyuho gikomeye cyane mu bituma iterambere rigorana.

Ati “Ubushobozi burahari, iterambere rirashoboka kandi n’umusaruro wagaragara mu bihugu byose uko ari 54 biri kuri uyu mugabane, gusa ikibabaje ni uko abantu badashaka gushora imari muri uyu mukino.”

Perezida Motsepe yatorewe kuyobora CAF ari ku mwanya wa cyenda mu baherwe bo muri Afurika nk’uko Forbes yabitangaje. Kuri miliyari 3$ yari yibitseho yagiriwe inama n’Umudage Johan Cruyff yo gushora imari mu mupira w’amaguru, ahereye ku mashuri yigisha abana n’urubyiruko.

Yagize ati “Johan Cruyff yaranyegereye angira inama yo gushora imari muri ruhago kandi ngahera mu bakiri bato. Nk’uko biri no mu nshingano zanjye ndashaka ko hamwe n’abayobozi ba CAF dufatanyije kuyobora, twazibukirwa ku byo twubatse bihamye kandi byabyaye umusaruro urambye.”

Icyizere cyo kumva ko Abanyafurika bashoboye cyagaragaye ubwo Maroc yageraga ku mwanya wa kane mu Gikombe cy’Isi 2022, itsinze amakipe akomeye arimo u Bubiligi na Canada bari mu itsinda rimwe, Espagne muri ⅛ na Portugal muri ¼.

Iyi kipe yasezerewe n’u Bufaransa muri ½ mbere yo gutsindwa na Croatia bahataniye umwanya wa gatatu.

Igikombe cy’Isi cya 2026 kizabera mu bihugu bitatu birimo Leta Zunze Ubumwe za Amerika, Mexique na Canada.

Perezida wa CAF, Patrice Motsepe, abona ikipe yo muri Afurika izagera ku mukino wa nyuma w'Igikombe cy'Isi mu 2026
Patrice Motsepe avuga ko gushora imari mu mupira w'amaguru muri Afurika ari cyo kintu kibura mu iterambere ryawo
Ikipe y'Igihugu ya Maroc yatumye Abanyafurika bongera kumva ko bashoboye nyuma yo kugera muri 1/2 cy'Igikombe cy'Isi cyabereye muri Qatar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .