Ku wa 22 Gicurasi nibwo Komite Nyobozi ya FERWAFA yemeje ko aya makipe yari abiri ya nyuma ubwo hahagarikwaga Shampiyona kubera icyorezo cya Coronavirus, azamanuka mu Cyiciro cya Kabiri.

Nyuma yo gusaba ko bigarukwaho mu nama y’Inteko Rusange ya FERWAFA, Perezida w’iri Shyirahamwe, Rtd Brig Sekamana Jean Damascène, yavuze ko icyemezo cyafashwe hakurikijwe amategeko bityo kidahinduka.

Muri iyi nama, abanyamuryango babwiwe ko ibyo basabye byo kongera umubare w’abanyamahanga bidashoboka kuko babisabye batinze, ariko hemezwa ko bizasuzuma na Komisiyo y’Amarushanwa. Ibi bivuze ko buri kipe izakomeza gukoresha abanyamahanga batatu mu bakinnyi 18 bifashishwa ku mukino.

Rurangirwa Aaron yagizwe Komiseri wa Komisiyo y’Imisifurire, asimbuye Gasingwa Michel weguye muri Nyakanga.

Perezida wa Ferwafa yamenyesheje abanyamuryango ko bagiranye ibiganiro n’abaterankunga barimo uruganda rw’ibinyobwa rwa Bralirwa n’Ikigo cy’Igihugu cy’Itangazamakuru (RBA) kizajya cyerekana imikino ya Shampiyona.

Kuri Bralirwa, yavuze ko bisa n’ibyarangiye ku buryo hasigaye gusinywa amasezerano.

Nyanza FC, Scandinavia WFC na The Winners Football Center, zemejwe nk’abanyamuryango bashya ba FERWAFA.

Perezida wa FERWAFA, Rtd Brig Gen Sekamana Jean Damascène, mu nama y'Inteko Rusange yo kuri uyu wa Gatandatu