00:00:00 IGIHE NETWORK KN KINYARWANDA EN ENGLISH FR FRANCAIS

Kera kabaye Copa América igiye kugaragaramo abasifuzi b’abagore

Yanditswe na Eric Tony Ukurikiyimfura
Kuya 27 May 2024 saa 07:32
Yasuwe :

Impuzamashyirahamwe y’Umupira w’Amaguru muri Amerika y’Epfo (CONMEBOL) yatangaje ko Copa América izaba mu kwezi gutaha, izaba igikombe cya mbere cyo kuri uyu Mugabane kigaragayemo abasifuzi b’abagore.

Copa América y’uyu mwaka, iteganyijwe kuva tariki ya 20 Kamena kugeza ku ya 14 Nyakanga, izabera muri Leta Zunze Ubumwe za Amerika aho izaba irimo abasifuzi 101 barimo abagore umunani.

Edina Alves wo muri Brésil na Maria Victoria Penso wo muri Leta Zunze Ubumwe za Amerika bazaba ari abasifuzi bo hagati mu gihe Tatiana Guzman wo muri Nicaragua azaba akoresha ikoranabuhanga ry’amashusho [VAR].

Umunya-Brésil Neuza Back, Mary Blanco wo muri Colombia, Migdalia Rodriguez wo muri Venezuela n’Abanyamerika Brooke Mayo na Kathryn Nesbitt, bose bazaba ari abasifuzi bo ku ruhande.

Mu itangazo rya CONMEBOL, iyi Mpuzamashyirahamwe yagize iti "Ni icyemezo kidasanzwe kandi cyumvikana cyafashwe na CONMEBOL kuva mu 2016, kigamije iterambere no kwinjiza mu mwuga abagore benshi haba mu kibuga no hanze yacyo, duteza imbere uburinganire mu marushanwa atandukanye."

Mu 2021, Alves yabaye umugore wa mbere wasifuye irushanwa ry’abagabo mu Gikombe cy’Isi cy’Amakipe. Back na Nesbitt basifuye imwe mu mikino y’Igikombe cy’Isi cya 2022 muri Qatar.

Penso, Mayo na Nesbitt batoranyijwe kandi mu bazasifura ruhago mu Mikino Olempike ya 2024 izabera mu Bufaransa mu mpeshyi.

Edina Alves wo muri Brésil ni umwe mu bazasifura Copa América ya 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .