Kutumvikana gushingiye ku matora mu byaranze Inama y’Inteko Rusange ya Kiyovu Sports

Yanditswe na Eric Tony Ukurikiyimfura
Kuya 23 Kanama 2020 saa 07:24
Yasuwe :
0 0

Inama y’Inteko Rusange yahuje abakunzi ba Kiyovu Sports kuri iki Cyumweru yaranzwe n’ubwumvikane buke kubera ingingo zirimo ijyanye n’amatora atari kuri gahunda yatumye bamwe basohoka itarangiye.

Inteko Rusange ya Kiyovu Sports yabereye muri Stade ya Kigali kuva saa Yine (10:00), yasojwe ahagana saa Kumi n’igice (16:30) abagera hafi kuri kimwe cya kabiri cy’abari bayitabiriye bamaze gusohoka.

Umuyobozi w’Umuryango wa Kiyovu Sports, Kayumba Jean Pierre, yabwiye itangazamakuru ko “inama y’uyu munsi yari ikomeye. Harimo abantu basa n’abashyamiranye gatoya.”

Muri iyi nama, Visi Perezida wa Mbere wa Kiyovu Sports , Ntarindwa Théodore yavuze ko iyi kipe yakoresheje agera kuri miliyoni 76 Frw igura abakinnyi, aho amafaranga menshi yatanzwe n’Umujyi wa Kigali.

Ati "Uyu mwanya reka nshimire Umujyi wa Kigali kuko muri ayo mafaranga watanze agera kuri 30%, nshimire Mvuyekure François (Perezida wa Kiyovu Sports) we yatanze arenga 20%, umuvandimwe Mvukiyehe Juvénal yatanze 16%, nanjye natanze 12% andi mafaranga yatanzwe n’abakunzi ba Kiyovu Sports batandukanye, turabashimira cyane."

Hatangajwe ko mu mwaka utaha w’imikino wa 2020/21, Kiyovu Sports izakoresha ingengo y’imari ya miliyoni 267 Frw, azaturuka mu bafatanyabikorwa nka Azam Group, Umujyi wa Kigali, UAP, abanyamuryango, ku bibuga n’ahandi hatandukanye mu gihe buri kwezi, iyi kipe izajya yishyura imishahara ya miliyoni 13 Frw.

Umuyobozi ushinzwe Ibikorwa bya Kiyovu Sports, Twizerimana Bernard, yavuze ko mu mwaka ushize w’imikino, ikipe yakoresheje miliyoni 144.3 Frw mu kugura abakinnyi n’imishahara, miliyoni 4.486 Frw y’uduhimbazamusyi, miliyoni 11.789 Frw yo gutegura imikino, asaga miliyoni 26 Frw z’imyambaro n’andi asaga miliyoni 3 Frw y’ibikoresho bitandukanye byaguzwe, byose hamwe bikagera muri muri 190.084 Frw.

Yagaragaje ko kandi iyi kipe ifite umwenda wa miliyoni 60 Frw, ariko hatagaragara aho miliyoni 25 Frw zaturutse. Ibi bakaba byagaragaye ubwo Kiyovu Sports yafataga amafaranga yatanze bagakuramo ayo bakoresheje yose, basanga bafite uwo mwenda ariko nta nyandiko cyangwa inyemezabwishyu bw’uwayatanze.

Andi asigaye ni miliyoni 35 Frw yatanzwe mu kugura abakinnyi muri iyi mpeshyi, ikipe yagurijwe na Perezida w’iyi kipe, Mvuyekure François, Visi Perezida wayo Ntwarindwa Théodore ndetse na Mvukiyehe Juvénal we basigaje kwishyura miliyoni 17.5 Frw.

Amatora yagarutsweho cyane bituma bamwe bataha inama itarangiye

Mu banyamuryango ba Kiyovu Sports bari bitabiriye iyi Nama y’Inteko Rusange, abenshi bari biteze ko haba amatora yo gusimbuza komite yari yahawe ikipe isimbura iyari iyobowe na Kayumba Jean Pierre.

Hari abifuzaga ko Mvukiyehe Juvénal wari mu bayoboye Komisiyo yo kugura abakinnyi muri Kiyovu Sports, agirwa umuyobozi w’ikipe nyuma yo kugaragaza ubushobozi bw’amafaranga ndetse akaba aherutse kugura imodoka bivugwa ko izajya itwara abakinnyi b’ikipe.

Ku rundi ruhande hari abatamushakaga bifuza ko ikipe ikomeza kuyoborwa Mvuyekure François dore ko n’ubundi Mvukiyehe atari umunyamuryango wa Kiyovu Sports ahubwo ari mu bemerewe kuri iki Cyumweru.

Mu ijambo rye, Mvukiyehe wagize uruhare mu kujya muri Kiyovu Sports kwa Karekezi Olivier, yavuze ko “Mu minsi nabaye muri Komisiyo yo kugura abakinnyi hari ibintu by’amafuti nabonye muri Kiyovu Sports byakabaye bihinduka niba mushaka ikipe ya 2020.”

Umuyobozi wa Kiyovu Sports, Mvuyekure François, yavuze ko “ababajwe n’ibyavuze na Mvukiyehe” ndetse ubwo yasohokaga inama irangiye, ntabwo yari yishimye.

Iyi ngingo yo kungurana ibitekerezo byo kureba niba amatora yaba, Mvukiyehe Juvénal akinjira mu buyobozi, ni yo yafashe umwanya munini w’abakunzi ba Kiyovu Sports kuko bayimazeho amasaha arenga atatu.

Mvukiyehe usabwa kuba amaze amezi atandatu ari umunyamuryango kugira ngo yemererwe kujya mu buyobozi yahakanye ko yavuze ko “adashaka gukorana na Mvuyekure François” gusa yemeza ko uyu usanzwe ari Umuyobozi wa Kiyovu Sports atakwemera kumwungiriza, ahubwo Mvuyekure yagirwa Umuyobozi w’icyubahiro.

Yakomeje avuga ko atarajwe ishinga no kujya mu buyobozi bwa Kiyovu Sports ahubwo yifuza kuba umunyamuryango akabanza akitekerezaho.

Impaka zafashe umwanya munini bituma bamwe mu bashakaga ko haba impinduka mu buyobozi bwa Kiyovu Sports bahitamo gusohoka ubwo haburaga igihe kirenga isaha imwe ngo inama igere ku musozo.

Kayumba Jean Pierre uyobora Umuryango wa Kiyovu Sports, yavuze ko bahisemo kwigiza amatora inyuma kugira ngo abasanzwe bayoboye ikipe, basoze manda yabo.

Ati “Twashakaga kugira ngo tubihagarikire hafi kuko hari ababivugaga mu buryo budahuye; iriya komite twari twarayitoye tuyiha manda izarangira mu kwezi kwa Cyenda kugiye kuza. Niyo mpamvu mwabibonye, nta matora yigeze aba, twaretse ngo ibanze irangize manda yayo, hanyuma abanyamuryango bazicare barebe uko amatora yagenda.”

Nubwo kwerekana umutoza mushya, Karekezi Olivier, byari mu ngingo zigarukwaho muri iyi nama, nta byigeze biba kuko uyu mugabo umaze ibyumweru bibiri ageze i Kigali, atigeze agaragara i Nyamirambo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .