Irambona Eric yavuze uko yakiriwe muri Kiyovu Sports n’uko yiteguye gutozwa na Karekezi Olivier

Yanditswe na Kabera Haruna
Kuya 17 Nyakanga 2020 saa 04:28
Yasuwe :
0 0

Myugariro w’ibumoso uheruka kugurwa na Kiyovu Sports, Irambona Eric, yavuze ko yishimiye uko yakiriwe muri iyi kipe ndetse yizeye ko kongera gukorana n’umutoza Karekezi Olivier bizaba ari ibintu byiza.

Irambona ni umukinnyi wa Kiyovu Sports kuva mu mpera za Gicurasi, aho yayigezemo avuye muri Rayon Sports.

Mu gihe siporo y’umuntu ku giti cye imaze ukwezi kumwe ikomorewe, Irambona ari mu bakinnyi bakomeje gukora imyitozo kugira ngo umwaka utaha w’imikino uzatangire ari ku rwego rwiza.

Ku wa Kane, Irambona yitoreje ku Mumena, aho Kiyovu Sports isanzwe ikorera imyitozo, ikanahakirira imikino. Yahasanze Ishimwe Saleh na we uherutse kongera amasezerano mu ikipe y’Urucaca.

Mu kiganiro yagiranye na IGIHE, Irambona Eric, yavuze ko yishimiye gukina mu ikipe imeze nk’ umuryango kandi ifite amateka.

Ati” Ni ikipe nziza ifite amateka, ikipe ifite ibintu byinshi ihuriyeho n’iyo nahozemo. Ni ikipe imeze nk’umuryango. Ni ibintu byiza kuri njyewe kandi banyakirirye neza, nisanze mu muryango ushimishije”.

Abajijwe uko abona umutoza Olivier Karekezi ugiye kongera kumutoza nyuma yo gukorana na we muri Rayon Sports, Irambona yavuze ko bishimishije kuko ari umutoza mwiza uhora yifuza intsinzi.

Ati "Kugeza ubu amakuru numva kenshi ni uko Kiyovu Sports ishobora gutozwa na Karekezi, ni umutoza mwiza twabanye, ni umutoza ushaka intsinzi, uzi gutsinda. Ikipe Karekezi atoza ni ikipe ifite ikirango cyo gutsinda ntekereza ko byaba ari byiza gotozwa na Karekezi muri iyi myaka”.

Irambona Eric yijeje abafana ba Kiyovu Sports ko azabaha ibyo afite 100% kandi ko kuba iyi kipe yaraguze abakinnyi beza bitanga icyizere ku bakunzi bayo.

Yahishuye ko kubera icyorezo cya Covid-19, muri gahunda ya Guma mu Rugo, yari yarabyibushye cyane ariko ubu akaba yarasubiye uko yanganaga ubwo bakinaga Shampiyona.

Irambona Eric yasinye imyaka ibiri muri Kiyovu Sports, avuye muri Rayon Sports yari amazemo imyaka umunani, akaba ari we mukinnyi wari uyimazemo igihe kirekire.

Irambona Eric yakoreye imyitozo ku Mumena, aho Kiyovu Sports isanzwe yakirira imikino yayo
Irambona mu myitozo yo kumusubiza ku rwego rwiza mbere y'uko ibikorwa by'imikino bikomorerwa
Ishimwe Saleh uheruka kongera amasezerano muri Kiyovu Sports, na we yakoreye ku Mumena
Irambona asimbuka mu kirere nk'ugiye gutera umupira n'umutwe
Ishimwe Saleh na Irambona bigeze kubana muri Rayon Sports
Irambona avuga ko muri Guma mu Rugo yari yariyongereye ibilo, ariko amaze kubigabanya
Irambona yiteze ko Kiyovu Sports izaba itozwa na Karekezi Olivier, izaba ari ikipe ikomeye

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .