INEOS Europe yahagaritse umushinga wo kubaka ishuri rya ruhago mu Rwanda

Yanditswe na Ntabareshya Jean de Dieu
Kuya 26 Gashyantare 2021 saa 05:06
Yasuwe :
0 0

INEOS Europe yahagaritse umushinga wo kubaka ishuri rya ruhago mu Rwanda no muri Botswana ryari rigamije iterambere ry’umupira w’amaguru mu gihugu no mu Karere k’Afurika y’Iburasirazuba.

Kubaka ibi bigo mu Mujyi wa Kigali no muri Botswana bigendanye n’amasezerano yashyizweho umukono n’amashyirahamwe y’umupira w’amaguru ku bihugu byombi muri Gicurasi na Kamena 2019.

Intego yo kubaka aya mashuri byari mu buryo bwo guha amahirwe abakiri bato kubona ubufasha nkenerwa ku ruhando mpuzamahanga bitagombye kuva mu bihugu byabo no guteza imbere umupira w’amaguru.

Binyuze mu bwumvikane bw’amashyirahamwe yo mu Rwanda na Bostwana ku bufatanye na za guverinoma, byari biteganyijwe ko hazagenwa ubutaka aho ibi bikorwa bizubakwa, naho uru ruganda rukora imiti rw’umwongereza Jim Ratcliffe rukazatera inkunga uwo mushinga mu bikorwa by’ubwubatsi.

Ishyirahamwe ry’umupira w’amaguru mu Rwanda, Ferwafa ryemeje ko uyu mushinga wahagaze bitewe ahanini n’ihungabana mu bukungu kubera Covid-19 rishobora kuba ryarageze kuri uru ruganda nkuko Umunyamabaga wa Ferwafa Uwayezu Francois Regis yabitangarije PanAfrican Football.

Ati “INEOS yahagaritse umushinga ku mpamvu za COVID-19 mu bikorwa by’ubucuruzi.”

Muri iyi gahunda byari biteganyijwe ko hazubakwa ibibuga by’ubwatsi bw’ubukorano n’ibyubwatsi karemano, inzu zikorerwamo siporo ngororamubiri[gyms], ibice by’ubuvugizi, amashami y’imyigishirize,ibiro, aho kumesera, uburiro n’amacumbi y’abanyeshuri bangana na 96 n’abandi.

Uwayezu yashimangiye ko ihagarara ry’umushinga ari igihombo gikomeye.

Ati “Ni igihombo gikomeye kubona u Rwanda rubuze uyu mushinga wari witezweho kuzamura impano z’umupira w’amaguru mu gihugu no mu karere. Nta yandi mahirwe azongera kubaho ko byasubukurwa.”

Hari amakuru avuga ko uyu mushinga wakuwe muri ibi bihugu byombi, ni ukuvuga u Rwanda na Botswana ukajyanwa muri Côte d’ivoire n’ubwo INEOS itarabitangaza.

INEOS ni uruganda rutunganya ibintu bitandukanye birimo ibikomoka kuri peteroli n’imiti, gusa igira ibindi bikorwa bisaga 38 biyishamikiyeho.

Ku Isi rukorera mu bihugu bisaga 29, rwinjiza byibuze miliyari 61 $ buri mwaka kandi rukoresha abakozi basaga 26 000.

Umushinga wa INEOS wari witezweho guteza imbere impano za ruhago

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .