FERWAFA yasobanuye idindira rya hotel yayo n’uko amafaranga ya Maroc yashoboraga kwitwa ruswa

Yanditswe na Eric Tony Ukurikiyimfura
Kuya 26 Kanama 2020 saa 07:15
Yasuwe :
0 0

Kudatangira amafaranga igihe kw’Ishyirahamwe ry’Umupira w’Amaguru ku Isi (FIFA) n’ayari yemewe n’Ishyirahamwe ry’Umupira w’Amaguru mu Bwami bwa Maroc (FRMF) nibyo byatumye umushinga wo kubaka hoteli ya FERWAFA y’inyenyeri enye udindira.

Iyi hoteli yari kuba igizwe n’ibyumba bigera kuri 88, yatangiye kubakwa muri Kanama 2015, aho yagombaga kurangira mu mpera za 2016, ariko kugeza uyu munsi imirimo yo kuyubaka yarahagaze ndetse ntibizwi igihe izasubukurirwa.

Hoteli ya FERWAFA yagombaga kuzura itwaye miliyari 3.81 Frw, yari kuva ku baterankunga babiri b’ingenzi.

Binyuze muri gahunda ya FIFA Forward 1, Ishyirahamwe ry’Umupira w’Amaguru ku Isi ryari ryageneye FERWAFA miliyoni 2$ yo gushyigikira uyu mushinga wa hoteli.

Binyuze kandi mu bwumvikane n’umubano wari hagati ya FRMF ya Maroc na FERWAFA, bemeye ko amafaranga yabo yo muri FIFA, angana na miliyoni 2.25$, azahabwa FERWAFA ikayakoresha mu kuzuza umushinga wayo wo kubaka hoteli.

Mu kiganiro cyihariye yagiranye na IGIHE, Perezida wa FERWAFA, Rtd Brig Gen Sekamana Jean Damascène, yavuze ko kutabonekera igihe kw’amafaranga bari bemerewe na FIFA na FRMF ya Maroc aribyo byatumye imirimo ihagarara kuva mu ntangiriro za 2018.

Ati “Ukurikije ayari yateganyijwe, hari ayandi yagombaga kwiyongeraho twagombaga kwishakamo. Ubwo Hoteli yaratangiye irubakwa noneho amafaranga yacu atarashiramo, hari macye yari asigaye, bohereza muri FIFA inyemezabwishyu y’aho imirimo igeze kuko niyo yagombaga kwishyura, iravuga iti ’ariko kugira ngo tubahe asigaye, mubanze mutwereke aho muvana asigaye, mukore imirimo’.”

“Yabarwaga ko igeze kuri 50% ubwo yahagararaga. Nimukore nimugeza kuri 70% tubone kubaha ayasigaye kugira ngo birangire. Ni aho byahagarariye, ni icyo cyahagaritse inyubako kuva icyo gihe.”

Inkunga ya Maroc yashoboraga kwitwa ruswa yahawe u Rwanda

Rtd Brig Sekamana uyobora FERWAFA, yakomeje avuga ko kuba amafaranga ya Maroc na yo atarabonekeye igihe byatewe n’uko byahuriranye no kuba iki gihugu cyariyamamarizaga kuzakira Igikombe cy’Isi cya 2026, mu gihe amatora yari ateganyijwe mu mpeshyi ya 2018 ubwo habaga Igikombe cy’Isi mu Burusiya, bityo bikaba byari gufatwa nko gutanga ruswa ku bindi bihugu bizatora.

Ati “Ihagaze, urumva icyagombaga gukurikiraho ni ibiganiro, ni ugusubira gusaba Maroc ko iduha ayo mafaranga, urumva ko nayo yagombaga kuva muri FIFA.”

“Maroc uburyo yari yakoze ibintu kwari ugufashanya, ariko bihurirana n’uko igihe habaga igikombe cy’Isi mu Burusiya hagombaga gutorwa abazakira igikombe cy’Isi cya 2026, aho hari ukwihuza kw’Abanyamerika, Mexique na Canada, bahanganye na Maroc.”

“Hari ibyo Maroc yari yemereye n’ibindi bihugu bitandukanye, FIFA yababwiye ko ibyo bintu bigomba guhagarara kuko bishobora guteza ikindi kibazo. Muzi ko havugwa ruswa mu mupira w’amaguru henshi, gukumira ibyo rero mu matora, ibyo mukoresha ntibizitwe ko ari ruswa, bituma gutanga amafaranga biba bihagaze kugira ngo ibigomba gukorwa bikorwe, Inteko Rusange ya FIFA ibe, amatora abe. Nta handi amafaranga yari kuva.”

Aya matora yabaye ku wa 13 Kamena 2018, yarangiye Maroc yagize amajwi 65, itsinzwe na Leta Zunze Ubumwe za Amerika, Canada na Mexique byari byishyize hamwe, byo byagize amajwi 134.

FERWAFA yongeye gusaba ko inkunga ya Maroc yaboneka

Perezida wa FERWAFA yakomeje avuga ko nyuma y’ayo matora, bongeye gusaba Ishyirahamwe ry’Umupira w’Amaguru mu Bwami bwa Maroc ko ryabaha inkunga ryemeye kugira ngo umushinga ugezwe ku rwego FIFA yifuzaga ikabona kurekura amafaranga yayo.

Yavuze ko byasaga n’aho Maroc ibigendamo gake kugeza ubwo impande zombi zahujwe n’abo mu Ishyirahamwe ry’Umupira w’Amaguru ku Isi (FIFA).

Ati “Nyuma yaho twongeye gusubukura cya kibazo nabo, sinzi icyabiteye ariko byahise bisa n’ibihagarara bigenda biguru ntege. Kubera ko hari amasezerano twari dufitanye nabo, ibyo bintu byari byarashyizwe mu masezerano asinye, avuga ko amafaranga bagomba kuyaduha n’aho azaturuka.”

“Uko duhuye na mugenzi wanjye wa Maroc [Fouzi Lejkaa] twarabivuganaga, tukanabiganiraho akambwira ngo tuzareba, ni uko byagiye bigenda. Kubera ko yari amafaranga ya FIFA, twabagaragarije ko ubwo bwumvikane bari babuzi, baratubwira bati ‘Ese birakemuka bite?’ biba ngomba ko twicarana n’abantu ba FIFA inshuro eshatu cyangwa enye.”

Habayeho gutekereza guhindura umushinga

FERWAFA yatanze uyu mushinga muri FIFA ivuga ko iyi hoteli izabafasha gucumbikira amakipe y’igihugu y’u Rwanda mu bagabo no mu bagore kuko bibatwara amafaranga menshi iyo bari kwitegura amarushanwa mpuzamahanga, ikaba kandi yakwinjiza amafaranga mu gihe inacumbikiye abandi bantu.

Rtd Brig Sekamana yabwiye IGIHE ko nyuma yo kubona ko amafaranga ya Maroc ashobora kutaboneka kandi bikaba bigoye ko hoteli yagera ku rwego FIFA yifuza, higeze gutekerezwa uburyo uyu mushinga wahindurwa ukaba ikigo cy’imyitozo cyajya cyakira amakipe y’igihugu n’amahugurwa atandukanye arebana n’umupira w’amaguru, kuko aribyo byari gutwara amafaranga make.

Ati “Haje n’igitekerezo cyo kuvuga ngo iyi hoteli uwayihindura tukayigira centre kugira ngo tugabanye ibigabanuka. Ubwo ni ko hazamo n’ibibazo, byarahagaze uwatwubakiye amasezerano ye ararangira kandi agakomeza atwishyuza ya fagitire iri muri FIFA, ntibayishyura, agakomeza yongeraho inyungu z’ubukererwe. Twamaze imyaka ibiri turi muri icyo kibazo.”

FIFA yabyinjiyemo kugira ngo Maroc yemere kurekura amafaranga

Umuyobozi wa FERWAFA yavuze ko kuri ubu Maroc yemeye gutanga amafaranga yari yemereye Ishyirahamwe ry’Umupira w’Amaguru mu Rwanda nyuma y’uko bigizwemo uruhare na FIFA.

Ati “Byabaye ngombwa ko amafaranga ya Maroc kubera ko twasinyanye, FIFA isa n’ibyinjiramo. Ibyinjiramo iraduhuza kugeza aho ikibazo gisa n’icyakemutse muri uyu mwaka utangira. Kugira ngo nabo [FIFA] bayemeze, Maroc yagombaga kubanza kubyemeza, bikongera bikanyura mu nzego za FIFA zemeza ko ayo mafaranga agomba gusohoka kandi agahabwa u Rwanda.”

Hazongera kuba ipiganwa ku bazubaka hoteli ya FERWAFA

Nyuma yo gusesa amasezerano na China Civil Engineering Construction Company (CCECC Rwanda Ltd) yari yahawe akazi mu Ugushyingo 2016, Perezida wa FERWAFA yemeje ko kugira ngo imirimo yo kubaka hoteli yayo isubukurwe, hazabanza kongera gupiganira isoko ryo kuyubaka.

Ati “Ejo bundi fagitire twazisubiyemo n’Abashinwa bubakaga iyi hoteli, dusesa amasezerano, tubyumvikanaho twishyura fagitire twabagombaga, tuyiha FIFA irabishyura, ni ukuvuga ngo ubu ni ugutangira bushya, ni ugushyira akazi ku isoko.”

“Twabikuyemo isomo kuko twasanze buriya kutagira umutekinisiye wawe ukurikirana ibintu byaduteje ibibazo byinshi cyane ntari burondore. Amafaranga barayishyuye, ayasigaye niyo turimo kureba ko yadufasha gusubukura imirimo.”

Amakuru agera kuri IGIHE avuga ko FERWAFA yishyuye agera kuri miliyari 1.15 Frw ku bari bashinzwe kubaka iyi hoteli (China Civil Engineering Construction Company (CCECC Rwanda Ltd)) n’abashinzwe igenzura.

Hoteli izahuzwa no kubaka igicumbi cya siporo i Remera

Ishyirahamwe ry’Umupira w’Amaguru mu Rwanda rivuga ko nyuma y’uko kubaka hoteli bihuriranye na gahunda ya leta yo kubaka igicumbi cya siporo i Remera, hari ibyo bagomba kubanza kubaza kugira ngo izajyane n’ibyagenwe na Minisiteri y’ibikorwaremezo.

Ati “Byahuriranye n’uko Leta yafashe gahunda yo gukora igicumbi cya siporo hano, ubu nabyo tugomba kubanza kumvikana na Minisiteri ya Siporo nayo ikavugana n’ishinzwe ibikorwaremezo kugira ngo tuyihuze n’icyifuzo cy’uko hagomba kumera, kugira ngo noneho dukore ibyo tugomba gukora tubyohereze muri FIFA kugira ngo baduhe ya mafaranga basigaranye dukomeze inyubako."

"Ariko dusanze bitanahuye nabwo bizaba ngombwa ko twishakamo ubundi bushobozi, gusa noneho icyizere turagifite.”

Muri Mutarama uyu mwaka, Minisiteri y’ibikorwaremezo yatangaje ko agace ka Remera kazaharirwa ibikorwaremezo bya siporo zitandukanye, aho uretse Stade Amahoro na Petit Stade bizavugurwa, hazubakwa ibibuga birindwi bya Tennis, utuyira tw’amagare n’indi mikino guhera ku y’abana n’abakuru. Buri mukino kandi uzaba ufite aho kwitoreza n’aho kwakirira amarushanwa.

Igishushanyombonera cya Hoteli ya FERWAFA izaba igizwe n'ibyumba bigera kuri 88 niyuzura
Perezida wa FERWAFA, Rtd Brig Gen Sekamana Jean Damascène yabwiye IGIHE ko icyatumye habado idindira mu kubaka iyi hoteli cyamaze gukemuka
Imirimo yo kubaka hoteli ya FERWAFA yahagaze itarangiye
Sosiyete ya China Civil Engineering Construction Company (CCECC Rwanda Ltd) yubakaga Hoteli yasheshe amasezerano yari yagiranye na FERWAFA
Nyuma y'imyaka ibiri imirimo yo kubaka hoteli ihagaze, izasubukurwa nyuma y'uko FIFA ihuje FERWAFA na FRMF ya Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .