Manzi Djimmy André yashinze Académie izafasha Amavubi kubona abakinnyi bakina hanze

Yanditswe na Mukwaya Olivier
Kuya 5 Nzeri 2020 saa 09:41
Yasuwe :
0 0

Manzi Djimmy André ubusanzwe ubarizwa muri Leta Zunze Ubumwe za Amerika, yashinze ishuri ry’umupira w’amaguru ku ntego yo kunganira ikipe y’Igihugu ‘Amavubi’, aho ateganya kuzajya ajyana abakinnyi bato i Burayi no muri Amerika kugira ngo bagere ku rwego rwo gukinira igihugu cyabo.

Uyu mukinnyi wakiniye ikipe ya Marines FC kuva muri 2000 kugeza 2003, kuri ubu ari mu Rwanda.

Avuga ko iki gikorwa ari kubw’urukundo akunda igihugu avukamo akaba ashaka kwifashisha amahirwe afite muri Leta Zunze Ubumwe za Amerika.

Ati “Ndifuza gufasha urubyiruko mu rwego rwo kuzamura umupira w’amaguru. Byaturutse kubyo nabonye i Burayi no muri Amerika kuko nakinnye mu Bubiligi, u Bufaransa no muri Leta Zunze Ubumwe za Amerika, aho ndimo gutoza kuko ubu mpagarariye ikipe ya Corolado Rush ku mugabane wa Afurika. Kubera gukunda igihugu nkomokamo nahisemo kubanza imishinga yose iwacu.”

Akomeza avuga ko abakinnyi bazajya bigaragaza azajya abahuza n’abashinzwe gushakira abakinnyi amakipe akomeye arimo Paris saint Germain, FC Barcelone, Villareal na Manchester United kandi n’uguzwe hakagira amafaranga ashyirwa mu gufasha abapfakazi ba Jenoside yakorewe abatutsi mu 1994.

Ati “Aho nkora duhuza ama-Académie menshi y’amakipe akomeye nka Paris Saint Germain, FC Barcelone,Villareal na Manchester United, nifuza ko n’abana bo mu Rwanda bajya baza bakerekana impano bafite kuko hahurira aba-manager [abashakira abakinnyi amakipe] 150 baturutse ku mpande zose baje gushaka abakinnyi bakiri bato.”

“Inzozi zanjye nka manager wa FIFA sinifuza kuzajya njya gushaka abakinnyi muri Mexique, Argentine na Colombie ahubwo nifuza ko najya mbavana iwacu bityo n’igihugu cyanjye kikazamuka, kandi umukinnyi uzajya agurishwa 20% azajya afasha abapfakazi barokotse Jenoside yakorewe abatutsi.”

Manzi Djimmy André yashoje avuga ko umushinga we uzahera ku ikipe ya Marine Fc aho azayiha ibikoresho akaba anatangiranye abana 30 bo muri académie yayo.

Ati “Nzahera ku ikipe ya Marines kuko ni ikipe ifite ubuyobozi bukora neza nzajya mbafasha mu rwego rw’ibikoresho nk’ikipe yandeze nabo bamfashe gushyiraho gahunda y’abana mu gihe ntahari ni nayo mpamvu ntangiranye n’abana 30 bo muri Marines FC bivuze ko nzajya mfasha Marines ndetse na Academie yanjye.”

“Ariko muri rusange gahunda yanjye ni ukuzamura ikipe y’igihugu Amavubi kuburyo yajya ibonekamo abakinnyi 18 bose bavuye hanze kuko birambabaza kubona ikipe y’igihugu yacu yuzuyemo abakinnyi bakina mu gihugu.”

Nyuma yo kuva muri Marines, Manzi Djimmy André yakinnye mu birwa bya Reunion mu ikipe yitwa Saint Pierre akomereza mu Bufaransa mu ikipe ya Vitre sur Seinne mu cyiciro cya gatatu. Yakomereje mu Bubiligi mu ikipe ya RAS Saintois FC yo mu cyiciro cya kabiri, asoreza muri Corolado Rush aho arimo no gutoza.

Ku ikubitiro akaba yarahaye imyambaro igezweho ikipe ya Marines FC izambara mu mwaka w’imikino utaha, yakozwe n’uruganda bakorana ari narwo rwambika Manchester United.

Abana bahawe imyambaro bazajya bambara mu kibuga
Manzi Djimmy André ashaka ko Amavubi azajya akina arimo abakinnyi 18 baturutse hanze
Manzi Djimmy André yasabye abana kuzashyiramo imbaraga kuko umupira ari akazi keza
Umunyamabanga Mukuru wa Marines FC, Ruzindana Ndahiro avuga uburyo bazakorana na Manzi Soccer Academy
Manzi Soccer Academy izakorera i Rubavu
Ubwo Manzi yashimirwaga n'ikipe ya Colorado Rush, ari kumwe n'umufasha we
Manzi Djimmy André yahaye imyambaro ikipe ya Marines FC
Imyambaro Marines FC izambara mu mwaka utaha w'imikino
Imyambaro Marines FC yahawe harimo n'iyo gusohokana itari mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .