Muri iyi nkuru tugiye kugaruka ku byo wamenya ku makipe ari mu Itsinda H, ari na ryo rya munani. Iri ririmo Espagne na Uruguay zegukanye iri rushanwa, Cap-Vert yitabiriye bwa mbere na Arabie Saoudite itararenga ⅛.

Imikino yo muri iri tsinda izabera mu mijyi ya Atlanta, Miami na Houston yo muri Leta Zunze Ubumwe za Amerika, na Guadalajara muri Mexique.

Cap-Vert

Ikipe y’Igihugu ya Cap-Vert ‘Blue Sharks’, nta mateka akomeye ifite mu irushanwa ry’Igikombe cy’Isi, dore ko ari ku nshuro ya mbere igiye kurikina.

Umutoza Mukuru wa Blue Sharks, Pedro Leitão Brito, yahawe akazi mu 2020, ndetse usibye kuyigeza mu Gikombe cy’Isi yanayigejeje muri ¼ cy’Igikombe cya Afurika mu 2023, aho kwitwara neza kwamuhesheje igihembo cy’Umutoza w’Umwaka mu 2025.

Mu bakinnyi yahisemo gukoresha mu kurushaho kwandika amateka muri iri tsinda, barimo Sidny Lopes Cabral ukinira Benfica, Logan Costa wa Villarreal, Nuno da Costa wa Istanbul Basaksehir n’abandi.

Ikipe y'Igihugu ya Cap-Vert yitabiriye Igikombe cy'Isi bwa mbere

Abakinnyi bahamagawe mu Ikipe y'Igihugu ya Cap-Vert

Espagne

Ikipe y’Igihugu ya Espagne ‘La Roja’, igiye kwitabira Igikombe cy’Isi ku nshuro ya 17 kuva mu 1934, ikaba inshuro ya 13 yikurikiranya iryitabira, ari na yo yarikinnye inshuro nyinshi muri iri tsinda.

Iyi kipe ni imwe mu makipe umunani yegukanye iri rushanwa mu myaka 96 ishize rikinwa. Yaritwaye mu 2010 ubwo ryari ryabereye muri Afurika y’Epfo, na ho iriheruka mu 2022 yagarukiye muri ⅛.

Espagne iri ku mwanya wa kabiri mu makipe akomeye ku rutonde rw’Ishyirahamwe rya Ruhago ku Isi (FIFA), ni imwe mu makipe ahabwa amahirwe yo kwegukana Igikombe cy’Isi ifatanyije n’Umutoza Mukuru wayo, Luis de la Fuente.

Mu bakinnyi yahisemo bazamufasha kwandika amateka harimo barindwi bafashije FC Barcelone kwegukana Igikombe cya Shampiyona ya Espagne. Abo ni Joan Garcia, Pau Cubarsi, Eric Garcia, Pedri, Ferran Torres, Gavi na Lamine Yamal.

Aba bazafatanya n’abandi bakomeye nka David Raya, Martin Zubimendi na Mikel Merino ba Arsenal, Rodri wa Manchester City, Fabian Ruiz wa Paris Saint-Germain n’abandi.

Mu mikino 67 yakinnye mu Gikombe cy’Isi yatsinzemo 31, inganya 17, indi 19 irayitsindwa. Yinjije ibitego 108 yinjizwa 75.

Ikipe y'Igihugu ya Espagne ihabwa amahirwe yo kwegukana Igikombe cy'Isi

Abakinnyi Espagne yifuza kwegukana Igikombe cy'Isi yahamagaye

Uruguay

Ikipe y’Igihugu ya Uruguay ‘The Sky Blue’, igiye kwitabira Igikombe cy’Isi ku nshuro ya 15 yikurikiranya kuva mu 1930, ikaba ari na yo ifite amateka yo kuba yaracyakiriye bwa mbere.

Muri uwo mwaka yakiraga irushanwa yahise inaryegukana, yongera kuritwara mu 1950, ari na bwo iriheruka. Iriheruka muri Qatar mu 2022 yararyitabiriye ariko iviramo mu matsinda.

The Sky Blue iri ku mwanya wa 16 ku rutonde rw’Ishyirahamwe rya Ruhago ku Isi (FIFA), ikaba itozwa na Marcelo Bielsa ugiye gutoza muri iri rushanwa ku nshuro ya gatatu nyuma yo kuribamo mu 2002 atoza Argentine no mu 2010 atoza Chile.

Mu bakinnyi yahisemo gukoresha harimo myugariro wa FC Barcelone, Ronald Araújo, José María Giménez wa Atlético Madrid, Federico Valverde wa Real Madrid, Rodrigo Bentancur wa Tottenham Hotspur, Manuel Ugarte wa Manchester United, Darwin Núñez wa Al Hilal n’abandi.

Mu mikino 59 iyi kipe imaze gukina mu Gikombe cy’Isi, yatsinzemo 25, inganya 13, mu gihe indi 21 yayitsinzwe. Yinjijwe ibitego 76 yo yinjiza 89.

Uruguay yegukanye Igikombe cy'Isi inshuro ebyiri

Abakinnyi Uruguay izifashisha mu Gikombe cy'Isi

Arabie Saoudite

Ikipe y’Igihugu ya Arabie Saoudite ‘The Green Falcons’, igiye kwitabira Igikombe cy’Isi ku nshuro ya karindwi, ikaba inshuro ya gatatu yikurikiranya ibona itike yo kugikina.

Ku nshuro ya mbere yitabira iri rushanwa mu 1994 ryari ryabereye muri Leta Zunze Ubumwe za Amerika, ndetse icyo gihe yahise igera muri ⅛, ariko izindi nshuro zose yitabiriye ntabwo yarenze amatsinda

Mu irushanwa riheruka ryabereye muri Qatar mu 2022, yakoze ibitarakekwaga na buri wese, itsinda Argentine ibitego 2-1, gusa ntibyagira icyo biyifasha ahubwo Argentine iza no kwegukana iri rushanwa.

The Green Falcons itozwa na Georgios Donis wahawe inshingano muri Mata 2026,kugeza ubu iri ku mwanya wa 61 ku rutonde rw’Ishyirahamwe rya Ruhago ku Isi (FIFA).

Mu bakinnyi 26 uyu mutoza yahamagaye, harimo umwe gusa udakina muri Shampiyona ya Arabie Saoudite. Uwo ni Saud Abdulhamid ukinira Lens yo mu Bufaransa.

Abandi barimo barindwi ba Al Nassr, batandatu ba Al Hilal, batatu ba Al Ahli n’abandi bo mu yandi makipe nka Al Ittihad, Al Qadsiah, Al Ula na Al Ettifaq.

Mu mikino 19 yakinnye mu Gikombe cy’Isi yatsinzemo ine, inganya ibiri, indi 13 irayitsindwa. Yinjije ibitego 14 yinjizwa 44.

Uko amakipe azahura:

15 Kamena

Espagne vs. Cap-Vert
Arabie Saoudite vs Uruguay

21 Kamena

Espagne vs Arabie Saoudite
Uruguay vs Cap-Vert

26 Kamena

Cap-Vert vs Arabie Saoudite
Uruguay vs Espagne

Arabie Saoudite inyuzamo igatungurana mu Gikombe cy'Isi

Abakinnyi Arabie Saoudite yahamagaye harimo umwe ukina hanze y'igihugu