00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu Sports yanyagiwe na AS Kigali 4-2, iyiturutse inyuma (Amafoto)

Yanditswe na Ntare Julius
Kuya 3 Ukuboza 2022 saa 07:04
Yasuwe :

Kiyovu Sports yagarukanywe na AS Kigali itsindwa ibitego 4-2 mu mukino w’umunsi wa 11 wa Shampiyona y’u Rwanda, kuri uyu wa 3 Ukuboza 2022.

Umukino wa Kiyovu Sports na AS Kigali wagaragayemo kudahuza cyane kw’abakinnyi ba AS Kigali by’umwihariko hagati mu kibuga kuko n’ubundi amakipe yombi asa n’aho ari ho yubakiye.

Uku kudahuza AS Kigali yakugize mu gihe umukinnyi ngenderwaho hagati, Nshimirimana Ismael Picu na Mugenzi Bienvenue batari kuri uyu mukino kubera uburwayi. Aya mahirwe AS Kigali yananiwe kuyabyaza umusaruro atsindwa igitego cya mbere hakiri kare.

Iki gitego cyaturutse ku burangare bwa AS Kigali birangira Ryad Nordien abacitse ahereza umupira Erisa Ssekisambu na we ahita arekura ishoti rinini mu izamu, ku munota wa karindwi.

Ku burangare bwa ba myugariro ba AS Kigali n’umuzamu wayo Ntwali Fiacre na none, Ryad Nordien yateye koruneri Ndayishimiye Thierry awushyira mu izamu. Kiyovu Sports yahise iyobora umukino n’ibitego 2-0.

Casa Mbungo André yahinduye uburyo kuko hagati yari yarushijwe cyane, anyuza imipira mu mpande cyane cyane urwa Nyarugabo Moïse.

AS Kigali yahise ibona uburyo bumwe bukomeye mu gice cya mbere kuri koruneri yatewe neza na Nyarugabo Moïse, Kakule Mugheni Fabrice awushyira mu izamu.

Iki gitego cyatumye amakipe yombi ajya kuruhuka ari ibitego bya Kiyovu Sports 2-1 cya AS Kigali.

Amakipe yose yagarutse mu gice cya kabiri nta mukino ushamaje bakina. Ahubwo amahirwe make yabonwaga na AS Kigali iri kwinjira mu mukino ishakira umusaruro mu mipira yo hejuru.

AS Kigali yabonye umupira w’umuterekano wavuye ku ikosa ryari hafi y’izamu, Lawrence Djuma awuteye Félix Lottin Kone awushyira mu izamu n’umutwe.

Iki gitego cyongereye imbaraga abakinnyi ba AS Kigali bari bamaze kunganya na Kiyovu Sports 2-2. Imipira yo hejuru bakomeza kuyikoresha kuko yabyaraga umusaruro.

Nyarugabo Moïse wari umeze neza muri uyu mukino yongeye kuzamukana umupira, awuhereza Hussein Tchabalala ashyiramo igitego cya gatatu, cyabonetse ku munota wa 70.

AS Kigali ikimara kurusha ibitego Kiyovu Sports, yashatse uburyo bwose yashyiramo igitego cya kane kugira ngo yizere intsinzi ku mukino wari ukomeye.

Uku niko byagenze kuko Hussein Tchabalala yongeye gushyiramo igitego azamukanye umupira wenyine ku munota wa 84, atera ishoti rinini mu izamu, Nziyurwanda Djihad ntiyamenya uko bigenze.

Nta bundi buryo bwabonetse muri uyu mukino kuko wahise urangira ari ibitego 4-2. Kiyovu Sports yahise itsindwa umukino wa kabiri yinjijwe ibitego birindwi.

Uyu mukino wahise usiga AS Kigali iri ku mwanya wa mbere n’amanota 23, naho Kiyovu Sports ijya ku mwanya wa Gatatu n’amanota 21.

Umukino ukurikira Kiyovu Sports izakira Police FC tariki ya 10 Ukuboza, naho AS Kigali izakira APR FC tariki 11 Ukuboza 2022.

Abakinnyi 11 AS Kigali yabanje mu kibuga ni Ntwali Fiacre, Bishira Ratif, Kwitonda Ali, Rugirayabo Hassan, Ahoyikuye Jean Paul, Mugheni Fabrice, Nyarugabo Moïse, Niyonzima Olivier, Kalisa Rashid, Tuyisenge Jacques na Hussein Tchabalala.

Abakinnyi Kiyovu Sports yahisemo kubanza mu kibuga ni Nziyurwanda Djihad, Serumogo Ali, Hakizimana Felicien, Ndayishimiye Thierry, Tuyisenge Hakim, Mugiraneza Froduard, Nkinzingabo Fiston, Benedata Janvier, Erisa Ssekisambu, Bigirimana Abedi na Riyad Nordien.

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .