00:00:00 IGIHE NETWORK KN KINYARWANDA EN ENGLISH FR FRANCAIS

Imvune ya Lionel Messi ihangayikishije Paris Saint-Germain

Yanditswe na Bukuru JC
Kuya 21 Nzeri 2021 saa 05:04
Yasuwe :
0 0

Lionel Messi yakuwe mu bakinnyi ba Paris Saint-Germain bazakina na Metz mu mukino wa Shampiona y’Icyiciro cya Mbere mu Bufaransa uzaba ku wa Gatatu ndetse hari impungenge ko imvune yo mu ivi afite yaba ikomeye igatuma adakina umukino wa Champions League na Manchester City mu cyumweru gitaha.

Kuri uyu wa Kabiri nibwo Paris Saint-Germain yatangaje ko Messi yanyujijwe mu cyuma bikagaragara ko yagize ikibazo mu igufa ryo mu ivi ry’ibumoso.

Iyi kipe yatangaje ko andi makuru ajyanye n’uko Lionel Messi amerewe azashyirwa ahagaragara mu masaha 48 ari imbere. Gusa, hari impungenge ko iyi mvune yaba ikomeye kandi PSG ifite umukino izahuramo na Manchester City mu cyumweru gitaha.

Paris Saint-Germain izabanza kwakira Montpellier ku wa Gatandatu muri Shampiona mbere yo guhura na Manchester City nyuma y’iminsi itatu mu mukino w’umunsi wa kabiri w’amatsinda ya UEFA Champions League.

Lionel Messi ntiyahiriwe n’intangiriro ze muri PSG, kuva avuye muri FC Barcelone yari amazemo imyaka 21, aho kugeza ubu nta gitego aratsinda mu mikino itatu.

Yavunitse mu gihe ku mukino wa Lyon wabaye ku Cyumweru ndetse yasimbujwe n’umutoza Mauricio Pochettino kuri uyu mukino wari uwa mbere akiniye mu rugo kuri Parc des Princes.

Messi yakuwe mu kibuga ku munota wa 76, agaragara areba nabi umutoza Pochettino ubwo yasimburwaga ndetse ntiyigeze amuha ikiganza ubwo yageraga hanze y’ikibuga.

Hejuru y’ibyo, uyu mugabo w’imyaka 34 yazamuye ikiganza cye mu kwerekana ko atigeze yishimira icyemezo cya Pochettino bavuka mu gihugu kimwe cya Argentine.

Kuri ubu, amaze kugaragara mu mikino itatu ya PSG, akina igiteranyo cy’iminota 190, ariko aracyegereje kuyitsindira igitego cya mbere.

Uretse imvune ya Messi, Paris Saint-Germain yamaze kugarura mu myitozo abarimo Marco Verratti na Sergio Ramos witoza wenyine mu gihe ari gukiruka imvune.

Paris Saint-Germain ni yo iyoboye urutonde rwa Ligue 1 aho yatsinze imikino yose uko ari itandatu imaze gukinwa, irimo uwo yatsinzemo Lyon ibitego 2-1 ku Cyumweru ibifashijwemo n’igitego cyinjijwe na Mauro Icardi mu minota y’inyongera.

Lionel Messi yakuwe mu bakinnyi ba PSG bazakina na Metz ku wa Gatatu kubera imune yagize mu ivi ry'ibumoso
Messi akomeje kugarukwaho mu itangazamakuru nyuma yo kugaragara atishimiye gusimbuzwa na Pochettino ku Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .