Mu gitondo cyo ku wa Mbere, tariki ya 29 Mata 2024, ni bwo Police FC yakoreye imyitozo kuri Kigali Pelé Stadium itegura umukino ukomeye igomba gushakiraho itike yo gusohokera u Rwanda mu mikino Nyafurika.

Ubutumwa bwanyujijwe ku mbuga nkoranyambaga za Police FC, bugaragaza ko iyi kipe iri mu mwuka mwiza nyuma yo guhura n’Umuyobozi Mukuru wa Polisi y’u Rwanda, CG Félix Namuhoranye.

Yagize iti “Hamwe no gushyigikirwa dufite, turi mu bihe byiza birenze ibindi byo kuba twakwegukana igikombe.”

Police FC yageze ku mukino wa nyuma isezereye Gasogi United FC mu mukino wo kwishyura wa ½ aho yayitsinze kuri penaliti 4-3 kuko amakipe yombi yari yanganyije igitego 1-1 mu mikino ibiri.

Ibi ariko byasabaga ko iyi kipe y’Igipolisi cy’u Rwanda ishaka izindi mbaraga no gushyigikirwa kuri hejuru kuko ifitanye umukino na Bugesera FC iherutse kuyitsinda ibitego 2-1 mu mukino wa Shampiyona.

Police FC iheruka gusohokera igihugu mu mwaka w’imikino wa 2015/16 nyuma yo kwegukanaga Igikombe cy’Amahoro itsinze Rayon Sports FC igitego 1-0 ku mukino wa nyuma.

Umuyobozi Mukuru wa Polisi y'u Rwanda, CG Félix Namuhoranye, yahaye impanuro abakinnyi ba Police FC mbere yo gukina na Bugesera FC

Abakinnyi bose ba Police FC bagiranye ibihe byiza n'Umuyobozi Mukuru wa Polisi y'u Rwanda, CG Félix Namuhoranye

Police FC ifite urugamba rwo guhangana na Bugesera FC

Ubuyobozi bwa Polisi y'u Rwanda n'ubwa Police FC buri mu mwuka umwe

Umunyezamu wa Police FC, Rukundo Onésime, yafashije Police FC gukuramo Gasogi United FC kuri penaliti

Abakinnyi ba Police FC bifuza kwegukana Igikombe cy'Amahoro iheruka mu 2015

Kapiteni wa Police FC, Nshuti Dominique Savio aganira n'ubuyobozi bwa Polisi y'u Rwanda

Akuki Djibrin wa Police FC aganira na CG Félix Namuhoranye