00:00:00 IGIHE NETWORK KN KINYARWANDA EN ENGLISH FR FRANCAIS

Kwizera Olivier agiye kugezwa imbere y’ubutabera

Yanditswe na Habimana Sadi
Kuya 23 Kamena 2021 saa 10:37
Yasuwe :
0 0

Nyuma y’iminsi 19 Umunyezamu w’Ikipe y’Igihugu Amavubi na Rayon Sports FC, Kwizera Olivier afunzwe, agiye kugezwa imbere y’Ubutabera.

Tariki ya 4 Kamena 2021 nibwo Urwego rw’Igihugu rw’Ubugenzacyaha, RIB, rwatangaje ko rucumbikiye abarimo umunyezamu Kwizera Olivier bose bakekwaho gukoresha ibiyobyabwenge.

Biteganyijwe ko uyu munyezamu, ku wa 24 Kamena 2021 ari bwo azagezwa imbere y’Ubutabera agatangira kuburana ku byaha akurikiranyweho birimo gukoresha ibiyobyabwenge.

Ubwo Kwizera yafatwaga, yafatanywe n’abandi bakinnyi barimo myugariro Runanira Hamza wakiniye amakipe nka Marines FC, Rayon Sports FC na Bugesera FC.

Umuvugizi w’Umusigire wa RIB, Dr Murangira Thierry ubushize yabwiye IGIHE ko uyu munyezamu yafatanywe ikiyobyabwenge cy’urumogi.

Yagize ati “Ni urumogi yafatanywe, akaba yarari kumwe n’ikipe y’abandi bantu umunani barimo na Runanira Hamza bari hamwe mu rugo rwa Kwizera, kuri ubu bafungiye kuri sitasiyo ya RIB ya Kicukiro.“

Dr Murangira avuga ko aba bose bahise bajyanwa gupimwa muri Laboratwari y’u Rwanda y’Ibimenyetso bya Gihanga byifashishwa mu butabera (Rwanda Forensic Laboratory).

Mu butumwa bwe yavuze ko bibabaje kubona abantu bakabaye bafatirwaho urugero ari bo bakora ibyaha, yibutsa abantu bose ko bakwiye kwirinda ibiyobyabwenge.

Itegeko No 68/2018 ryo ku wa 30 Kanama 2018 riteganya ibyaha n’ibihano muri rusange, ingingo ya 263 ivuga ko Umuntu wese ufatanwa, urya, unywa, witera, uhumeka cyangwa wisiga mu buryo ubwo ari bwo bwose ibiyobyabwenge bito cyangwa urusobe rw’imiti ikoreshwa nka byo, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu itarenze miliyoni 20Frw ariko itarenze miliyoni 30Frw, ku byerekeye ibiyobyabwenge bihambaye.

Andi makuru avuga ko inzego zibishinzwe zashatse gupima aba bose hakoreshejwe ibizamini byo mu maraso ngo hamenyenekane niba koko yarabikoresheje, ariko Kwizera abitera utwatsi.

Kwizera Olivier wazamukiye muri Isonga FC, akayikinira hagati ya 2011 na 2013, yamenyekanye cyane ubwo yakiniraga APR FC hagati ya 2013 na 2016.

Nyuma yo kurekurwa n’Ikipe y’Ingabo mu 2016, yakiniye Bugesera FC umwaka umwe, yerekeza muri Free State Stars yo muri Afurika y’Epfo mu 2017, ayikinira kugeza mu ntangiriro z’uyu mwaka.

Mu 2015 ni bwo yatangiye guhamagarwa mu Ikipe y’Igihugu nkuru ‘Amavubi’.

Mu Ukuboza 2019, Kwizera yasinyiye Ikipe ya Gasogi United kuyikinira amezi atandatu gusa ntiyahatinze kuko yahise ajya muri Rayon Sports FC ari na yo abarizwamo kuri ubu.

Mu minsi ishize Kwizera yari umunyezamu wa mbere w'Amavubi
Umukino Amavubi yatsinzemo Mozambique 1-0 i Kigali, ntabwo Kwizera yawukinnye kubera amakarita abiri y'umuhondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .