Michael Sarpong yahembwe na Skol nk’umukinnyi w’ukwezi muri Rayon Sports

Yanditswe na Ngabo Roben
Kuya 21 Gashyantare 2019 saa 09:01
Yasuwe :
0 0

Uruganda rwa Skol Brewery Ltd Rwanda, rwahembye umukinnyi wa Rayon Sports witwaye neza kurusha abandi muri Mutarama, igihembo gitsindirwa na Michael Sarpong.

Uyu mushinga wo guhemba abakinnyi ba Rayon Sports buri kwezi watangijwe n’itsinda ry’abafana ryitwa ‘March Generation’ uterwa inkunga n’uruganda rwa Skol. Kuri uyu wa Gatatu wabereye ku kibuga cyo mu Nzove aho Rayon Sports ikorera imyitozo.

Igihembo gifite agaciro k’ibihumbi 100 Frw cyegukanywe na rutahizamu w’umunya-Ghana, Michael Sarpong, ahigitse bagenzi be Niyonzima Olivier Sefu na Iradukunda Eric Radu.

Ikipe ya Rayon Sports muri rusange yakinnye imikino itanu muri Mutarama, irimo itatu ya shampiyona n’ibiri y’igikombe cy’Intwari. Yatsinzemo ine inganya umwe.

Benshi bahaga amahirwe Niyonzima Olivier Sefu wacyegukanye mu kwezi gushize ko yaza kucyisubiza kuko muri iyo mikino itanu yatsinzemo ibitego bibiri, imbere ya Marines FC na Musanze FC muri shampiyona anatanga umupira umwe wavuyemo igitego.

Gusa ababishinzwe bahisemo Michael Sarpong kuko we yatsinzemo igitego atanga imipira itatu yavuyemo ibitego, anakoresha imbaraga nyinshi mu gushakira ikipe ye amanota muri iyi mikino itanu.

Nyuma yo guhembwa Sarpong yemeje ko iki gihembo kigiye kumwongerera imbaraga.

Ati “Ndashimira abatoza n’abakinnyi bagenzi banjye kuko badahari nta musaruro natanga. Ndakibatuye kandi mbijeje ko ngiye gukomeza gukora cyane kugira ngo tugere ku ntego yacu yo kwegukana igikombe cya shampiyona.”

Iki gihembo cyatanzwe nyuma y’imyitozo Rayon Sports yakoze yitegura umukino izahanganamo na Mukura VS ku wa Gatanu tariki 22 Gashyantare 2019 kuri Stade Huye.

Iyi myitozo yitabiriwe n’abakinnyi batakinnye umukino Rayon Sports yatsinzemo Etincelles FC kuri uyu wa Kabiri tariki 19 Gashyantare 2019 kuko abakinnye bahawe akaruhuko.

Yanitabiriwe na myugariro Faustin Usengimana udafite ikipe muri iyi minsi nyuma yo gusesa amasezerano na Khaitan Sporting Club yo mu cyiciro cya kabiri muri Koweït.

Igihembo cy'umukinnyi w'ukwezi giherekezwa n'amafaranga ibihumbi 100 Frw
Faustin Usengimana yongeye guhabwa ikaze mu myitozo ya Rayon Sports
Faustin Usengimana yasanze bagenzi be barimo Ange Mutsinzi bafatanyije kugeza Rayon Sports mu matsinda y'amarushanwa ya CAF mu 2018
Donkor Prosper Kuka uvuye mu biruhuko muri Ghana ari kumwe na bagenzi be bitegura Mukura VS
Abanya- Brésil Robertinho na Wagner do Nascimento Silva batoza Rayon Sports
Jules Ulimwengu ari mu bahabwa amahirwe yo kwegukana igihembo cy'umukinnyi w'ukwezi kwa Gashyantare
Manishimwe Djabel uherutse gukora ubukwe nawe yasubukuye imyitozo
Mu bakoze imyitozo ntabwo harimo Tuyishimire Eric bita Congolais wavunitse, ubu uri kwikoresha wenyine
Robertinho aganira n'ushinzwe tekinike mu ruganda rwa Skol, Peter Gielles mbere y'uyu muhango wo guhemba
Usengimana nubwo nta kipe afite yagaragaje urwego rwiza mu myitozo

Kanda hano urebe andi mafoto y’abakinnyi ba Rayon Sports mu myitozo

Amafoto: Julius Ntare


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza