Ilkay Gündoğan yanduye Coronavirus

Yanditswe na Eric Tony Ukurikiyimfura
Kuya 21 Nzeri 2020 saa 03:05
Yasuwe :
0 0

Umukinnyi wo hagati mu kibuga wa Manchester City, Ilkay Gündoğan, yanduye Coronavirus nk’uko byagaragajwe n’ibipimo biheruka gufatwa abakinnyi.

Manchester City ntiyigeze itangaza byinshi ku bijyanye n’uburyo Ilkay Gündoğan amerewe, ahubwo yavuze ko “Buri wese mu ikipe yifurije Ilkay gukira vuba.”

Gündoğan agomba kwishyira mu kato k’iminsi 10 nk’uko amabwiriza ya guverinoma y’u Bwongereza abivuga.

Kwandura icyorezo cya Coronavirus bivuze ko kandi uyu mukinnyi asiba umukino wa mbere wa Shampiyona ikipe ya Manchester City yakirwamo na Wolves kuri uyu wa Mbere.

Ilkay Gündoğan ashobora gusiba kandi umukino ikipe ye izahuramo na Bournemouth ku wa Kane muri Carabao Cup ndetse n’uwo izahuramo na Leicester City ku Cyumweru.

Uyu mukinnyi ukomoka mu Budage, ni uwa gatatu wa Manchester City wanduye Coronavirus nyuma ya Riyad Mahrez ukina asatira izamu na myugariro Aymeric Laporte.

Aba bombi batangiye imyitozo mu cyumweru gishize, ariko umutoza Pep Guardiola yavuze ko Mahrez ari we wenyine wabonetse uri mu bazakina umukino wa Wolves.

Gündoğan w’imyaka 29 asanzwe ari umukinnyi ubanza mu kibuga muri Manchester City ndetse yagaragaye mu mikino 49 mu mwaka ushize w’imikino mu gihe mu mwaka wawubanjirije yari yayifashije kwegukana ibikombe bitatu.

Yaherukaga kubanza mu kibuga mu mikino ibiri ikipe y’u Budage yakinnye muri UEFA Nations League, aho yanganyije igitego 1-1 na Espagne n’u Busuwisi, atsinda igitego mu uheruka.

Ilkay Gündoğan wa Manchester City yanduye Coronavirus
Ilkay Gündoğan mu mukino u Budage buheruka kunganyamo n'u Busuwisi igitego 1-1

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .