00:00:00 IGIHE NETWORK KN KINYARWANDA EN ENGLISH FR FRANCAIS

Inshuti zabaye inzigo: Uko Mashami yashwanye na Twizerimana Onesme kugeza amwirukanye muri Police FC

Yanditswe na Musangwa Arthur
Kuya 9 Mutarama 2023 saa 11:44
Yasuwe :

Kwirukanwa kwa rutahizamu Twizerimana Onesme wari inkoramutima y’Umutoza Mashami Vincent haba muri Police FC no mu Ikipe y’Igihugu ‘Amavubi’, ntibivugwaho rumwe dore ko ari we mukinnyi wari uhagaze neza mu ikipe y’abashinzwe umutekano aho yari amaze gutsinda ibitego bitanu mu gice kibanza cya Shampiyona.

Twizerimana Onesme yerekeje muri Police FC tariki 6 Nyakanga 2021 aguzwe miliyoni 10 Frw, asinya amasezerano y’imyaka ibiri, avuye muri Musanze FC aho yari asigaranye amezi atandatu gusa ku masezerano ye.

Mu biganiro byabaye hagati y’impande zombi, Musanze FC yemeye gusubizwa miliyoni 5 Frw yari yaraguze uyu rutahizamu muri Mukura Victory Sports muri 2019 hanyuma ikindi gice gihabwa Twizerimana na we yemera kwerekeza mu Mujyi wa Kigali yemye.

Uyu rutahizamu yari umukinnyi ngenderwaho muri Police FC muri uyu mwaka dore ko ari we wari umaze kuyitsindira ibitego byinshi mu gice kibanza cya Shampiyona bigera kuri bitanu.

Twizerimana ni we wari amahitamo ya nyuma muri ba rutahizamu ba Police FC, ariko yahawe umwanya kubera ko abandi barimo Iyabivuze Osée, Usengimana Danny na Ndayishimiye Antoine Dominique bagowe n’ibibazo by’imvune mu ntangiriro za Shampiyona byatumye igorwa no kubona inshundura ndetse igera ku munsi wa gatatu itarabona igitego.

Police FC ishinja Twizerimana imyitwarire mibi itaramenywe na benshi kubera kwirinda kwangiza isura y’ikipe, amabaruwa asaba imbabazi yanditswe ku bwinshi n’uyu rutahizamu gusa na none mu gikari, ibiganiro bye na Musanze FC bikomeje kujya mbere rwihishwa.

Twizerimana Onesme ari mu biganiro na Musanze FC ashobora gukinira imikino yo kwishyura ya Shampiyona

Byose byatangiye muri Shampiyona y’umwaka w’imikino ushize ubwo uyu rutahizamu atifashishwaga bihoraho n’umutoza w’Umunya-Écosse, Frank Nuttall, washyiraga imbere cyane Iyabivuze Osée, Usengimana Danny na Ndayishimiye Antoine Dominique.

Twizerimana yasabye umutoza we ko yamureka akisubirira muri Musanze FC. Icyo gihe Nuttal yamusabye kwihangana agakora cyane agahatanira umwanya kuko we adashingira ku mazina ahubwo ari ibyo yabonye mu myitozo. Uyu mukinnyi yakomeje gukina ariko afite intugunda ku mutima.

Nuttal utarihanganiraga imyitwarire mibi, yababajwe cyane no kumva muri Kamena 2022, mu kiruhuko nyuma yo gusoza Shampiyona y’umwaka ushize, Twizerimana Onesme yakinnye irushanwa rya gicuti mu Mujyi wa Musanze ryiswe iryo ‘’Kurwanya ibiyobyabwenge’’ nta ruhushya yabisabiye.

Twizerimana wakiniye ikipe ya CETRAF (uruganda rw’ibyo kunywa bisembuye) icyo gihe, yasabwe kwandikira Police FC asaba imbabazi kugira ngo acururutse uburakari bw’umutoza we wamusabiraga kwirukanwa.

Ibi yarabikoze aguma mu ikipe yamuhagaritse igihe itatangaje. Iki gihe cyarangiranye n’itandukana rya Police FC n’umutoza Frank Nuttal, hazanwa Mashami Vincent.

Mbere y’uko Shampiyona y’uyu mwaka w’imikino itangira ni bwo Police FC yasinyishije Umutoza Mashami Vincent wari umaze gutandukana n’ikipe y’Igihugu Amavubi. Kubera ubunararibonye afite bwo gutoza amakipe makuru ndetse n’abakinnyi bakomeye, ubuyobozi bw’ikipe bwamubonagamo icyizere cyo kuzayigeza ku ntego zayo.

Mashami yaguze abakinnyi bafite amazina abyibushye muri ruhago Nyarwanda barimo Mugiraneza Jean Baptiste ‘’Migi’’ yakuye muri KMC yo muri Tanzania, Emery Mvuyekure wavuye muri Tusker FC yo muri Kenya, Nkubana Marc wavuye muri Gasogi United, Shami Carnot wakiniraga ’The Winners’ yo mu Cyiciro cya Kabiri, Ruhumuriza Patrick wazamukiye muri Interforce FC na Rurangwa Moss wakiniraga AS Kigali.

Aba bose baje bahasanga andi mazina yari asanzwe muri Police FC, iyi kipe itangira kugaragara nk’ishobora kuzatanga akazi gakomeye muri iyi Shampiyona dore ko yari igizwe na benshi mu bakinnyi n’umutoza baciye mu Ikipe y’Igihugu “Amavubi”.

Tariki ya 17 Kanama 2022, ubwo ubuyobozi bukuru bwa Police FC bwerekanaga abakinnyi n’abayobozi bashya, Chairman wayo, ACP Yahya Mugabo Kamunuga, yatangaje ko akurikije ikipe bafite, muri uyu mwaka wa shampiyona intego ari ukwegukana ibikombe.

Twizerimana Onesme (iburyo) yari umukinnyi ngenderwaho muri Police FC ndetse yanifashishwaga mu kwerekana imyenda y'ikipe

Burya koko ngo amaboko atazaguha mu iterura uyabona mu iramukanya!

Mashami Vincent wasanze Twizerimana Onesme yarasabye umutoza wamubanjirije kumurekura agasubira muri Musanze FC, yakomezaga kubibwirwa n’abakinnyi ko umutima wa mugenzi wabo utari muri Police FC.

Gusa, yaba umutoza ndetse n’umukinnyi bibonanagamo cyane kuko no mu Ikipe y’Igihugu, Mashami yamuhamagaraga kenshi n’aho byabaga ngombwa ko atabyumvikanaho na benshi akamuremamo icyizere kandi akitwara neza igihe yabaga yitabajwe.

Ni nako byaje kugenda, Mashami yagerageje kumuganiriza aremamo icyizere Twizerimana yasanze yicara ku ntebe y’abasimbura, amuha umwanya wo gukina ndetse atangira kuba inyenyeri yahetse Police FC kugeza ubwo ayitsindira ibitego bitanu muri 13 iyi kipe yinjije mu gice kibanza cya Shampiyona.

Mu Ukwakira 2022, uyu rutahizamu yafashwe na Police y’Igihugu ishami rya Kicukiro nyuma yo gutwara imodoka yanyoye ibisindisha maze afungwa iminsi itanu.

Gusa, ibi byagizwe ibanga kubera kwirinda kwangiza isura y’ikipe, nyuma yo gufungurwa Twizerimana yandikiye ikipe ye ayisaba imbabazi arababarirwa bigizwemo uruhare n’umutoza we Mashami Vincent, umuvu ntiwamutembana akomeza akazi nk’ibisanzwe.

Nyuma y’umukino w’umunsi wa munani wa Shampiyona, tariki 5 Ugushyingo 2022, Police FC yakiriwemo ndetse ikanganya na Marines FC igitego 1-1 kuri Stade Umuganda, ubwo ikipe yari igarutse i Kigali, abakinnyi bahawe ikiruhuko cy’umunsi umwe gusa maze tariki 7 Ugushyingo biba ngombwa ko babyukira mu myitozo kuri Stade ya Kigali.

Ubwo imyitozo yo kongera imbaraga yari igeze hagati, Mwambari Serge uyikoresha, yumvise ijwi rya Twizerimana Onesme wari utangiye kwinubira imyitozo bari gukora abwira bagenzi be ati ‘’Ese ko batwirukansa gutya twanganyije ubwo nidutsindwa bazadukoresha bingana iki’’, yerekana ko imyitozo akomeje kubakoresha imugoye cyane. Ibi byababaje cyane abatoza ba Police FC babonaga ko urutugu rutangiye gusumba ijosi.

Uko ibi byabaga byose, abatoza ba Police FC babonaga ko uyu musore akomeje kubananiza mu rwego rwo gushakisha inzira yamusubiza muri Musanze FC aho yagiriye ibihe byiza no kongera gusubirana na Tuyishimire Placide, umuyobozi w’iyi kipe yo mu Majyaruguru basanzwe banafitanye umubano mwiza.

Umutoza Mashami Vincent wari warahagaze kuri rutahizamu we, yatangiye guta icyizere tariki 10 Ukuboza 2022 mu mukino w’umunsi wa 13 wa Shampiyona aho abatoza ba Police FC bashinje Twizerimana kwihesha ikarita abigambiriye.

Twizerimana Onesme wari rutahizamu ngenderwaho muri Police FC, kuri ubu ari hanze y'ikipe

Niba warigeze kumva inkuru ya José Mourinho watozaga Inter Milan watengushywe n’uwahoze ari rutahizamu we Mario Balotelli ubwo bahuraga na FC Rubin Kazan muri UEFA Champions League yo muri Nzeri 2009, bisa neza n’ibya Twizerimana Onesme n’umutoza we Vincent Mashami mbere yo guhura na Kiyovu Sports kuri Stade ya Kigali.

Mbere y’umukino, Mashami wari usigaje uyu musore nka rutahizamu rukumbi, yamusobanuriye ko ari we ikipe itezeho ibitego kuko bagenzi be batatu bafite ibibazo by’imvune, aba ni Usengimana Danny, Ndayishimiye Antoine Dominique na Iyabivuze Osée. Akomeza kumusaba kwitwararika ni yo bamushotora akagerageza kwihangana kuko yari afite amakarita abiri y’umuhondo, yirinda kwihesha iya gatatu yari kuzamubuza gukina umukino bari bafitanye na Mukura Victory Sports i Huye.

Uyu mukino Police FC yaje kuwutsindwa ku gitego 1-0 cya rutahizamu w’Umugande Erisa Ssekisambu ku munota wa 74.

Mu ntangiriro z’umukino, ku munota wa 18, Twizerimana yakoreye ikosa rya mbere kuri Nsabimana Aimable amurashye amaguru n’imbaraga nyinshi amuturutse inyuma, umusifuzi Nkinzingabo Jean Marie Vianney aramwihanangiriza ntiyagira ikarita amuha.

Ikosa risa n’iryo yararyongeye ku munota wa 48 imbere y’umusifuzi mu kibuga hagati ubwo yari atakaje umupira, ufashwe na Kapiteni wa Kiyovu Sports Serumogo Ally, Twizerimana amuturuka inyuma na none amuraha amaguru amushyira hasi, umusifuzi ahita azamura ikarita y’umuhondo.

Iyi karita yaje isanga andi abiri yari afite biba ngombwa ko asiba umukino ukurikiyeho. Nyuma y’iyi karita, umutoza Mashami yipfutse mu maso yibutse amagambo yabwiye rutahizamu we mbere y’umukino akaza kumutenguha.

Nyuma y’umukino, Twizerimana yabwiye abatoza be ko yagize imvune mu rutugu nyamara nta raporo y’abaganga yakozwe, ntiyongera kugaruka mu myitozo ukundi kugeza ubwo ikipe yasubukuraga imyitozo yitegura imikino yo kwishyura tariki 4 Mutarama 2023.

Kuri aya makosa, abatoza ba Police FC bamushinjije kwihesha ikarita ku bushake kugira ngo asibe umukino wa Mukura Victory Sports et Loisir wari ugiye gukurikiraho tariki 17 Ukuboza 2022 i Huye ndetse banatsinzwe ku gitego 1-0, kugira ngo azakine uwagombaga gukurikira uyu tariki 21 Ukuboza kuri Stade Ubworoherane na Musanze FC maze yemeze Perezida wayo, Tuyishimire Placide, bari bakomeje ibiganiro.

Ibi byatumye ku mukino wa Musanze FC, abatoza ba Police FC bafata umwanzuro wo kumushyira hanze ntiyabanza no ku ntebe y’abasimbura.

Uyu mukino barawunganyije igitego 1-1. Igitego cya Police FC cyatsinzwe na Usengimana Danny ku munota wa 77 cyaje kishyura icya Nshimiyimana Imran wa Musanze FC wakibanje ku munota wa 21 w’umukino.

Amakuru yizewe agera kuri IGIHE avuga ko mbere yo gufata icyemezo cyo gusezerera Twizerimana, ubuyobozi bwa Police FC bwigiriye inama yo kumutiza mu ikipe nto yayo yo mu Cyiciro cya Kabiri, Interforce FC, gusa buza kwisubiraho kuko bwaje gusanga kitari kuba igisubizo cy’imyitwarire ye ahubwo buhitamo kumusezerera burundu.

Twizerimana yirukanywe na Police FC
Muri Kamena, Twizerimana yagiye gukina irushanwa ryo kurwanya ibiyobyabwenge mu Mujyi wa Musanze atabisabiye uburenganzira bimuviramo guhanwa na Police FC
Uyu musore yari afite ibitego bitanu mu mikino y'igice kibanza cya shampiyona
Mu ikipe ya Police FC yabanje mu kibuga ku mukino wa Musanze FC, Twizerimana Onesme ntabwo yitabajwe kubera amakuru amwerekezayo abatoza bamenye mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .