Kiyovu Sports yamenyesheje amakipe arimo Rayon Sports ko Babuwa Samson atagurishwa

Yanditswe na Kabera Haruna
Kuya 9 Nyakanga 2020 saa 06:32
Yasuwe :
0 0

Ubuyobozi bwa Kiyovu Sports bwatangaje ko rutahizamu w’Umunya-Nigeria, Babuwa Samson, atagurishwa nyuma y’uko byavugwaga ko ashobora kuyivamo atayikiniye.

Mu mpera za Gicurasi nibwo Babuwa Samson yasinye amasezerano y’umwaka umwe muri Kiyovu Sports, ahawe miliyoni 7 Frw.

Hari amakuru yavugaga ko uyu Munya-Nigeria yifuzwa Simba SC yo muri Tanzania, yashakaga kumutangaho miliyoni 10 Frw agahita ayerekezamo nk’uko bikubiye muri imwe mu ngingo y’amasezerano yagiranye na Kiyovu Sports.

Byavugwaga ko atari Simba SC yifuzaga uyu mukinnyi, ahubwo bwari uburyo bwatekerejwe n’imwe mu makipe yo mu Rwanda kugira ngo abanze kunyuzwa muri Tanzania agaruke kuyikinira nk’uko APR FC yigeze kubigenza igura Manishimwe Djabel wavuye muri Rayon Sports akabanza guca muri Gor Mahia yo muri Kenya.

Ubuyobozi bwa Rayon Sports bwigambye buvuga ko “Rutahizamu mwiza agomba gukina mu ikipe ikomeye”, bamwe bakavuga ko bwavugaga Babuwa Samson.

Kuri uyu wa Kane, ibinyujije kuri Twitter, Kiyovu Sports yatangaje ko Babuwa Samson atagurishwa ndetse azakinira iyi kipe mu mwaka utaha w’imikino nk’uko amasezerano yayisinyiye abivuga.

Yagize iti “Babua Samson, ni Umukinnyi wa Kiyovu Sports, kandi Ubuyobozii bwayo nta gitekerezo na gito bwigeze bugira cyo kugurisha uyu mukinnyi, kuko impamvu yaguzwe Ntirarangira. Abavuga bo nibavuge.”

Babuwa Samson amaze imyaka ine ageze mu Rwanda, aho yageze mu mwaka w’imikino wa 2016/17, agakinira ikipe ya Sunrise FC kugeza muri Gicurasi uyu mwaka.

Uyu Munya-Nigeria ni we watsinze ibitego byinshi (15) mu mwaka ushize w’imikino wa 2019/20, mu mikino 23 yabazwe kuko shampiyona yashojwe imburagihe kubera icyorezo cya Coronavirus.

Bivugwa ko Simba SC yifuza Babuwa Samson ariko Kiyovu Sports yatangaje ko atagurishwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .