Jenoside yagabanyije ihangana rya Kiyovu Sports na Rayon Sports, risimburwa n’irya APR FC

Yanditswe na Eric Tony Ukurikiyimfura
Kuya 14 Mata 2019 saa 09:54
Yasuwe :
0 0

Benshi bazi umupira w’amaguru mu Rwanda guhera mu 1965 bazakubwira ko amakipe ya Kiyovu Sports na Rayon Sports yari afitanye ubukeba bwo ku rwego rwo hejuru, aho ngo umukino wayahuzaga yombi, ari wo warebwaga n’abafana benshi mu rwa Gasabo.

Gasingwa Michel ni umwe mu bafite izina rikomeye muri ruhago y’u Rwanda, aho yabaye Umunyamabanga Mukuru mu Ishyirahamwe ry’Umupira w’Amaguru mu Rwanda, FERWAFA, aba umusifuzi ku rwego mpuzamahanga ndetse akaba yarakiniye ikipe ya Kiyovu Sports mbere ya Jenoside yakorewe Abatutsi mu 1994.

Mu kiganiro yagiranye na IGIHE, Gasingwa yavuze ko Jenoside yakorewe Abatutsi mu 1994 yatumye ubukeba bwari hagati y’amakipe yari akunzwe cyane, Kiyovu Sports na Rayon Sports, bugabanuka bitewe n’uko yombi yatakaje abakinnyi n’abayobozi muri aya mahano yagwiriye u Rwanda maze bituma APR FC yashinzwe muri icyo gihe, ihita isimbura Kiyovu Sports mu guhangana na Rayon Sports.

Ati “Icyo gihe ubukeba bwari bukomeye hagati ya Rayon Sports na Kiyovu Sports nubwo hari Panthère Noirs yari mu makipe akomeye atwara ibikombe. Guhangana kwari hagati y’amakipe yombi muri iyo myaka kugeza mbere gato ya Jenoside yakorewe Abatutsi mu 1994.”

“Nyuma yaho nibwo ibintu byatangiye guhinduka kuko APR yahise yinjira mu makipe itangirana imbaraga nyinshi mu gihe izo kipe zabanje gusa n’aho zigwa kubera ibyari byarabaye mu Rwanda, zatakaje abakinnyi benshi banyuranye (bamwe bahitanywe na Jenoside), abandi baragenda (mu mahanga), noneho APR ije, iza yiyubaka kurenza ayo makipe, ku buryo n’umukinnyi ukomeye ariyo yamufataga.”

Gasingwa asanga ariho ubukeba bwahise bwimukira hagati ya APR FC yari ije ifite imbaraga nyinshi na Rayon Sports yashoboye guhita yongera kwiyubaka bidatinze, ikabona abakinnyi bakomeye.

Ati “Ubukeba bwahise bwimukira hagati ya APR FC na Rayon Sports kuko Rayon yarongeye iriyubuka, isa n’aho ikomeye kuko yari yaramaze kugira abafana benshi mu gihugu bituma yongera kwiyubaka vuba ugereranyije na Kiyovu.”

Gasingwa uyobora komisiyo y’imisifurire muri FERWAFA, yakomeje avuga ko n’ubwo ubu bukeba bwari bumaze kwimuka, butafashe isura ya nyayo y’ubwari buhari hagati ya Kiyovu Sports na Rayon Sports zahanganaga nk’amakipe y’abasivili.

Ati “Ugereranyije ubukeba bwari buhari mbere n’ubwa APR na Rayon Sports, wasangaga bidasa neza (guhangana kw’ikipe ya Gisirakare n’iya gisivili). Gusa ntibyabujije gukomera guhera muri za 1995 kugeza mu 2002 na 2003 gutyo kuko APR FC wasangaga itemera ko yatsindwa n’ikipe y’abasivili, na Rayon Sports na yo idashaka gutsindwa.”

Uburyo Rayon Sports na Kiyovu Sports zagizweho ingaruka na Jenoside yakorewe Abatutsi mu 1994

Ubwo Jenoside yakorewe Abatutsi mu 1994 yabaga , Rayon Sports yari mu marushanwa Nyafurika, aho yari imaze gusezerera Al-Hilal yo muri Sudani, yabuze amahirwe yo gukomeza mu cyiciro gikurikiyeho bitewe n’ibihe u Rwanda rwarimo, maze iterwa mpaga na Kenya Breweries mu ijonjora rya kabiri rigana muri ¼ cya CAF Winners Cup.

Iyi kipe yatakaje abakinnyi barimo Murekezi Raphael Alias Fatikaramu, Munyurangabo Rongin, Bosco (Mwene Ruterana), Kirangi, Misili, Abba, Rutabingwa, Kalisa, Kayombya Charles, Mazina, George na Nyirirugo Antoine ndetse n’abari muri komite barimo Mujejende Bénoît, Agronome Janvier, Kayombya Selesi, Munyamasheke na Viateur.

Uretse kubura Karemera Camille wari umuyobozi muri iyi kipe yari imaze iminsi mike isezerewe na EEPCO F.C yo muri Ethiopia muri CAF Champions League, umuryango w’Abayovu watakaje kandi abarimo; Rudasingwa Martin bitaga ‘Kunde’, Nkusi Octatus bitaga ‘Moro’, Kanyandekwe Norbert bitaga ‘Pilote’, Kagabo Innocent, Nyirinkindi Pacifique, Zingiro, Mayeri watozaga abana ba Kiyovu na Gukuni.

Kiyovu Sports iheruka kwegukana shampiyona mbere Jenoside yakorewe Abatutsi mu 1994, ho yatwaye iki gikombe inshuro enye. Rayon Sports yo yegukanye igikombe cya shampiyona inshuro umunani, zirimo ebyiri za mbere ya Jenoside mu gihe APR FC yo imaze kwegukana shampiyona y’u Rwanda inshuro 17 uhereye mu 1995.

Rayon Sports yo mu 1993 kuri Stade Amahoro
Kiyovu Sports yo mu myaka ya za 90 yari ikipe ikomeye mu Rwanda
Gasingwa Michel uyobora Komisiyo y'abasifuzi muri FERWAFA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza