00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu Sports yatangiye ibiganiro na Nsabimana Aimable usigaje umukino umwe

Yanditswe na Iradukunda Olivier
Kuya 21 Ukuboza 2022 saa 04:17
Yasuwe :

Myugariro w’Umunyarwanda, Nsabimana Aimable, yiteguye kuganira n’andi makipe yamwifuza harimo na Kiyovu Sports asigajemo umukino umwe.

Nsabimana Aimable yaje mu ikipe y’Urucaca nyuma y’aho yari yerekeje muri muri Jeddah SC yo muri Arabie Saoudite ariko ntibyakunda kubera ko iyi kipe itamuboneye ibyangombwa ku gihe bityo imusaba ko yakora imyitozo kugeza muri Mutarama 2023, we ahitamo kuvayo.

Nyuma yo kudahirwa n’urugendo rugana muri Jeddah SC, uyu myugariro yahisemo gukinira Kiyovu Sports kugeza imikino ibanza y’uyu mwaka w’imikino wa 2022 irangiye. Nsabimana yageze muri iyi kipe Shampiyona yaramaze gutangira, ikinweho imikino itatu.

Kubera ko amasezerano afitanye n’iyi kipe yambara icyatsi n’umweru ari kugera ku ndunduro, Nsabimana yatangiye gushyingirwa andi makipe harimo n’ayo ku mugabane wa Aziya.

Nsabimana yavuzweho kuba yaramaze kumvikana n’ikipe ya Al Nasr yo muri Libya akaba yayikomerezamo muri uyu mwaka w’imikino, akazayijyamo muri Mutarama 2023.

Nubwo bimeze gutyo ariko nyir’ubwite ahakana aya makuru, aho avuga ko atigeze ahura n’ababishinzwe bo muri iyo kipe ikinira mu Mujyi wa Benghazi. Nsabimana aganira na IGIHE, yavuze ko atazi aho ayo makuru ava, gusa icyo arebaho ari akazi.

Yagize ati “Nanjye ayo makuru anyohereza muri Libya nayumvise, ariko nta kuri kurimo. Nibanyegera tuzavugana, ariko nibatananyegera nabwo nzavugana n’abandi.”

Yongeyeho ko afitanye amasezerano na Kiyovu Sports gusa azarangirana n’umukino bafitanye na Marines FC ku wa Gatanu tariki ya 23 Ukuboza 2023.

Ati “Ikipe ndi kumwe na yo kugeza ubu ni Kiyovu Sports FC mfitiye amasezerano asigaje umukino umwe. Nta yindi kipe mfitanye na yo amasezerano, uwaza wese twaganira kuko njye ndi munyakazi.”

Yakomeje avuga ko Kiyovu Sports yatangiye kumuganiriza ku buryo yayongerera amasezerano, bagakomeza gukorana.

Nsabimana Aimable yakiniye amakipe atandukanye mu Rwanda arimo Marines FC, Police FC na APR FC aherutse gutwaramo Igikombe cya Shampiyona na Kiyovu Sports bari kuganira ku kongera amasezerano.

Nsabimana Aimable ari kunugwanugwa n'amakipe yo hanze y'u Rwanda
Nsabimana Aimable asigaje umukino umwe muri Kiyovu Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .