Iki gikorwa cya “#Play4Kwibuka31” cyabaye mu mpera z’icyumweru ebyiri zikurikirana, kuva ku wa 26 Mata kugeza ku wa 4 Gicurasi, cyitabiriwe n’abana barenga 500 n’abakinnyi bakanyujijeho basaga 200, bakiniye mu bice bitandukanye by’Umujyi wa Kigali. Intego nyamukuru yari ugutoza urubyiruko rw’u Rwanda indangagaciro z’amahoro, ubumuntu n’ubumwe binyuze muri siporo n’uburezi.

“#Play4Kwibuka” yatangijwe nk’ubukangurambaga bwubakiye ku mupira w’amaguru, bwo guha icyubahiro abahoze ari abakinnyi b’umupira w’amaguru, abayobozi mu makipe n’abandi bose babarizwaga mu muryango mugari w’umupira w’amaguru mu Rwanda, kwimakaza ubwiyunge no kubaka amahoro arambye.

Yari igamije kandi gufasha abakiri bato n’Abanyarwanda muri rusange kurushaho gusobanukirwa n’impamvu kwibuka ari inshingano zaburi Munyarwanda yaba umukuru cyangwa umuto.

Ni igikorwa cyateguwe ku bufatanye bw’Ishyirahamwe ry’Abahoze bakinira Amavubi (FAPA), Ishami Foundation, Ihuriro rya Project Team Work n’abandi bafatanyabikorwa barimo amakipe y’abakanyujijeho.

Muri ayo makipe harimo Karibu FC, Assoussa FC, Vision 2020, Mulindi FC, Amigo FC, Inoubliables Rayon Sports na Premier Family. Harimo kandi amarerero y’umupira w’amaguru nka APR FTC, Intare FTC, FC Bayern Academy Rwanda, Shining FA, New Harvest FA, Umuli Academy n’andi ahurira mu ihuriro rya Community Football League ribarizwa i Nyamirambo.

“#Play4Kwibuka31” yashyigikiwe kandi n’Umujyi wa Kigali, Minisiteri ya Siporo na Kepler University batanze ibibuga byakinirwagaho. Abategura iki gikorwa bishimiye ko cyongeye kugaragaza uburyo umupira w’amaguru ushobora kuba igikoresho gikomeye cyo gukiza ibikomere no kubaka ubumwe mu gihugu no kurushaho kwigisha urubyiruko ibijyanye n’amateka ya Jenoside yakorewe Abatutsi.

Uwarokotse Jenoside, Murangwa Eric Eugene, wahoze ari Kapiteni w’Amavubi akaba Perezida wa FAPA n’umwe mu bashinze Ishami Foundation, yagize ati “#Play4Kwibuka si ugukina gusa. Ni uburyo bwo guha agaciro amateka no gutegura ejo heza hubakiye ku mahoro arambye, binyujijwe muri siporo,”

#Play4Kwibuka31: Igikorwa cyo Kwibuka no gutanga icyubahiro

Igikorwa cya #Play4Kwibuka31 cyabimburiwe n’umuhango wo kunamira no guha icyubahiro abakinnyi, abayobozi n’abandi babarizwaga mu muryango mugari w’umupira w’amaguru bishwe muri Jenoside.

Umuhango wabereye ku Rwibutso rwa Jenoside rwa Kigali, witabirwa n’abarenga 300 barimo abayobozi b’umupira w’amaguru mu Rwanda, abahoze ari abakinnyi b’umupira w’amaguru, abakinnyi b’amakipe y’abakanyujijeho, abana bo mu marerero, abakunzi b’umupira w’amaguru n’abo mu miryango n’inshuti z’abazize Jenoside babarizwaga mu muryango mugari w’umupira w’amaguru mu Rwanda.

Nayandi Abraham uri mu batanze ikiganiro, yagize ati “Uburyo bwiza bwo guha icyubahiro abakinnyi twatakaje ni ugukomeza umurage wabo haba mu kibuga no hanze yacyo.”

Habaye amarushanwa ajyanye na #Play4Kwibuka31

Mu minsi yakurikiyeho, habayeho imikino y’abahungu n’abakobwa bafite imyaka hagati ya 13 na 16, yabereye ku bibuga bitandukanye birimo Pelé Stadium, Tapis Rouge, na Kepler University.

Amakipe y’abakobwa n’abahungu aturuka mu miryango itandukanye yo hirya no hino mu Mujyi wa Kigali yahuriye mu mikino y’umupira w’amaguru igamije gufasha abayikina kongera ubumwe, ubufatanye no kurushaho kumva uruhare n’inshingano zo kwibuka no gusigasira ubumwe bw’Abanyarwanda.

Mu butumwa bwatanzwe kenshi n’abanyabigwi ba ruhago mu Rwanda mbere y’imikino, hagarutsweho cyane ku kamaro ko guharanira amahoro nk’aba-sportifs n’Abanyarwanda muri rusange.

Umuryango Ishami Foundation watanze ubutumwa burimo insanganyamatsiko nka “Ndi Umunyarwanda, Kwigira no Kwibuka—indangagaciro zifasha urubyiruko gutekereza no kurushaho kumva uruhare n’akamaro k’ubumwe bwabo nk’Abanyarwanda.”

Gahunga Kirenga Salomon w’imyaka 11, ukina umupira w’amaguru mu irerero rya Nunga, yagize ati “Sinzibagirwa umunsi nageze ku rwibutso rwa Jenoside. Ibyo nahigiye byatumye ndushaho kumva ko ngomba gukora ibintu byiza mu buzima bwanjye.”

Ku Cyumweru, tariki ya 4 Gicurasi, ni bwo habaye igikorwa cyo gusoza #Play4Kwibuka31, uba umwanya wo kwishimira ubudaherenwa n’ubutwari bwubakiweho ubuzima bushya ku bacitse ku icumu no mu Banyarwanda muri rusange.

Amakipe ya Forever Girls na Shining Football Academy ni yo yegukanye ibikombe mu cyiciro cy’abato, naho Karibu FC itsinda umukino w’abakanyujijeho.

Abategura #Play4Kwibuka bifuza ko iki gikorwa kigera kuri benshi hirya no hino mu gihugu, bityo hakwiye kubaho ubufatanye no gushyigikira gahunda z’iki gikorwa uhereye ku bantu ku giti cyabo, ibigo byigenga, inzego za leta n’abandi bafatanyabikorwa.

Bategura kukigira ngarukamwaka mu gihugu hose, kongera amahugurwa ku batoza mu bijyanye n’imikoreshereze ya siporo mu kubaka amahoro no kwigisha indangagaciro Nyarwanda mu rubyiruko.

Igikorwa cya ‘#Play4Kwibuka31’ cyari cyahuje abakiri bato n’abanyabigwi muri ruhago y’u Rwanda

Ni igikorwa cyari kigamije kunamira inzirakarengane zazize Jenoside yakorewe Abatutsi mu 1994, by'umwihariko aba-sportifs mu mupira w'amaguru

Kirenga Salomon w'imyaka 11, yavuze ko ubwo yasuraga urwibutso rwa Jenoside, yahakuye amasomo yo gukora ibintu byiza

Murangwa Eric Eugène uyobora Ishyirahamwe ry'Abakiniye Amavubi [FAPA] riri mu bateguye iki gikorwa

Inoubliables Rayon Sports iri mu makipe yakinnye iri rushanwa

Team FAPA igizwe n'abanyabigwi muri ruhago y'u Rwanda, bakiniye Amavubi

FC Bayern Academy Rwanda iri mu makipe y'abato yitabiriye iki gikorwa