00:00:00 IGIHE NETWORK KN KINYARWANDA EN ENGLISH FR FRANCAIS

Infantino yahishuye uko u Rwanda rwamubereye isomo ryo kudacika intege yiyamamariza kuyobora FIFA

Yanditswe na Igirubuntu Darcy
Kuya 16 March 2023 saa 10:54
Yasuwe :

Perezida w’Ishyirahamwe ry’Umupira w’Amaguru ku Isi, Gianni Infantino, yavuze ko amateka u Rwanda rwanyuzemo n’uko rumaze kwiyubaka yamubereye isomo ryatumye adacika intege ubwo yiyamamarizaga kuyobora FIFA mu 2016.

Yabigarutseho kuri uyu wa Kane, tariki ya 16 Werurwe 2023, ubwo yafunguraga ku mugaragaro Inteko Rusange ya 73 ya FIFA iteraniye muri BK Arena mu Mujyi wa Kigali.

Iyi nteko ni na yo byitezwe ko aza kwemerezwamo nka Perezida mushya wa FIFA muri manda y’imyaka ine iri imbere, ni iya gatatu mu zo yemerewe n’amategeko.

Infantino yavuze ko ubwo yiyamamazaga bwa mbere kuyobora FIFA, u Rwanda rwari ruri kwakira Shampiyona Nyafurika ihuza abakinnyi bakina imbere mu bihugu byabo (CHAN 2016).

Icyo gihe yarebye umukino wa mbere w’iri rushanwa wahuje Ikipe y’u Rwanda “Amavubi” na Côte d’Ivoire, warangiye Amavubi atsinze igitego 1-0 cya myugariro Bayisenge Emery.

Infantino kandi yarebye umukino wa nyuma, Repubulika Iharanira Demokarasi ya Congo yatsinzemo Mali ibitego 3-0.

Ubwo yagarukaga mu Rwanda ngo yabwiwe ko atazashyigikirwa muri kandidatire ye, acika intege yumva yabivamo.

Amagambo y’urucantege yabwiwe yatumye atekereza ku rugendo rw’u Rwanda rwo kwiyubaka na we yiremamo icyizere.

Yakomeje ati “Mbitekerezaho, nibuka uruzinduko nagiriye ku rwibutso [mwese mukwiriye kujya gusura urwibutso], ndavuga nti ’ndi nde wo gucika intege’, ibyo iki gihugu cyanyuzemo, uko cyiyubatse, ni ibintu biha icyizere uwo ari we wese.”

Infantino yavuze ko u Rwanda rwiyubatse ruhereye ku busa, ariko rubikesheje umuhate ndetse n’ubuyobozi bwiza kandi uyu munsi abantu benshi bitabiriye iyi nama ya FIFA bazagaruka kurusura.

Ku wa 26 Gashyantare 2016, ni bwo Gianni Infantino wari usanzwe ari Umunyamabanga Mukuru w’Impuzamashyirahamwe y’Umupira w’Amaguru ku Mugabane w’u Burayi yatorewe gusimbura Sepp Blatter wari Perezida wa FIFA kuva mu 1998.

Muri aya matora yabereye i Zurich mu Busuwisi, Infantino yatowe ku majwi 115 kuri 207 y’abatoye hitabajwe icyiciro cya kabiri.

Infantino ukomoka mu Butaliyani ni Perezida wa cyenda mu mateka ya FIFA.

Perezida wa FIFA, Gianni Infantino, yashimye u Rwanda uko rwamugaruriye icyizere mu gihe yari amaze gucika intege
Infantino yavuze ko u Rwanda rufite isano ikomeye kuri we by'umwihariko kuko amateka yarwo yatumye adacika intege

Kanda hano urebe andi mafoto menshi.

Amafoto: Igirubuntu Darcy

Video: Mucyo Jean Regis


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .