Icyumweru gitaha gishobora gusiga Rayon Sports itoye umusimbura wa Munyakazi Sadate

Yanditswe na Eric Tony Ukurikiyimfura
Kuya 13 Kamena 2020 saa 02:55
Yasuwe :
0 0

Icyumweru gitaha gishobora gusiga Rayon Sports ibonye umuyobozi mushya nyuma y’uko Munyakazi Sadate umaze amezi 11 ayiyobora aterewe icyizere n’abafana bamutoye.

Hashize ukwezi muri Rayon Sports havugwa ibibazo bishingiye ku buyobozi, aho bamwe mu bayoboye iyi kipe bashinje amakosa Munyakazi Sadate uyiyobora kugeza ubwo bamuhagaritse hamwe na Komite ye.

Munyakazi yitabaje Urwego rw’Igihugu rw’Imiyoborere (RGB) rwemeje ko ari we muyobozi uhagarariye Rayon Sports byemewe n’amategeko . Icyo gihe hari hashize icyumweru agaragaje ko abahoze bayobora iyi kipe banyereje umutungo wayo ugera kuri miliyari 1 Frw, ibi bikaba bimaze iminsi bikurikiranwa n’Urwego rw’Igihugu rw’Ubugenzacyaha (RIB).

Umuyobozi wa Rayon Sports ntiyishimiwe n’abafana bamwe ndetse Ihuriro ry’amatsinda y’abafana (Fan Base)- yamutoye- riherutse gutangaza ko ryamutereye icyizere.

Muri iki cyumweru, abadashyigikiye Munyakazi Sadate bongeye kwandikira RGB bagaragaza ko uburyo yakemuyemo ikibazo atari byo, ko yakongera kubisuzuma kuko umuyobozi yemeje nta cyizere afitiwe n’abamutoye.

Radio Isango Star yatangaje ko abagize Fan Base ya Rayon Sports igizwe n’amatsinda 40 - yatoye umuyobozi w’ikipe muri Nyakanga 2019- iri gukoresha ubusabe [petition] mu bayobozi b’ayo matsinda kugira ngo hagaragazwe ko uru rwego rukuru muri Rayon Sports rutagifitiye icyizere umuyobozi wayo.

Kugeza ubu abamaze gusinya bemeza ko badashyigikiye Munyakazi Sadate ni 28 mu gihe Inama y’Inteko Rusange igomba kuba igizwe n’abanyamuryango 30 ni ukuvuga ¾ . Abayoboye iki gikorwa ngo biteze ko bizagera ku wa mbere, ababura nabo bamaze gusinya.

Abantu batandukanye IGIHE yavugishije, bavuze ko mu bayobozi 40 b’amatsinda agize Fan Base (yatoye), barindwi ari bo bamaze kwemeza ko bashyigikiye Munyakazi Sadate mu buryo bweruye, aho bari mu ba mbere yashyize ku rubuga rwa kabiri rwa Fan Base yashinze.

Bisobanuye ko ¾ nibamara kuboneka, byitezwe ko hazatumizwa inama y’Inteko Rusange mu cyumweru gitaha hagatorwa umuyobozi mushya wa Rayon Sports.

Umwe yabwiye IGIHE ati "Reka dutegereze ku wa Mbere tuzareba aho bigana."

Mu kiganiro yagiranye na Radio Rwanda ku wa Gatanu, Munyakazi Sadate yavuze ko " Aka kanya ikigamijwe ari ukubaka Rayon Sports ntawe ushyize undi ku ruhande. Inama y’Inteko Rusange ya Rayon Sports ntabwo iri mu bintu byihutirwa dufite."

Ingingo ya 10 y’amategeko shingiro y’Umuryango Rayon Sports, mu gace kayo ka gatatu, havuga ko Inama y’Inteko Rusange ifite ububasha bwo gushyiraho no kuguraho Komite Nyobozi.

Muri Rayon Sports hari gusinywa ubusabe bugamije gusimbuza Munyakazi Sadate ndetse icyumweru gitaha gishobora gusiga ikipe ifite umuyobozi mushya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .