Muri uyu mukino w’Umunsi wa 34 wa Premier League kuri Man City igifite ikindi kirarane, Brighton ni yo yatangiye neza ariko ntiyabona uburyo bugaragara mu minota 10 ya mbere.

Igitego cy’umutwe Kevin de Byune yateye yinaze imbere, ni cyo cyahesheje Manchester City kuyobora umukino ku munota wa 16, ku mupira wari uhinduwe na Kyle Walker.

City itari ifite Erling Haaland wavunitse, yatsinze igitego cya kabiri ku munota wa 25, ku mupira Phil Foden yateye uteretse inyuma y’urubuga rw’amahina nyuma y’uko yari akorewe.

Habura iminota 10 ngo igice cya mbere kirangire, uyu Mwongereza ukiri muto yahawe umupira na Bernardo Silva, atsinda igitego cya gatatu cya City, kikaba icye cya 50 muri Premier League.

Julian Alvarez yashimangiye intsinzi ku munota wa 62, ku mupira watewe na Kyle Walker, ukurwamo n’umunyezamu, usanga uyu Munya-Argentine ahagaze neza mu rubuga rw’amahina, awuboneza mu izamu.

Gutsinda uyu mukino byatumye City igira amanota 76 ku mwanya wa kabiri muri Premier League, irushwa inota rimwe na Arsenal ya mbere.

Iyi kipe itozwa na Pep Guardiola imaze imikino 30 idatsindwa mu marushanwa yose, aho yatsinzemo 24, inganya itandatu. Andi makipe yo mu Bwongereza yabigezeho ni Nottingham Forest (imikino 40 mu 1978) na Manchester United (34 mu 1993-94 na 33 mu 1998-99).

City isigaje imikino itanu irimo uwo izakirwamo na Nottingham Forest ku Cyumweru. Izakurikizaho Wolverhampton Wanderers, Fulham, Tottenham Hotspur na West Ham United.

Kevin de Bryune yatsinze igitego n'umutwe

Phil Foden yatsinze ibitego bibiri muri uyu mukino, yuzuza 50 muri Premier League

Foden atsinda igitego cya kabiri ku mupira yahawe na Bernardo Silva

Julian Alvarez atsinda igitego cya kane mu gice cya kabiri

Pep Guardiola yavuze ko basigaje imikino itanu ikomeye ndetse ibyabaye kuri Liverpool yatakaje imikino ibiri, byaba kuri Arsenal cyangwa City