Ikipe ya Infantino yatsinze iya Perezida wa CAF mu mukino wahuje ibihangange byakanyujijeho

Yanditswe na Eric Tony Ukurikiyimfura
Kuya 7 Mutarama 2020 saa 06:57
Yasuwe :
0 0

Mbere y’uko kuri uyu wa Kabiri haba umuhango wo gutanga ibihembo ku bakinnyi b’umwaka ku Mugabane wa Afurika, abanyabigwi bakanyujijeho mu mupira w’amaguru ku Isi na Afurika bakinnye umukino wa gicuti maze ikipe yarimo Perezida wa FIFA, Gianni Infantino, itsinda iyarimo Perezida wa CAF, Ahmad Ahmad, ibitego 4-3.

Ni umukino wabaye kuri uyu wa Mbere ku mucanga uri imbere Pyramides za Giza mu Misiri, wari witabiriwe n’abanyabigwi basaga 20.

Iyi yabaye imwe mu nshuro za mbere kuri uyu mucanga hakiniwe umupira w’amaguru kuva izi Pyramides za Giza zubatswe mu mwaka wa 2560 mbere y’ivuka rya Yezu Kristu.

Ikipe y’abanyabigwi bo ku rwego rw’Isi yari ifite Umunya-Brésil Cafu nka kapiteni, irimo Perezida wa FIFA, Gianni Infantino; Julio César; Juan Sebastian Veron; Portia Modise; Gaëlle Enganamouitm; Ahmed ‘Mido’ Hossam; Kalusha Bwalya; Jacqueline Shipanga; Veronica Boquete na Elodie Thomis.

Perezida wa CAF, Ahmad Ahmad yari Kapiteni w’Ikipe y’Abanyabigwi ba Afurika, yarimo Pascal Zuberbuhler, Khalilou Fadiga, Daniel Amokachi, Nwankwo Kanu, Perpetua Nkwocha, Rabah Madjer, Flavio Amado, Ahmed Hassan, Clémentine Touré, Diomansy Kamara, El Hdaji Diouf, Hidetoshi Nakata, Laura Georges, Weal Gomaa na Jean Ssenide.

Buri kipe yakinishaga abakinnyi batanu, aho abakinnyi bakanyujijeho bongeye kwerekana ubuhanga bwabo imbere ya Minisitiri w’Urubyiruko mu Misiri, Ashraf Sobhy; Umunyamabanga wa FIFA akaba n’intumwa yihariye ikurikirana Afurika, Fatma Samoura n’abandi bari baje kureba uyu mukino.

Uyu mukino warangiye ikipe y’abanyabigwi bo ku rwego rw’Isi, itsinze iy’abo ku Mugabane wa Afurika ibitego 4-3, aho Mido, Gomes, Boquete na Enganamouit ari bo batsinze ibyo bitego bine naho Flavio na Diouf watsinze bibiri, bafasha ikipe ya Afurika.

Aba banyabigwi bose bari mu batumiwe mu birori byo gutanga ibihembo by’umukinnyi wa Afurika w’umwaka (CAF Awards 2019), umuhango ubera mu Misiri mu Mujyi i Hurghada.

Umunya-Sénégal Sadio Mané ni we uhabwa amahirwe yo kwegukana iki gihembo mu bagabo, aho agihanganiye na Mohamed Salah ukomoka mu Misiri wanatwaye icya 2017 na 2018 ndetse n’Umunya-Algérie Riyad Mahrez wegukanye icya 2016.

Umunya-Misiri Ahmed Hassan ahanganiye umupira na Youri Djorkaeff w'Umufaransa
Umukino wabereye ku mucanga uri imbere ya Pyramides za Giza
Perezida wa FIFA, Gianni Infantino, ahanganiye umupira na Laura Georges wakiniye u Bufaransa
Perezida wa FIFA Gianni Infantino yari ahanganye na Perezida wa CAF, Ahmad Ahmad, muri uyu mukino
Cafu wamamaye muri Brésil [Samba Boys] yari Kapiteni w'Ikipe ya FIFA
Arsene Wenger wahoze ari umutoza wa Arsenal kuri ubu akora muri FIFA ari mu bitabiriye uyu mukino
Amakipe yombi yafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .