Girumugisha wakiniraga Al Hilal SC yo muri Sudani, ni umwe mu bakinnyi bakomeye bavuzwe cyane ku isoko ry’abakinnyi ryo muri iyi mpeshyi, kuko yifuzwaga n’amakipe akomeye.

Gusa Al Ahli Tripoli yo muri Libya yagaragaje intambwe kurenza andi makipe, ndetse imwifashisha mu mikino ya gicuti, gusa itinda kumusinyisha kuko hari ibiganiro byari bitararangira n’ikipe ye.

Mu ijoro ryo ku wa Mbere, tariki ya 17 Kanama 2026, yerekanywe nk’umukinnyi mushya wa Al Ahli Tripoli akazayikinira mu gihe cy’imyaka ibiri, ari na ko asezera ku ikipe yahozemo bidasubirwaho.

Yagize ati “Buri rugendo rugira ibyarwo, uyu munsi urwanjye rugeze ku iherezo, nyuma y’imyaka itatu muri iyi kipe. Ndashaka gushimira byimazeyo ikipe nahozemo ya Al Hilal SC, Perezida wayo, abakinnyi, abatoza, n’undi wese wabigizemo uruhare by’umwihariko abafana.”

“Mwarakoze kungirira icyizere, kumba iruhande mugatuma igihe maze hano kimbera umunezero n’ibyo ntazibagirwa byinshi. Byari iby’agaciro kwambara ikirango cya Al Hilal SC.”

Nubwo hatatangajwe amafaranga yatanzwe kuri uyu mukinnyi, bivugwa ko Al Ahli Tripoli yamutanzeho ibihumbi 850$ [1.248.361.850 Frw], ikamwambura andi makipe arimo na Young Africans SC yo muri Tanzania.

Girumugisha ni we wabaye umukinnyi mwiza muri BK Pro League mu mwaka ushize w’imikino wa 2025/26, nyuma yo gufasha ikipe ye kwegukana iyi Shampiyona y’u Rwanda.

Asanze iyi kipe yo muri Libya ikinamo Umunyarwanda Manzi Thierry, wanafashije iyi kipe kwegukana Igikombe cya Shampiyona cya 2025/26 n’Igikombe kiruta ibindi muri Libya.

Girumugisha ni umukinnyi w'ingenzi waguzwe na Al Ahli Tripoli

Girumugisha Jean Claude wakiniraga Al Hilal SC yerekanywe muri Al Ahli Tripoli yo muri Libya

Al Ahli Tripoli irimo Manzi yegukanye Igikombe cya Shampiyona iheruka muri Libya