00:00:00 IGIHE NETWORK KN KINYARWANDA EN ENGLISH FR FRANCAIS

Imbamutima za Ngwabije Bryan Clovis wahamagawe bwa mbere mu Amavubi

Yanditswe na Habimana Sadi
Kuya 10 Kamena 2021 saa 08:10
Yasuwe :
0 0

Myugariro w’Ikipe y’Igihugu y‘u Rwanda, Amavubi na SC Lyon yo mu Bufaransa, Bryan Ngwabije yagaragaje ko yishimiye gukinira igihugu cye cy‘amavuko, ahamya ko ari umunyarwanda 100%.

Ni umusore wavukiye mu Mujyi wa Lyon mu Bufaransa muri Gucurasi 1998. Avuka ku babyeyi b’abanyarwanda.

Uyu musore w’imyaka 23 y‘amavuko, ni inshuro ye ya mbere yari ahamagawe mu Ikipe y‘Igihugu y‘u Rwanda, Amavubi, ariko mu mikino ibiri ya gicuti yakinnye yashimangiye ko ari myugariro mwiza.

Mu kiganiro yagiranye na France Football, yavuze ko yumva yishimiye cyane ko yagarutse mu gihugu cye cy‘amavuko.

Ati “Ndiyumvamo Amavubi 100%. Kandi nizeye ko nemeje abanyarwanda ko bakwiye guha icyizere iki kiragano gishya.“

Abajijwe impamvu yatumye avukira mu Bufaransa kandi ababyeyi be bombi ari abanyarwanda, yasubije ko byatewe n’amateka yaranze igihugu cy’u Rwanda.

Ati “Ababyeyi banjye bombi ni abanyarwanda. Berekeje ku mugabane w’i Burayi, mu Bufaransa nyuma ya Jenoside. Njyewe navukiye mu Bufaransa ni naho nakuriye kugeza ubu. Nakuze numva ababyeyi banjye bavuga ikinyarwanda. Ndacyumva ariko sinkivuga.“

“Naje i Kigali mu myaka icumi ishize. Ndibuka ko nagiye kureba Stade Amahoro. Kuhakinira zari inzozi zihindutse impamo. Nari mfite ibitekerezo byantegeka kuza.“

Ngwabije kandi yabajijwe uburyo yahamagawe kugeza yisanze agarutse i Kigali mu Rwanda mu gihugu cye cy’amavuko.

Ati “Narahamagawe ku mikino ibiri ya gicuti na Centrafrique, bihurirana n’uko nari mu kiruhuko cy’ibyumweru byinshi. Byahuriranye n’uko nari ndi kumwe n’umuvandimwe wanjye i Kigali, twitegura kuhava. Mbere yo guhagaruka nabwiwe ko ntegerejwe mu Ikipe y’Igihugu. Nahageze tariki ya 29 Gicurasi. Umunsi wakurikiyeho nari nujuje imyaka 23.”

Yakomeje asobanura uburyo yarebye imikino y’irushanwa rya BAL riheruka kubera mu Rwanda.

Ati “Narebye umukino wa ½ cya BAL, wa Patriots BBC.”

Uyu myugariro yabajijwe uburyo yakiriwe n’umutoza Mashami Vincent n’uburyo baganiriye ndetse n’ururimi baganiriyemo.

Ati “Yanyakiriye neza. Avuga Ikinyarwanda neza, Icyongereza n’Igifaransa. Ndamushimira kuri byose birimo n’uko yamfashe mu buryo bwo gukina no kunyakira neza. Nabonye itsinda rifite impano, abasore bato nkanjye ariko n’abandi bakuze bafite byinshi byiza.”

Yakomeje asobanura uko yakoreshejwe mu kibuga, niba koko yarakinishijwe mu mwanya asanzwe akinamo, asubiza asobanura imyanya yakinishijweho mu mikino ibiri ya gicuti Amavubi yakinnye na Centrafrique.

Ati “Nabanjemo ku mukino wa mbere nkina mu mutima w’ubwagarizi tunatsinda 2-0. Ku mukino wa Kabiri twatsinze 5-0, ninjiye mu kibuga ku nsimbuye mu minota 20 ya nyuma nkinishwa mu bwugarizi ku ruhande rw’ibumoso. Hamwe n’ibyo nabonye ndifuza kuzongera guhamagarwa muri Nzeri mu mikino yo gushaka itike yo kujya mu gikombe cy’Isi 2022.

“Itsinda turimo, turi kumwe na Mali, Uganda na Kenya. Ndiyumvamo Amavubi 100%.”

Mu kiganiro yagiranye n’iki kinyamakuru, yasoje avuga ko nyuma yo gukina yahise yerekeza kuruhuka no gusura abavandimwe.

Ati “Nyuma y’ibyo, ni ugufata umwanya ukajya mu Birunga bigize igihugu, hanyuma ubu ni ukujya i Cyangugu hafi y’umupaka wa Repubulika Iharanira Demokarasi ya Congo kuko ari ho umuryango wanjye ukomoka.”

Ni umusore wishimiwe n’abanyarwanda babashije kureba imikino ya gicuti Amavubi yakinnye.

Ubwo Ngwabije Bryan Clovis yari yinjiye bwa mbere mu mwiherero w'Ikipe y'Igihugu Amavubi
Ngwabije yagaragaje urwego rwiza ku nshuro ye ya mbere ahamagawe mu Amavubi
Ni umusore ushobora gukinishwa imyanya itandukanye mu bwugarizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .