Ni mu mukino wabaye kuri uyu wa Mbere, tariki ya 15 Kamena 2026, ubera ku kibuga cya Lincoln Financial Field kiri mu Mujyi wa Philadelphia, muri Leta Zunze Ubumwe za Amerika.

Mu bafana 68.274 bari muri iyi stade, byagaragaraga ko umubare muto ari wo wari inyuma y’Ikipe y’Igihugu ya Côte d’Ivoire, abenshi bashyigikiye Ikipe y’Igihugu ya Equateur.

Equateur yinjiye mu mukino mbere ndetse ku munota wa 11 rutahizamu wayo Enner Valencia ahusha uburyo bw’igitego ku ishoti rikomeye yateye ariko rinyura hejuru y’izamu.

Ku munota wa 46 mu gice cya kabiri, Enner Valencia yongeye kubona andi mahirwe ariko umupira yateye mu izamu ukubita ku giti cy’izamu uvamo.

Mu minota 50 y’umukino ni bwo Côte d’Ivoire yatangiye kubyaza umusaruro imipira yihuta, ishaka gutungura Equateur ariko uburyo bw’igitego bwabonywe na Elye Wahi ku munota wa 52 n’ubwa Yan Diomande ku wa 58 ntibwatanga umusaruro.

Umutoza wa Côte d’Ivoire, Emerse Faé, yakoze impinduka ashyira mu kibuga amaraso mashya, aho yakuyemo Elye Wahi, Bazoumana Touré, Nicolas Pépé, Seko Fofana na Guela Doué, ashyiramo Ange-Yoan Bonny, Amad Diallo, Christ Inao Oulai, Ibrahim Sangaré na Odilon Kossounou.

Ku munota wa 90 w’umukino, ni bwo Wilfried Singo yohereje umupira mu rubuga rw’amahina, usanga Amad Diallo ahagaze neze, ahita ashyiramo igitego kimwe rukumbi cyabonetse muri uyu mukino.

Kuva mu Ukwakira 2025, Amad Diallo amaze gutsindira Côte d’Ivoire ibitego bitandatu, nta wundi mukinnyi urabikora muri icyo gihe.

Kuva Igikombe cy’Isi cya 2026 cyatangira gukinwa, imipira icyenda ni yo imaze gukubita ku giti cyangwa umutambiko w’izamu. Ine muri yo yabonetse muri uyu mukino, harimo itatu yatewe na Equateur n’umwe wa Côte d’Ivoire.

Iyi kipe iri mu zihagarariye Afurika yahise ifata umwanya wa kabiri mu Itsinda E riyobowe n’u Budage bwanyagiye Curaçao ibitego 7-1.

Yan Diomande ukinira Côte d’Ivoire yabaye umukinnyi w’iyi kipe ukoze amateka yo kuyikinira mu Gikombe cy’Isi ari muto, kuko ari we ubikoze afite imyaka 19 gusa.

Mu yindi mikino yabaye mu ijoro ryacyeye, Suède yanyagiye Tunisia ibitego 5-1 mu Itsinda F.

Ibitego by’iki gihugu cy’i Burayi byatsinzwe na Yasin Ayari watsinze bibiri, Alexander Isak, Viktor Gyökeres na Mattias Svanberg.

Igitego rukumbi cya Tunisia cyabonetse muri uyu mukino cyinjijwe na Omar Rekik mbere y’uko igice cya mbere kirangira ari ibitego 2-1.

Iri tsinda ni ryo ririmo u Buholandi n’u Buyapani byanganyije ibitego 2-2 mu mukino wabanje.

Imikino iteganyijwe kuri uyu wa Mbere

Abakinnyi ba Equateur bari kuririmba indirimbo y'igihugu cyabo

Abakinnyi ba Côte d’Ivoire babanje gusenga mbere yo gutangira umukino

Yan Diomande ari gushaka uko aha umupira bagenzi be

Côte d’Ivoire yabonye intsinzi y'ingenzi mu Gikombe cy'Isi

Yan Diomande yabaye umukinnyi muto ukiniye Côte d’Ivoire mu Gikombe cy'Isi

Amad Diallo yafashije bikomeye Côte d’Ivoire nubwo yinjiye mu kibuga asimbuye

Intsinzi ya Côte d’Ivoire yabonetse ku munota wa nyuma

Viktor Gyökeres na Alexander Isak bafashije Suède gutangira neza Igikombe cy'Isi cya 2026

Isak yatsinze igitego cya kabiri cya Suède ku munota wa 30

Yasin Ayari ashimirwa na bagenzi be nyuma yo gutsinda ibitego bibiri muri uyu mukino